HEBREOS 2

Eyacuiñajjija esohui Quitojo ejjanahuemeequi'yojji pajeaca'yoajja

1Jamajjeya esejaya jjeya baneineicapoquijji Eyacuiñajjija esohui ma eseya shajja-ajjanaje esohuiya queaquehua ejjashahuabaqui'yo poanijje. Jiquio ecua beniya bishe' jeyojjima ba'e huapahuasijje cuiayiyejeacani jama jayojja epo'yo poanijje esohui baneineicue. 2Eyacuiñajjija esohui ma yahuajonei oja angelcuaa Moisés tehuemeecapoa esohuicuanaya queaca'atii jaapoquiani, pea ya'yojji pojjeamatii poani. Ma esohui oja tehuecuanajo jjashajja-ajjatiiquipoquiajja poa cuana Eyacuiñajjiya queaneenee pomeecapoa oja mimishi sosejje. 3¿A'a shai se che jamatii ojo jjanahuemee'yoquijjima ba'e ohuaya queaneenee pomeecuaji'yojjima acame eseja mimishijo? Chojja, chama'nei se jama epojji ojo. Emeshimeseneiya ohuayatiiya ebionei jiquio esohui huohuicoocapoa ojo ese ejjanahuemeequi'yojji. Majoya quijje ma o shajja-ajjajji poacuaa oya esohuitiiya e'ejojonei poani huohuipea-aicapoquiapoa cuana. 4Majoya Eyacuiñajjiya oja quia esohui e'ejojonei poani ojjañacuanaja ebajji dejjaja ajjima'neineicuana ameecapoquiapoa o jjashahuabameequijji. Oja Edojjoshahuapameya ma dejjacuana queaca'a pomeecapoa Eyacuiñajjija echacojji queapame eapoquiajji queahuisocuanaja ebajji oja esohui e'ejojonei poani. Jamaya queaca'a pomeecapoa cuana ojayanei ejjashahuabaquijjijo.

E'ejojonei Jesosa dejjapojji poa oja chahuacuana jayojja

5E'ejojonei Eyacuiñajjiya meshi eyacua panacaje'yo. Eyacuiñajjija angelcuana ma quijje ohua panacaje'yo meshi eyacuajo etii epojji pojjeama nequicaje'yo. 6Bacue, Eyacuiñajjija esohui yahuajonei etehue jaa jama poani ba'a:

“Dejjacuana nequitiitiipoquiajja, ca'a-ama, jamajjeya

¿apiojji miya Eyacuiñajji poani dejjajo jjashahuabaquipoquije?

¿Apiojji dejjacuana miyaya shahuabamajamajapoquiaje o queapame asahuapoquiajji?

7Ebionei miyaya dejjacuana iyeca'a epojji nequimeenaje so'o

miquea angelcuana jama pea-ai epojji pojjeama.

Angelcuana ca queaca'apishana nequica.

Majoya quijje miyaya dejjacuana queaca'a epojji nequimee'yonaje ojjañacuanaja oya ebajji pea mique panacuana jama pojjeama, dejja ca queapamenee.

8Jamajjeya dejjacuana ojjaña mique panacuana huoojeapoquiajji epojji nequimee'yonaje miyaya”

jama tehuemeya acapoa.

Jamajjeya dejjacuana jama epo'yojji Eyacuiñajjiya pomeecajo chama'nei poaje oja panacuana jamatii enequijji dejjaja huoojeajjima. Jamatii esejaya bajeyojjima so'o ojjaña oja panacuana dejjaja esohuijo jjashajja-ajjaquipoquianitii. 9Jesosajo caca oe jjashahuabaquisocue. Iyeshequiajahuiso jiquio meshijo nequi Eyacuiñajjiya oya nequimeecapoa iyeca'a epojji dejja jama oja angelcuana jama pea-ai queaca'a epojji pojjeama. Majoya quijje Eyacuiñajjiya oya queaneenee ameeca'yapoa ojjañacuanaja mimishijo. Ojjaña eseya queapamenee acapoa ojayanei ejjashahuabaquijjijo, jamajjeya oja huoojea Jesosa manomeeca'yapoa ojjaña esecuanajo. Jjeya ca Eyacuiñajjiya oya queaca'aneetii queasajajanee nequimeecapoquiani ojjañacuanaja oya jama poani ebajji.

10Eyacuiñajjiya ojjañatii oja panacuana jiquio meshijo anica eyajo nequica pea-ai nequimeecapoquiani queapame oyatii enequijeapoquijji pojjeama. Eyacuiñajji jjashahuabaquianitii queahuisoneecuana nahue'yojjijo. Majoya ojjaña oja nahue'yocuana oja bacua poanicuanaya ohuaya onijje nequimeecaje'yo Eyahuasijje ma o queaca'aneetii queasajajanee nequiyasijje quijje. Jamajjeya Eyacuiñajjiya Jesosa Quito queaneenee ameeca'yapoa oya apoa queapame pojji ese nahue'yojji. 11Bacue, ojjaña joya Jesosaa Eyacuiñajjija'yo epojji pomeecani huisotiicuana oya Chii-aijji pea-ai poani Jesosaja Chiijji pea-ai. Jamajjeya ojaya'yo poani bamajje Eyacuiñajjija Bacuaejjaa ojjaña macuana oja dohuecuana poani, oja jjo'icuana poani pea-ai bichoamaa acaje. 12Eyacuiñajjija esohui yahuajonei etehue jaa Jesosa Quito jama poaje quijje ba'a:

“Eya mimije ecue dohuecuananijje mijo ojaya ebajji miyaya queapameneetii apoquiaña cuana.

Majoya ecue dohuecuana ejjachichaqui anicajo eya sohuicuayaje onijje ojee mi Eyacuiñajji poani bihuiajji”

jamaya poaje quijje.

13Jesosa Quito jama pea-ai poaje quijje ba'a:

“Eya Eyacuiñajjijotii jjashahuabaquipoquije.”

Jama pea-ai poaje ba'a:

“Quijoya iña ani Eyacuiñajjija bacuacuananijje ma ohua e quiacanajecuananijjeya”

jamaya poaje quijje.

14Jiquio ecua dejjacuanaja jea oja bacuacuana oya jayojja pea-ai yamime poani, jama pea-aiya Jesosa dejjapojji poa yamijji, najji. Majoya oya jjaquiaquiapoa emano'yojji joya edosiquiana queaca'a ese manomee'yojji poani ca'a-ama pojeamee'yojji. 15Majoya Jesosaa mano'yomajje ojjaña joya queametenee ba'epoquianicuana o mano'yojjijo yenoama pomeeca'yani. Edosiquiana ebionei eomese poajo quea-omano'yojjiyajjanei ba'epoquiapoa cuana. Jjeya ca o mano'yojjijo yajjajja-ama ba'epoqui'yani cuana. 16Bacue, Jesosa ma angelcuana queaquehuanee jjashahuabaquiapoa nahue'yohua pojjeama poeapoa. Oya caca oe Abrahamja osecuacuana nahue'yohua poeapoa. 17Jamajjeya ojjaña nahue'yojji epojji Eyacuiñajjiya Jesosa Abrahamja osecuacuana jayojja epojji pomeecapoa. Jamaya Jesosa pomeecapoa yamijji oya Eyacuiñajjijo echacochacopoquijji ebionei etii epojji quijje. Majoya oya emimipoquijjitii Eyacuiñajjinijje poaje oja epeejjicuana queaja'a ba'emeesahuapoquiajji. Oya queayenonee poaje oja epeejjicuana queacamajanee ba'e bamajje. Jesosa dejjapojji poa ojjañacuanaja mimishijo emano'yojji ojjaña eseja mimishicuana Eyacuiñajjija ecuijea'yojji. 18Jesosa jiquio meshijo nequi queacamajanee ba'epoquiapoa. Eshahuaa oya queamimishi epomeejji nisho a-ajjacapoa pea-ai. Jamajjeya jjeya joya eshahuaa oja epeejjicuana queamimishi pomeesa-acani Jesosaa queaca'a ba'emeesahuacapoquiani.

Currently Selected:

HEBREOS 2: ESE

Highlight

Compare

Copy