MARCOS 11

Jesosa Jerusalén meshiyasijje poquio'oyapoa

(Mt 21.1-11; Lc 19.28-40; Jn 12.12-19)

1Majoya aje quijje Jesosa Jerusalén meshi iyehueshanei nequijo Betfagé meshi, Betania meshi pea-aipejjejo nequiñaquiapoa eyiyoiyeao Olivos bajjani nequi quibopejjejo. Majoya Jesosaa beca o shajja-ajjajji poanicuana huoojeacapoa Betania meshiyasijje. 2Jesosaa oya jama acapoa ba'a: —Poquicue so'o Betania meshiyasijje. Majoya bañaquije oe mapichisho'i ejeyo nequi pea dejjaja oja edaasa eanijji ajjima'. Oya pichojeamajje yecue quiaa jiquiacua. 3Majo anicacuaa jama acajje ba'a: “¿Apiojji acuaeya mapichi pichonaje?” ohua jama acajje jama acue quiaa ba'a: “Emeshimeseneiya oya sacani. Quijjepishana aje jeahuaje'yo.” Jamaya oe acue cuana.—

4Jamajjeya ma beca dejja poquiapoa ma mapichisho'i baa. Majoya oya equiquibojo esecuepejjejo ejeyo nequi bacañaquiapoa. Oya pichocapoa cuaa edojojji.

5Majotii nequiya dejjacuaa oya huohuiajjacapoa jama ba'a: —¿A'ya miquiana poequi comajo? ¿Apiojji acuae quiaa mapichisho'i pichojeaña?—

6Majoya saja-acapoa cuana ma o Jesosaa jama ojaya yajji esohui acanajejo. Jamajjeya mapichisho'i dojomeecapoa cuaa. 7Majoya aje Jesosa shajja-ajjajji poani beca dejjaa mapichisho'i Jesosaque dojocapoa. Oja daqui huijeamajje mapichisho'ija daasabiajje iyacapoa Jesosa quii-anijji. Majoya Jesosa anisohuaquiapoa oja daasabiajje epoquijji. 8Ma meshijo queahuisoneecuana jjachichaquicapoa Jesosajo. Cua Jesosa poquijejje oja huosho ba'e daqui-ao huanacapoa cuaa ejeojjijo o queapame bihuiajjequijji. Peacuaa ca jememeiña jayojja jajasejjacapoa ejeojjijo ehuanajji pea-ai.#11.8 Nota: Jamaya yahuajonei acapoa cuaa emeshimese poeje ja'ajjequijji`o queajea ajjequijji.* 9Queahuisoneecuana poquicapoa Jesosanijjetii. Ma ehuinei poquicapoacuana, ma o quiijje poquicapoacuana pea-ai oya esohui taaacapoquiapoa janobajjimanei jama ba'a: —Jiquio Jesosa queapameneenee Eyacuiñajjija bajjanijo poe. Eyacuiñajji ejjabihuiaqui. 10Jiquio ma ecua yahuajonei esejaya etiiquiana David dejja eseja emeshimese queaca'anee nequianinaje jama pea-aiya oya poaje'yo. Eyacuiñajji Eyajo nequiya oya nequimeecaje queaca'a emeshimese epojji. Eyacuiñajji ejjabihuiaqui— jama taaame poa cuana ojo.

11Majoya aje Jesosa Jerusalén meshi bañaquimajje Eyacuiñajjija equi-aiyasijje nobiquiñaquiapoa. Oya eyiyejo nequi huajjabajeacaaqui ponequiapoa. Majoya cuayaqui'yapoa oja babaca dejjacuana docenijjetii. Betania meshiyasijje poquio'oyapoa siñajo.

Jesosaa acui higo jjajjama' enequi'yojjijo huohuicapoa

12Majoya aje mecahuajje Jesosa Betania meshijo nequi poqui'yomajje queashoe poaje jjabaquiapoa. 13Jesosaa poqui'yaniya oe acui higo bajjani ñajji queahueshapishana nequi bacapoa. Majoya oya poechipiapoa a'a ma acui jjajjajji baa. Chama' ejjajja poa, iñanei bacapoa o jjajjajjinei ba'i pojjeama poajojoya. 14Majoya ohuaya Jesosaa acui higo bajjani jama acapoa ba'a: —Miya jjajjama'tii nequije. ¡Chama' pea poaje mi jjajja ijjiahuajji epojji!— O shajja-ajjajji poanicuaa Jesosa mimije acuijjajjajo shajja-ajjacapoa.

Jesosaa dejjacuana aquiana quiapoequi huoojeacuayajeacapoa oja Chiija equi-aijo ani

(Mt 21.12-17; Lc 19.45-48; Jn 2.13-22)

15Majoya aje quijjepishana Jesosa Jerusalén meshi bañaquio'oyamajje nobiquiñaquio'oyapoa Eyacuiñajjija equi-aiyasijje. Ma equi-aiquiquibojoya Jesosaa dejjacuana ehuonecuana quiapoequi enaa jehui'yojji huoojeacuayajeacapoa. Pea bejjo sosejje jjeshejji poanicuanaja bejjo jaajji mesa jeapajjajeacapoa Jesosaa, huia' quiapoequicuanaja equii-anijjicuana pea-ai. 16Eyacuiñajjija equi-aiquiquibojje aquiana dojomeenequijjima acapoa cuana Jesosaa. 17Majoya jama amajje Jesosaa dejjacuana sohuihuohuicapoa ba'a: —Eyacuiñajjija esohui etehue jama poani ba'a: Jamaya Eyacuiñajji poani oja equi-aijo: “Ecuea equi-ai enijje emimipoquijji ojjañajaajjicuanaja ani.” Miquiaaya caca oe ecue equi-ai siipojji enequijji anaje.— Jamaya Jesosaa acapoa cuana.

18Jesosaa esohui jama huohuime acani shajja-ajjamajje Eyacuiñajjija equi-aijo chacochacopoquiani etii poanicuaa, Moisesja tehuehuohuijji poanicuaa pea-ai Jesosa quecuapanacapoa quehuajje. Queamete poa cuana o quecuamee'yojji majonei queahuiso judiocuaa Jesosaja esohui shajja-ajjaneineisa-acanitiijojoya. 19Majoya siñajo Jesosa o shajja-ajjajji poanicuananijje Jerusalén meshijo ani poquiapoa cahuiya.

Acui higo jjajjama'tii nequi, yaa'yapoa

(Mt 21.20-22)

20Majoya aje mecahuajje mecajjeahua Jesosa o shajja-ajjajji poanicuananijje acui higo nequipejjejje jjayejjequio'oyapoa. Bacapoa cuaa oya acui eyaa'yo nequi iñama'yo. 21Pedrohua shahuabacapoa ma Jesosaa oya esohui acanaje jjajjama' epo'yojjijo. Jama oya poa Jesosanijje ba'a: —Esohuihuohuijji, bacue jiquio acui higo ma yahuajopishana miya esohui anaje o jjajjama' epo'yojjijo. Jjeya ca yaananacuaji'yonaje.—

22-23Jesosaa oya jama acapoa ba'a: —Eyaya miya e'ejojonei huohuiaña. Eyacuiñajjijonei e'ejojonei jjashahuabaqui'yocue. Majoya cua dejja eyiyonijje mimije o nobiquijjijo bae-aiyasijje oya Eyacuiñajjijo e'ejojonei jjashahuabaqui'yanijo, eyiyo bae-aiyasijje nequinobiquije'yo. Eyacuiñajjiya jamaya ameecaje onijje mimiajo. 24Jamajjeya ojjaña cua miya saña huisotiijo Eyacuiñajjinijje mimicue. Jjashahuabaqui'yocue ojo ohuaya mique mimi jayojja acaje mi quiajji. Majoya cua miya saña huisotii ohuaya e'ejojonei quiacaje. 25-26Eyacuiñajjinijje mimianijo ebionei jiquio mi queatai ajji poanaje oja mimishi pajea'yocue. Majoya Eyacuiñajji Echii-aiya Eyajo nequiya miquianaja mimishicuana pajeapea-aicaje'yo.—

Jesosa Eyacuiñajjija huoojea queaca'anee oyatii pojjeama poeapoa

(Mt 21.23-27; Lc 20.1-8)

27Majoya aje Jesosa o shajja-ajjajji poanicuananijje poquio'oyapoa Jerusalén meshiyasijje. Jesosa Eyacuiñajjija equi-aiquiquibo nequijo Eyacuiñajjija equi-aijo chacochacopoquiani etii poanicuana, Moisesja tehuehuohuijji poanicuana, pea judío etii poanicuana pea-ai Jesosaque jjanequichipiquiapoa o huohuiajjaa. 28Jama huohuiajjame acapoa cuaa ba'a: —¿Ajea esohuijo acuae mi poeyanaje jiquiacua ona sohuihuohuiya, jiquio ehuone quiapoequicuana jeacuayajeaa pea-ai? ¿Ajea huoojea acuae mi?—

29-30Jesosaa saja-acapoa cuana jama ba'a: —Ebionei eyaya miquiana huohuiajjapea-aije. ¿Aya shai Juan ona iñajeanobiajji enaojjohuasijje poani huoojeacanaje, a'a dejjacuaa, a'a Eyacuiñajjiya pojja'a?—

31Majotii ani etii poanicuana onijje etii poanicuananijje oopana mimimimiapoa jama ba'a: —Eseyaya jama saja-ame ajo ba'a: “Eyacuiñajjiya oya Juan huoojeacanaje.” Jama saja-ame ajo ohuaya eseya jama acaje ba'a: “Jamajjeya ¿yajjajo shai miquiaaya oja esohui mishajja-ajjanaje?” 32Jamatii esejaya Juan Eyacuiñajjija huoojea pojjeama, oya ca dejjacuanaja huoojea poanaje ehuohuijji pojjeama— jama mimime poa etiicuana judiocuana queahuisoneenee yajjajo. Queahuisoneeneecuaa Juan bacapoa Eyacuiñajjija huoojea ona sohuihuohuijji, jamajjeya judío etiicuana queaquenenee pomeesapo-ajja poa cuana. 33Ojee mimijeyomajje etii poanicuaa Jesosa jama acapoa ba'a: —¡Ecuanaja bajjima, ajea huoojea shai poanaje Juan ona iñajeanobiaa enaojjohuasijje!—

Jamajjeya Jesosaa dejja etii poanicuana saja-acapoa jama ba'a: —Miquianaja bajjimajo ecuea ehuohuijji pojjeama pea-ai poaje ajea esohuijo jiquio ehuone quiapoequicuana Eyacuiñajjija equi-aiquiquibojo ani huoojeacuayajeanaje.—

Currently Selected:

MARCOS 11: ESE

Highlight

Copy