MATEO 2
2
Dejjacuana quesapaja'anee majametacuana baneijji poani poeapoa Jesosa baa eshequi jaasohuanimijijje
1Jesosa cuayapoa pueblo Belén provincia Judea meshijo. Herodes emeshimese enequiahuajo oya cuayapoa. Majoya aje quijjepishana dejjacuana queasapaja'a majametacuana baneijji poani poeapoa ciudad Jerusalén meshiyasijje eshequi jaasohuanimijijje. 2Jama huohuiajjame acañapoa cuaa emeshimese Herodes ba'a: —¿Achacua jaa judiocuanaja emeshimese epojji ma jjeya cuayanaje? Eshequi jaasohuanimiji eyajje oja majameta-ai jaasohuaje ecuaa queaja'a banaje. Jamajjeya ecuana jjeya poeyanaje o bihuiaa.—
3Ma dejjacuana queahueshanee poe jama mimime poñajo emeshimese Herodes queametenee jjashahuabaquinanapoa. Oya jayojja pea-ai queametenee pocananapoa Jerusalén meshijo ba'ecacuana oja esohuijo. 4Jamajojoya aje emeshimese Herodesya Eyacuiñajjija equi-aijo chacochacopoquiani etii poanicuana, Moisesja tehuehuohuijji poanicuana pea-ai iyaameecapoa ejjachichaquijji ehuohuiajjajji cuana. Jama huohuiajjame emeshimeseya acacuanapoa ba'a: —¿Achacua, ache meshiyasijje shai Quito, Eyacuiñajjija huoojea ojjaña nahue'yojji epojji, cuayaje?—
5Oya Herodes saja-acapoa cuaa jama ba'a: —Eyacuiñajjija esohui etehue jaa jama poani: “Oya cuayaje pueblo Belén provincia Judea meshijo.” Jamaya oja esohuihuohuijji poa dejjaa tehuecapoa.
6Oja esohui jama tehueme acapoa yahuajonei ba'a:
“Pueblo Belén provincia Judea meshijo ani che bisonei meshi ani eba'ejji cuanaja.
Jamatii Belén queapamenee bacaje cuaa oe Emeshimesenei epojji majo cuayajejojoya.
Ohuaya ecue babaca Israelcuiñajjicuana jaahuanacapoquije” jamaya oja tehue poani—
jama huohuimeya acapoa cuaa Herodes.
7Majoya aje Herodesya ma dejjacuana queahuesha poe queasapaja'a poani oopana quehuajje iyaacapoa ehuohuiajjajji. Jama huohuiajjame acapoa cuana ba'a: —¿Acheshono quiaa oja majameta jaasohuaje bacoonaje?— Majoya dejja queasapaja'aneeya Herodes huohuicapoa acheshono majameta jaasohuaje bacoocanaje. 8Emeshimeseya dejjacuana queasapaja'a jama apea-aicapoa ba'a: —Belén meshiyasijje poquisocue ebacua achacua jaa ba-ajjaneiya. Oya ebacua majo jaa bamajje eya huohuiña'yocue achacua oya jaa e cuamaya epoquipea-aijjiya o bihuiaa ecuioshajjajo nequiya— jamaya Herodes ponishoapoa onijje ma ebacuajo.
9Jamajjeya dejjacuana queasapaja'a cuamaya poquiapoa emeshimeseya esohui jama huohuime acajje. Oja majametaa eshequi jaasohuanimijijje nequiya, ma ohua bacoocanaje majametaa, huidojocapoquiapoa cuana. Ma meshijotiiya majameta nequiñaquiapoa ebacua jaa equi anijamacoo cojjanei. 10Majameta equi anijamacoojo jijiquitii bamajje queabihuinee poa cuana. 11Majoya equiyasijje nobiquimajje María oja bacuasho'ijji ani bacapoa. Majo ebacua jaajo oja ecuioshajjajo nequiñapoa cuana o bihuiañajji. Oja ye aquianacuana ebacuaja yajji jjequicuayacañapoa pea-ai. Oya jama quiacapoa ba'a: oro, edahuashiyejji incienso bajjani, shiyeshiyeca'a mirra bajjani pea-ai. Jamaya oya quiacapoa dejja queasapaja'acuaa. 12Majoya aje quijjepishana Eyacuiñajjiya ma dejjacuana epoe ani jjacahuibameequicapoa ehuohuijji o Herodesque poquio'oyajjima epojji. Jamajjeya pea ejeojjijje poqui'yapoa cuana oja meshiyasijje emeshimese Herodes baqui'yojjimatii.
Ebacua Jesosa quehuadojocapoa Egipto meshiyasijje
13Majoya aje dejjacuana queasapaja'a majametacuana baneijji poani poqui'yajo, oe Emeshimeseneija ángel jjaja'aquiapoa José ecahui jaajo. Ohuaya José jjacahuibameequicapoa o huohuijji jama ba'a: —José, nequisohuacue. Ebacuasho'i, oja nae pea-ai quehuadojocuajicue Egipto meshiyasijje. Cuamaya aniquisocue ecuea miya quijje ehuohuijji mi poe'yojjijo. Jjeya emeshimese Herodesya ebacuasho'i sa-ajjacaje equecuajeamee'yojji— jama huohuimeya acapoa ecahuijaa José.
14Jamajjeya ma mecajjetiiya Joseya anisohuamajje ebacuasho'i, oja nae pea-ai quehuadojocuajicapoa ejeojjijje Egipto meshiyasijje epoquijji mecajjetii. 15Majotiiya Egipto meshijotii oya aniapoa emeshimese Herodes eshe nequijo. Jamaya ebacua Jesosa quehuadojocuajicapoa ma ecua yahuajonei Eyacuiñajjija esohuihuohuijji poa dejjaa yajja oya acaje tehuecapoa jayojjaya. Emeshimesenei jama poaje yahuajonei tehuecapoa jama ba'a: “Ecue Bacuaejja iyaa'yonaje oya Egipto meshijo ani ecuayaqui'yojji.”
Emeshimese Herodesya ojjaña ebacua dejjasho'icuana quecuajeameeca'yapoa
16Majoya aje emeshimese Herodes dejja queasapaja'acuaa esohui anishocanaje oque epoeo'oyajjijo jjabaquimajje queaquenenee poa. Jamajojoya aje ohuaya emeshimeseya ojjaña ebacua dejjasho'icuana jjeyanei cuaya, tres años ajjima'cuana pea-ai Belén meshijo anica quecuajeameejeyoca'yapoa. Ma meshichipineijo ba'ecacuanaja ebacua dejjasho'i pea-ai quecuajeajeyoca'yapoa oja soldadocuaa. Matiineiya ebacua dejjasho'i ohuaya quecuajeameejeyoca'yapoa dos shequiajame huiso ejjayejjequi dejja queasapaja'acuaa oja majameta bacoocapoajojoya. 17Jamaya quecuajeajeyoca'yapoa ebacuacuana ma ecua yahuajonei esohuihuohuijji poa dejjaa Jeremías bajjaniya tehuecapoa jama jayojjaya.
18Ohuaya tehuecapoa esohui jama ba'a:
“Ramacuiñajjicuana acheyenoneenee pani shajja-ajjacanaje cuaa.
Raquelja osecuacuana queayenoneenee pocanaje oja bacua dejjasho'icuanajo.
Chama'nei poanaje esohui o yenoama epomee'yojji
oja bacuacuana ojjaña equecuajeajeyo'yojojoya.”
Nazaret meshiyasijje huacuaya poe'yapoa José, María pea-ai ba'eyohuaya
19-20Majoya aje quijje emeshimese Herodes mano'yajo oe Emeshimeseneija huoojea ángel jjaja'aquiapoa José Egipto meshijotii nequijo. Oya jjacahuibameequicapoa ehuohuijji jama ba'a: —Nequisohuacue, jja-aqui'yocue huacuaya epoqui'yojji Israel meshiyasijje. Ebacuasho'i, oja nae pea-ai dojo'yocue cuamaya. Ma mique bacuasho'i quecuajeamee'yojji nisho poanaje dejjacuana mano'yonaje— jamaya poa ángel onijje.
21Jamajjeya José anisohuamajje jja-aqui'yapoa epoqui'yojji huacuaya Israel meshiyasijje. Ebacuasho'i, oja nae pea-ai dojoca'yapoa onijjetii. 22Joseya shajja-ajjacapoa Arquelao bajjani dejja oja chiija ejjocojo nequi'yani emeshimese epo'yojji. Jamajjeya José queamete poa cuamaya provincia Judeahuasijje eba'equio'oyajji. Jamajojoya aje Eyacuiñajjiya José jjacahuibameequicao'oyapoa ehuohuijji oya pea meshiyasijje epoqui'yojji. Jamajjeya oya poqui'yapoa provincia Galilea meshiyasijje cuama ba'e'yohua. 23Majoya provincia Galilea meshi bañaqui'yomajje pueblo Nazaret meshiyasijje aniñaquiapoa majotii ba'e'yohua. Jamaya Jesosa ba'yapoa ma meshijotiiya ma ecua yahuajonei esohuihuohuijji poa dejjacuaa tehuecapoa jama jayojjaya. Jama tehueme acapoa ba'a: “Oya Eyacuiñajjija huoojea Nazaretcuiñajji dejja poani. Jamaya mimiani cuana ojo.”
Currently Selected:
MATEO 2: ESE
Highlight
Share
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006