FILIPENSES 1

Ebionei esohui queapame acapoa Pablohua

1Eya Pablo, Timoteo pea-ai ecuana Jesosa Quitojo chacochacopoquianitii. Jiquio esohui eyaya onijje aniya tehueaña miquianajaya, joya ciudad Filipos meshijo ba'eca Eyacuiñajjija'yo poanicuanaja ebajji. Miquianaya Jesosa Quitonijje ojee nequi ojaya'yo bacani ohuaya. Coma meshijoya miquiana Jesosaja epeejjicuanajaahuanapoquiajji etii poanija ebajji, joya Jesosaja epeejji aema'pishana ba'emeesahuajji poanicuanaja ebajji pea-ai eyaya jiquio esohui tehueaña. 2Eyacuiñajji eseja Chii-aiya, Emeshimesenei Jesosa Quitohua pea-ai miquiana queapamenee ca-acapoquiahuatii ojayanei ejjashahuabaquijjijo, queaquijijjijajinee capomeecahua quiana pea-ai ohuaya.

Pablo mimiapoa Eyacuiñajjinijje Filipos meshijo ba'eca Jesosaja epeejjicuanajo

3E'e, eyaya miquiana shahuabamajje Eyacuiñajji bihuiaña miquianaya queaja'a ba'epoquianijo. 4Eya queabihuitii mimipoquiani Eyacuiñajjinijje miquianajo. 5Miquianaya enijje chacochacopoquianitii. Esohui queapame Quitojo peacuana huohuimeesahuaquinaje quiaa. Jesosajo jjashahuabaqui'yojeahuaa, jjeyanei pea-aiya miquiaaya eya asahuapoquiañatii. Majoya eyaya Eyacuiñajji bihuiapoquiaña miquiana jama poani enijje bamajje. 6Ecuea ebanei Eyacuiñajjiya miquiana pea jjashahuabaquime eyacua eba'epoqui'yojji pomeecanaje miquianaja eyamiquipajje. Ohuaya quiana majjeya jjashahuabameequicapoquijetii queaca'a etiipoquijji Jesosa Quito poeo'oyajo. Ma pojjajotiiya Eyacuiñajjiya quiana apoa queaca'a etii epo ba'e bacaje. 7Eya miquianajo queabihuitii jjashahuabamajamajaquipoquiani. E'ejojonei ecuea quiana queajeanee. Jama jjashahuabaquimeya eya poani miquianajo miquiaaya eya queahuiso Eyacuiñajjija echacojji asahuapoquiañajojoya. Ma echacojji yajjiya eya Eyacuiñajjiya babacacapoa ojayanei ejjashahuabaquijjijo. Jamajjeya eyaya ejeanobia jaa, ecuayaqui'yo nequiya pea-ai sohuihuohuipoquiajetii cuana Eyacuiñajjija esohui queapame Quitojo. Dejja etii poani cojjaneijo nequimajje pea-ai eyaya queaja'a oja esohui huohuije, ojaya eshajja-ajjataijji pojjeama poaje. 8Eyacuiñajjiya eya bacapoquianitii eya siajje po-ajja jama poajoya ecuea quiana queajeanee poani. Jiquio ecua Jesosa Quitohua miquiana queajeanee acapoquiani, jama pea-aiya ecuea quiana queajeanee. 9Jamajjeya eya Eyacuiñajjinijje mimipoquiani miquiananijje ba'ecacuana miquianaja queajeaneetii eapoquiajjijo. Miquianaja queaja'anee ebajjijo achepamenee, acheca'anee Eyacuiñajji nequipoquianitii eya majo mimipea-aipoquiani. Ache queapame, ache queamimishi poani miquianaja ebajjijo eya mimipea-aipoquiani. 10Majoya quiana jjabaquije ache ejjashahuabaquijji queapamenee poani miquianaja ehuanajji esapajo. Jama pomajjeya miquianaya queapame mimishiama ba'epoquije. Majoya quijje Jesosa Quito poeo'oyajji epojja poeyajo o cojjaneijo nequije. Miquianaya queapame ba'epoquinaje, pea queamimishi pomeejjima ba'epoquinaje pea-ai bacaje ohuaya. 11E'ejojonei oenei Jesosa Quitohuaya quiana queapame ba'emeesahuacapoquije queajjajjahuiso jayojja eba'epoquijji. Majoya miquiana jama queapame ba'epoquiani bamajje queahuisocuaa Eyacuiñajji queaca'aneetii queasajajanee nequipoquiani bacaje. Oya bihuiapea-aicaje cuaa.

Pablo Quitojoneitii jjashahuabaquipoquiapoa echacochacopoquijji ojo

12Jesosaja epeejji ecue dohuecuana jjo'icuana, eyaya jiquio esohui tehueaña miquianajaya queaja'a ebajji jiquio e queacamajanee pomeejji poanicuanajo eya Eyacuiñajjija esohui huohuimeejjima jjapomeequiajja. Bacue, e esohuijo jeanobiameecajo ca queahuisocuaa esohui queapame Quitojo shajja-ajjacanaje. 13Romano emeshimeseja equi-ai queyajji poani soldadocuanaja, ma peacuana jiquiojo anija pea-ai eshajja-ajja poanaje ecue huohui eya jeanobiameecanaje etiicuaa Jesosa Quitojo chacochacoanijojoya. 14Mahuisonei pojjeama. Eya Eyacuiñajjija esohuijo jeanobiameecanaje shajja-ajjamajje queahuiso eseja dohue Jesosaja epeejjicuaa oja esohui jjeya huohuicani meteamaa. Ma Jesosaja epeejjicuana jjabaquiani Emeshimeseneiya oya queaca'a pomeecapoquiani oja sohui huohuiquijji epojji.

15Bacue, becacuaa esohui Quitojo huohuicani jamatii queaqueneya queahuiso eque jjachichaquiani bamajje. O shajja-ajjajji ca oepojji jjachichaquiani ohuaya bacanaje. Pea esohuihuohuijji poanicuaa ca queapame jjashahuabaquimajje queaja'a sohuihuohuicani cuana queneamaa. 16Coma dejjacuaaya esohui huohuicani ojaya e queajeajojoya. Ojaya eba Eyacuiñajjiya eya yahuajo nequimeecapoa oja esohui queapame Quitojo huohuipoquiajji epojji. 17Pea esohuihuohuijji poani dejjacuana ca jama pojjeama poani. Oyatii queapame poani peacuanaja ebajji esohui huohuicani e botiamanei nequiya. Eya jiquiojo ejeanobia jaa queayenonee epomeejji nisho a-ajjacani coma dejjacuaaya. 18Jamatii eya majo yenoyenoajja. E'e pojja'a queaquenepishana nequiya huohuicani cuaa esohui Quitojo e asahuasapo-ajja nequiya. Peaa ca enijje chacochacoaniya esohui Quitojo huohuicani. Jamatii eya queabihuinee poani onijje esohui queapame Quitojo ohua huohuicanijojoya.

E'e, majoya eya queabihui poani. 19Ecuea eba quijje eya huoojeacuayameecaje'yo etiicuaa miquianaya Eyacuiñajjinijje queahuiso ejo mimipoquianijojoya. Jesosa Quitoja Edojjoshahuapameya eya jiquiojo ani cuayameesahuaquicaje'yo. 20Yahuajo eya Eyacuiñajjija esohui ehuohuijji meteama poa. Jjeya pea-ai Quitohua eya meteama pomeecaje jjabaquiani peacuana sohuihuohuijji. E eshe nequijo, e mano'yajo pea-ai queahuisocuaa Quito bihuiacani ecuea eba'ejjijo eya shajja-ajjasapoani. 21Bacue, eya eshe nequi so'o queaja'a ba'epoquije Quito queabihuitii enequipoquijji ejo. Quijje eya mano'yomajje Quitonijje anije'yo. Majoya ca eya queapamenee poaje'yo. 22Eya jiquio meshijo eshe nequi so'o chacochacopoquijetii Eyacuiñajjija esohuijo. Majoya eyaya queahuisocuana sohuihuohuipoquiaje. 23Eya jjashahuabaqui beca poani. Oe jjashahuabaquime poani ba'a: Eya poqui'yosapoani Quitonijje ani'yohua. Majoya eya queabihuineetii nequije'yo onijje. 24Pea ejjashahuabaquijjijo ca eya jama poani ba'a: Miquiana sohuihuohuijji epojji pea chama'. Jamajjeya eya jiquio meshijotii nequipoquisapoani so'o miquiana sohuihuohuijji epojji miquiana queaja'a ba'epoquijjijo. 25Ecuea eba eya jiquio meshijo eshe nequije so'o miquiana queaca'a tiimeesahuajji ojaya esohuijo. Miquianaya queabihui Eyacuiñajjija esohuijo ejjashahuabaquipoquijji pea-ai eya nequije so'o jiquio meshijo. 26Quijje eya poquije o'oya miquiana ba'yohua. Majoya queabihuineeya Jesosa Quito bihuiaje quiaa ecuea esohuijo queaca'a tiipoquiani jjabaquimajje.

Eyacuiñajjija esohui jayojja ba'ecapoquijji

27Bacue, miquianaya Quitoja esohui queapame jayojja e'ejojonei ba'ecapoquijji, siajje pojjeama. Eya miquianaque poquimajje, e mipoquiajo pea-ai miquiana oya jjashahuabaquime oja esohuijo poani shajja-ajjasapoani. Miquianaya ojee queaca'a tiipoquiani eya shajja-ajjapea-aisapoani. Soldadocuana ejjaquecuaquijji ojee queaca'a nequiani jama pea-aiya quiana ba'ecapoquijji Eyacuiñajjija esohui queapame Quitojo huohuipoquiajji epojji. 28A'a joya Eyacuiñajjija esohuijo miquiana botiamanei ajji poanicuanajo queamete pojji. A'a quea-oyajja ba'ejji. Miquiana meteama poani bamajje Eyacuiñajjiya oya queaneeneetii pomeecaje'yo oja mimishijo coma dejjacuanaya jjabaquije. Miquianaya ca bacaje cuaa Eyacuiñajjija queaneeneetii epomee'yojji pojjeama poaje. Jamaya quiana Eyacuiñajjiya bacapoquijetii. 29Eyacuiñajjiya miquiana queapamenee acanaje Jesosa Quitojo ejjashahuabaqui'yojji. Mahuisojonei pojjeama quiana queapame acanaje. Miquiana queacamajanee pojji, queanee pojji pea-ai huoojeacaje ohuaya oja echacojji miquiaaya añajojoya. Jama miquiana poajo Quito queabihui poaje. 30Jamajjeya eseya ojee queaca'a epopoqui soldado ejjaquecuaquijji poani jamaya oja esohui queapame peacuana huohuiquijji. Miquiaaya esohui yahuajo shajja-ajjanaje eya queaca'a nequinaje oja esohui peacuana huohuiquijji. Jjeyanei pea-ai eya queaca'atii nequipoquiani soldado jama.

Currently Selected:

FILIPENSES 1: ESE

Highlight

Compare

Copy