APOCALIPSIS 14

Joya Ovejaja Bacuaejja jayojja poanijo, oja babaca 144.000 huiso dejjacuanajo tehuecapoa

1Majoya aje eyaya jjacahuibaquiani jayojja aniya banaje eyiyo Sión bajjanijamacoojo joya Ovejaja Bacuaejja jayojja poani nequi 144.000 huiso dejjacuananijje. Ojjaña ma eyiyojo nequica dejjacuana oja bahua Ovejaja Bacuaejja jayojjaja bajjanijji poanaje, oja Chiija bajjanijji pea-ai poanaje. 2Oe eyajo ani queamimisajeanee mimije eyaya shajja-ajjanaje jiquio ecua cuei queashajjaquijjo oquequinequiani jama, cueji queashajjaquijjonee ponequiani jama. Jiquio ecua harpa queahuisocuaa ojee iñaqueyacani jamaya oya mimije eyaya shajja-ajjanaje. 3Majoya ma 144.000 huiso dejjacuana Emeshimesenei quii-anijjiai nequi cojjaneijo ejjachichaqui nequica banaje, ma cuatro huisome Eyacuiñajji bihuiajji eyamicuana cojjaneijo, ma 24 huisome etii poanicuana cojjaneijo pea-ai nequicanaje ojee. Mahuisonei dejjacuanaya esohuicuayajji eyacuanei sohuicuayanequinaje ojayenei esohuicuayajji. Peacuanaja ca queaquehuanee poanaje esohuicuayapea-aijji bajjimajojoya. Mahuisoya ma 144.000 huiso dejjacuana sohuicuayacanequinaje Eyacuiñajjiya ma dejjacuana jjesheca'yonajejjejojoya ojaya'yo epojji. 4Ojjaña ma 144.000 huiso dejjacuana shacuima'tii nequinaje, eponanijje jaajjimanei poanaje. Ma dejjacuaaya Ovejaja Bacuaejja jayojja poani equijje acapoquinaje cua o poquijeyasijje. Eyacuiñajjiya ma dejjacuanaya queahuisoneecuananijje ojee ba'e jjesheca'yonaje ojaya'yo epojji. Ma ecua judiocuaa ojjaña oja banacuana iyehuiso oja sejjacoo'yo Eyacuiñajji quiacapoquinaje, oya jayojja Eyacuiñajjiya ma 144.000 huiso dejjacuana bacanaje equiacoo ojaya epo'yojji, Ovejaja Bacuaejja jayojja poanija epopea-ai'yojji. 5Ojjaña ma 144.000 huiso dejjacuana siajje po-ajjanei popoquinaje, mimishiamaneitii ba'ecapoquinaje.

Tres angelcuaa esohui yecanaje

6Majoya pea ángel quea-aonee eyatahuatahuajo cuabesaba'e bajeasohuanaje. Ohuaya Eyacuiñajjija esohui queapamenee ma oe po-ajjanei esohuiya yecaoqueje ojjaña meshijo ba'ecacuana huohuijji bapea-ainaje. Ojjaña pea meshijo ba'ecacuana, ojjaña peajaajjicuana queahuesha, ojjaña pea esohuijo mimianicuana pea-ai huohuijji esohui yeoquecanaje. 7Ma angelya janobajjimanei ojjañacuana huohuicanaje jama ba'a: “Eyacuiñajji queaca'aneetii poani bapoquiacue quiaa, oja esohuijo oe jjashajja-ajjaquipoquicue. Oya oeneitii bihuiapoquiacue jjeya epojja apoa epoejojoya ojjañacuana achajja ba'epoquianinaje ja'anei huohui'yojji. Eyacuiñajji ojjaña eyatahuatahua, meshicuana, ojjaña aquiana, bae-aiai enacuana, ojjaña enaoshecuana pea-ai panajji epo oya bihuiapoquiacue quiaa. Chama'nei aquiana oja pana pojjeama” jama huohuimeya angelya acanaje.

8Majoya pea segundo ángel ebionei angelquiquishijji eyatahuatahuajo cuabesaba'e bapea-ainaje. Ma angelya janobajjimanei huohuipea-aicanaje jama ba'a: “Babilonia meshijo anica equicuana ojjañatii equecuajeabichajeyo'yo jaa, ma meshicuiñajjicuana chama'yotii, cuiaca'yonaje cuana. Babilonia meshicuiñajjicuana queamimishinee jaapoquinaje peacuiñajjicuananijje. Ona jama ba'epoquiani bamajje peajaajjicuana oya jayojja pea-ai popoquinaje peacojjojji. Jiquio ecua uvajjajjana' queaseseneejo coocajje queahuiso ishimajamajasapoani ehuoojji, oya jayojja Babilonia meshicuiñajjicuaa peajaajjicuana queamimishi pomeecapoquinaje” jama huohuimeya angelya acanaje.

9-10Majoya pea tercer ángel oquiquishijji eyatahuatahuajo cuabesaba'e bapea-ainaje. Ma angelya janobajjimanei huohuipea-aicanaje jama ba'a: “Ojjaña joya enaojjojo ani nequisohua eyami queaquemonee bihuiajji poanicuana, ojjaña onaja ne o jayojja poani bihuiajji poanicuana pea-ai Eyacuiñajjiya queaqueneneeya queaneenee pomeecaje'yo. E'e, ojjaña joya oja numerojo jjajeasiimeequinajecuana oja ebañei mejje, ebahuajje pea-ai Eyacuiñajjiya queaqueneneeya queaneenee pomeecaje'yo. Jamajjeya joya jjajeasiimeequinaje huisotiicuana queaneeneetii cuaquijijiqui azufre quiyoquitejjeejo nequitiitiipoquije'yo. Queaneeneetii nequipoquije'yo Eyacuiñajjija angelcuana anica cojjaneijo, Ovejaja Bacuaejja jayojja poani ani cojjaneijo pea-ai. 11Macuana queaneeneetii popoqui'yojji meshijje huichacha ba'esohuaquipoquijetii. Cuaqui-ai quijjo'yoajjanei jaapoquijetii epojjajo mecajje macuana queaneeneetii ponequi'yojji. Jamaya popoquije'yo cuana ojjaña joya enaojjojo ani nequisohua eyami queaquemonee bihuiajji poanajecuana, onaja ne ma eyami queaquemonee bihuiajji poanajecuana pea-ai. Ojjaña joya ma eyami queaquemoneeja numerojo jjajeasiimeequinajecuana oja bahuajje, oja ebañei emejje pea-ai queaneenee nequipoquije'yotii epojjajo, mecajje pea-ai, jomishoca'yojjimaneitii” jama huohuimeya angelya acanaje.

12Jiquio esohui shajja-ajjaneicue quiaa. Eyacuiñajjija'yo poanicuana ca queaca'a ba'ecapoquijji ojaya esohuijo jjashajja-ajjaquipoquiani. Quito cajaa aca'yoajja cuanaja, jamatii peacuaa queacamajanee pomeecaniya oja esohuijo.

13Majoya pea eyajo ani mimije eyaya shajja-ajjanaje jama poaje ba'a: “Jiquio esohui tehuecue ba'a: E'ejojonei queabihuinee poaje ojjaña joya Eyacuiñajjija esohuijo jjashajja-ajjaquipoquijji poanicuana jjeyanei manoje'yo, quijje pea-ai” jamaya poanaje.

Eyacuiñajjija Edojjoshahuapame jama poani pea-ai ba'a: “E'ejojonei queabihuinee poaje cuana. Macuana mano'yomajje esohuijo queanee popajeaje'yo, jomishocaje'yo Eyahuasijje. Majoya Eyacuiñajjiya ma o queapame ojo chacochacopoquinaje sosejje quiacaje.”

Eyacuiñajjiya ojjañacuanaja mimishi ja'anei huohuicaje'yo Juanya bacanaje

14Majoya eyaya eyahuasijje jjabajeasohuaquimajje oe bo-oshe nequi banaje. Bo nequibiajje ani oe dejjapojji epo banaje. Oro copocopo corona oja esapajo iya aninaje. Oya ejehuijji queashejjinee mejji poanaje aquianacuana sejja'yojji. 15Majoya aje pea ángel Eyacuiñajjija equi-ai Eyajo ani cuayamajje janobajjimanei taaanaje ma bobiajje nequi. Jama taaame poanaje ba'a: “Jjeyahuanei miquea ejehuijjiya sejja'yocue, jiquio meshijo ani ebanacuana aquiana jahuanaje. Epojja o sejja'yojji apoa jjeya.” 16Jamajjeya ma bobiajje aniya aquiana jiquio meshijo ani ebana sejjaca'yonaje oja ejehuijjiya.

17Majoya aje pea ángel Eyacuiñajjija equi-ai Eyajo ani cuayapea-ainaje ejehuijji queashejji mejji pea-ai aquianacuana sejja'yojji. 18Majoya aje pea ángel altarpejjejo nequi, joya cuaquijiji jaahuanapoquiajji poaniya cuayamajje janobajjimanei taaanaje ma pea ángel ejehuijji mejji poani jama ba'a: “Jjeyahuanei miquea ejehuijjiya ojjaña meshijo ani uvajjonojjajja aa jehuisejja'yocue uvajjajja queapame jahuanajejojoya.” 19Majoya ma pea angelya ejehuijji mejjiya ojjaña meshijo ani uvajjonojjajja aa jehuisejjaca'yonaje. Ojjaña uvajjajja oja jehuisejja'yocuana biocanaje olla-aiyasijje equishipashaneijji uvajjajjana' yajji. Oya jayojjaya Eyacuiñajjiya queaqueneneeya ojjaña meshijo ba'eca mimishicuana queaneenee pomeecaje'yo oja mimishijo joya ecua dejjacuaa uvajjajjacuana quishipashaneica'yani jamaya. 20Ciudad Jerusalén ani queahueshapishana esecueyasijje Eyacuiñajjiya uvajjajjacuana quishipashaneica'yonaje. Jama poanijje queahuisoneecuana manojeameeca'yajo dejjacuana eponacuana yamijjija ena' queahuisoneenee cuayaquinaje ba'e ena queaquemo ani jayojja. Ma cuayaquinaje enaaya bae queaquemonee acanaje 300 kilómetros aome, uno y medio metros doeme acanaje pea-ai monacuanaja piquiyasijjeyee.

Currently Selected:

APOCALIPSIS 14: ESE

Highlight

Compare

Copy