GÁLATAS 6
6
Peacuananijje queapame pocue, oya asahuapoquiacue
1Jesosaja epeejjicuana, bacue. Miquianaya oe Jesosaja epeejji queamimishi poani bamajje onijje mimiquicue joya Edojjoshahuapamejo jjashajja-ajjaquijji poaniya. Onijje mimiquije o queaja'a jjashahuabameequio'oyajjijo. Queapame oe onijje mimiquicue queneama. Joya oque poquije Jesosaja epeejji poani coma dejjaya jjajaahuananeiquicajji oya jayojja pea-ai queamimishi epo poanijje. 2Joya miquiananijje ani Jesosaja epeejji queayeno poajo ojaya queacamajanee poeajo pea-ai asahuacue. Jiquio ecua dejjaa pea dejjaja aquiana queabiquie abosahuacani jama pea-aiya pea asahuacue. Jama pomajjeya miquiaaya ma Quitohua huohuicapoa esohuiya queapame apoquiaje oya jayojjaya.
3Joya oyanei queaca'a poani poso jjabaquijji comacuanaya queaquehuanee jjashahuabaquiani. ¡Oyaneitii jama poani ca coma ca'a-ama! Jamajjeya oyatii jjadasiaquiani. 4Ojjaña Jesosaja epeejjicuana jjabaneiquicajji ojaya eba'ejjijo achajja oya ba'epoquiani. Joya queaja'a ba'epoquianicuana queabihui pocajji ojayanei eba'ejjijo. Peacuana a'a queahueya, a'a hueya-ama baca-ajja. Jamajjeya ojayanei echacojo queabihui ba'ecapoquijji oya. 5Ojjaña Jesosaja epeejjicuanaja oja echacojjinei queaja'a ajeyocapoquijji Eyacuiñajjijo.
6Bacue, miquiana sohuihuohuijji poani dejja asahuacue joya o shajja-ajjajji poanicuaaya.
7¡A'a queaquehua jjashahuabaquijji! ¡A'a jjadasiaquipoquijji! Eyacuiñajji caca jjadasiameequiajjanei. Jiquio eshe ba'eya cua eseya apoquiaña echacojjicuana Eyacuiñajjiya bacanitii. Jiquio ecua cua dejjacuaa eso' banacani quijje oya jayojja sejjaca'yani oya jjajjaya jama pea-ai se ba'eje. Eyacuiñajjiya achajja eseya ba'epoquiani bacani. Eseya queaja'a ba'epoquiani bamajje ese queabihui pojji quiacaje quijje Eyacuiñajjiya. Eseya queamimishitii ba'epoquiani bamajje se ca queanee pomeecaje ma sosejjeya. 8Ojjaña joya ojayanei ejjashahuabaquijjijo queamimishi ba'epoquianicuana ca'a-ama poaje esohuijo, becacuana ca manoje'yo. Jamaya oya poaje'yo ojaya eba'ejjijo. Ojjaña joya Edojjoshahuapameja ejjashahuabaquijji ajji poanicuana ca ba'etiitiije'yo Eyacuiñajjinijje. Jamaya oya poaje'yo ojaya eba'ejjijo. 9Jamajjeya se oe a'a hueyahueya-ajjajji queaja'a eba'epoquijji. Queapametii oe ba'epoquicue. Majoya Eyacuiñajjiya ese queabihui pojji quiacaje quijje ese queaja'a ba'epoquinaje sosejje. Jiquio ecua dejjaa esejja'yo queaso'huiso ishoacani jama pea-aiya eseya poaje. 10Jamajjeya oe jjeya, quijje pea-ai ojjañatiicuana queapame apoquiacue. Esenijje Jesosaja epeejjicuana ca oe queapamenee apoquiacue pea-ai oya Eyacuiñajjijo eseja familia pea-ai poanijojoya.
Pablohua oe-ejjenei esohui tehuecapoa cuana
11Epeejjicuana, jiquio esohui etehue queaquemo jjeya eyaya tehueaña ecue emeneiya. 12Bacue, miquiana jjacuiishashajehuisejjameequijji huohuijji poanicuaa jamaya esohui huohuicani onijjejaajji judiocuana queaquene epo poanijje onijje, miquiana queapame asahuajjijo pojjeama. Peacuanaja oya napameejjima yajjijo esohui jamaya huohuicani coma dejjacuaaya. Quito mano'yapoa acui ecuiata'apeejo ojjañacuana nahue'yojji ohua esohui jama huohuicajo e'ejojonei oya napameecaje cuaa. 13Ma dejjacuanaya jjacuiishashajehuisejjameequiani jamatii ojjaña Moisesja tehuecuana jayojja ba'eajja. Ohuaya quiana jjacuiishashajehuisejjameequisa-acani. Miquiana cuiishashama' poani shajja-ajjamajje oyanei queapame poani jjabaquije macuanaya miquianaya oja esohuijo jjashajja-ajjaquinajejojoya. 14Eya ca iña jama pojjeama. Majo queapame poani eya jjabaquiajja. Jesosa Quito eseja Emeshimesenei acui ecuiata'apeejo mano'yapoa ese nahue'yojji esohuijoneitii ca iña queabihuinee poani, pea esohuijo pojjeama. Majotiiya eya jjashahuabaquipoquiani. Jamajjeya eya manopea-ai'yapoa acui ecuiata'apeejo Quitonijje jayojja ojjaña joya oma' jayojja poanicuana jama epo pea-ai poanijje. Onaja ejjashahuabaquijjicuana queamimishitii eba'ejji ca ecuea cajaa'yo. Ma dejjacuaaya eya cajaanei apea-aica'yani. 15Joya ejjacuiishashajehuisejjameequicuana, joya jjacuiishashajehuisejjameequijjimacuana pea-ai Eyacuiñajjiya oya jayojja pea-ai bacani. Majoneitii pojjeama eseya ojaya'yo poani bacani. Ojjaña joya jjashahuabaqui'yani huisotii Jesosa Quitojo caca oe Eyacuiñajjiya comacuana ojaya'yo eyacua poani bacani. 16Ojjaña quiana joya jiquio eya huohuiaña esohui jayojja ba'epoquiani queabihui queaquijijjijaji caba'epoquiahua. Eyacuiñajjiya quiana queapamenee ca-acapoquiahuatii. Jamaya Eyacuiñajjiya ca-acapoquiahuatii ojjaña joya ojaya epeejji e'ejojonei poanicuana.
17Mahuiso eyaya huohuinaje quiana. Queahuisocuaa eya queacamajanee, queanee pea-ai pomeecapoquinaje Jesosajo chacochacopoquianijojoya. Majoya ecuea eyami sijji poani. Jamajjeya jjeya, quijje pea-ai macuanaja eya queacamajaneetii apajeaca'yojji.
18Jesosaja epeejjicuana, eseja Emeshimesenei Jesosa Quitohua ojayanei ejjashahuabaquijjijo queapameneetii quiana ca-acapoquiahua. Mahuisoya jiquio ecuea esohui etehue.
Currently Selected:
GÁLATAS 6: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
