GÁLATAS 4

1Jiquio pea esohui ebameesahuajji eyaya huohuiaña miquianaja queaja'a ebajji. Echiimeseya oja bacua huohuicanaje quijje oja aquianacuana oja quijjojea ojaya epo'yojjijo. Oja bacua esho'i nequijo so'o ma ecua peacuana oja chiijo chacochacoanicuana jama pea-ai oja bacua poani jamatii oya quijje eojachiija-aquianacuanamese poaje'yo. 2Oja chiija nequimee dejjacuana o jaahuanajji poanija esohuijo oya jjashajja-ajjaquicajji jamatii oya oja bacuaejjanei poani. Majoya quijje oja chiiya oja bacua tiiajo o jaahuanajji poanicuana huoojeacaje'yo o jaahuanapajea'yojji. 3Bacue, oya jayojja pea-ai eseya ebionei poa. Yahuajo eseya Eyacuiñajjija esohui bapojjima'hua ba'e esho'i jamahua etiiquianaja esohuicuaa eseya queamete queamimishihuiso ba'emeecapoquiapoa. Oya ese huohuipoquiajji jayojja ebionei poa. 4Majoya quijje Eyacuiñajjiya apoa pomajje oja Bacuaejja huoojeacapoa jiquio meshiyasijje. Oja Bacuaejja cuayapoa oe eponajo dejja epojji. Oya ojjañatii Moisesja tehuecuana jayojjaya ba'epoquiapoa. 5Jamaya oya Dejjapojji poa ese jjeshe'yojji epojji. Moisesja tehuecuaa huohuicanitii ese queaneetii po'yojji eseja mimishijo. Majoya oya poeapoa ese jjeshe'yohua. Jamajjeya ojjaña eseya joya ojo jjanahuemeequi'yonaje huisotiicuana oja bacua etii pomeecani Eyacuiñajjiya. 6Eseya oja bacua e'ejojonei poanijojoya Eyacuiñajjiya oja Bacuaejjaja Edojjoshahuapame quiacanaje eseja eyamidojjohuasijje nequi'yohua. Edojjoshahuapameya eseya mimimeecani onijje jama ba'a: —Eyacuiñajji, ¡miya ecue Chii e'ejojonei poani!— 7E'e jjeya ca miquianaya queamimishihuiso eba'epoquijjitii pojjeama po'yonaje etiiquianaja esohuijo. Oya miquiana huohuipoquiajjitii pojjeama'yo. Miquianaya ca jjeya Eyacuiñajjija bacua poani, oja nahue'yo. Jamajjeya ojjaña cua Eyacuiñajjiya miquiana quiacaje huisotiiya miquiaaya jjeshejeyoje oja ejjashahuabaquijjijo.

Pablo jjashahuabaquiapoa majo ba'eca Jesosaja epeejjicuanajo

8Yahuajo miquianaya Eyacuiñajji bapojjima'hua ba'e etiiquianaja esohuicuaa queaquehuanee jjashahuabameequicapoquinaje. Oja esohuicuana miquiana huohuipoquiajjitii poa eshahuacuanaja esohuijo ejjashajja-ajjaquijji. 9Jjeya miquiaaya baña Eyacuiñajji e'ejojonei poani. Jama acajji ca Eyacuiñajjija miquiana oe ebaneinei. Jama poanijo, ¿apiojji ma etiiquianaja esohuijo jjashajja-ajjaquisapo-o'oyani? Coma' esohuicuana miquiana ba'emeesahua-ajjanei poani. ¿Apiojji shai quiana oja esohuijo queaquehua ba'eje o'oya? 10Miquiaaya epojjacuana, ba'icuana pea-ai shahuabapoquiañatii Eyacuiñajji bihuipoquiajji yajji. Majoya miquianaya queapame epoaje poso Eyacuiñajjinijje jjabaquipoquiani. 11Jamajjeya miquiana majotiiya jjashahuabaquipoquianitii bamajje, eya Pablo queayenonee poani miquianajo. Majoya quiana queapame epoaje poso jjabaquiani. E'e pojja'a eyaya jamatiiya esohui huohuiajjapoquianaje quiana.

12Yahuajo miquianaja eya queacamaja ajjima'nei poanaje. Jjeya ca queaquehua jjashahuabaquipoqui'yani quiana. Jamajjeya Jesosaja epeejjicuana eyaya esohui huohuineisa-aña miquianaya jiquio ecua eya oja esohuijo queaja'a jjashahuabaquipoquiani jama pea-ai miquiana epojji. Bacue, ojjañatii Moisesja etehuecuana jayojja eseya ba'ecapoqui'yoajja jjeya. 13Miquianajaya ebatii eya yahuajo queamanonee poa. Jamajjeya miquianaja meshijo aniya eyaya esohui queapame Quitojo huohuicooapoa quiana majo queamano pomajjeya. 14Eya queamanonee ani bamajje jamatii miquianajaya eya cajaa ajjima' poa, huoojea'yojjima quiaa eya apoa. Miquiaaya ca eya queapame ja'ajjequiapoa, Eyacuiñajjija huoojea ángel jayojja queapame eya apoa. Ma ecua Jesosa Quito queajeanee ja'acajjequiapoa cuaa jama pea-aiya miquiaaya oya ja'ajjequiapoa queapamenee. 15Eyacuiñajjija esohui shajja-ajjamajje miquianaya queabihuinee poa. Jjeya acuae quiana, ¿yajja jjashahuabaquime po'yonaje? E'ejojonei ecuea ebanei miquianaja eya yahuajo queajeanee poajojoya miquianaja ecojjanei eya quiame ecuea queaja'a eba'yojji. 16¿A'a jjeya quiana jjashahuabaqui'yani ejo e miquiana botiamanei'yo poso jiquio esohui e'ejojonei miquianaque eyaya tehueaña bamajje?

17Bacue, Moisesja tehuecuana yejji poanicuaa pea esohui huohuineisa-acani quiana o jayojja pea-ai jjashahuabaquime epo'yojji. Coma dejjacuanajaya miquianaya queapame eba'emeesahuajji pojjeamatii poaje. Ma dejjacuaaya eya miquianaya cajaa ameesa-acani e sapo'yoajjanei miquiana epo'yojji. Majoya miquianaya e shajja-ajjasapo'yoajja pomajje ojaya epeejji poaje'yo. 18Queapame poani peacuana miquiananijje ejjapeequijji oja ye esohui e'ejojonei huohuicanijo miquiana queaja'a ba'epoquijji. Jama sohuihuohuime ojaya acajji e chamajo pea-ai. 19Ecuea epeejjineicuana, eya queayenonee ani miquianaya jama po'yani peaja huohuijo shajja-ajjamajje. Jiquio ecua eponacuana ebacua cuayajjimahuajo queanee popoquiani, jama pea-aiya eya queayeno popoquiani miquiana Quitojo queaca'a tiipoquijjima shajja-ajjamajje. 20Eya jjeyanei miquiananijje anisaneipoani queapame ojee emimimimijji miquiana cojjaneijo yajja quiana jjashahuabaquime poani ebajji. Ecuea ca jjeya bajjimanei yajja quiana acajji.

Esohui ebameesahuajji queaja'a Sarajo, Agarjo pea-ai huohuicapoa

21Ojjaña joya Moisesja tehuecuana jayojja ba'esaneitiipoquijji poanicuana oja mimishima'yo ebajji nisho eyaya huohuiaña quiana. Miquiaaya queaquehua baña yajja poani Moisesja tehuecuana. 22E'e, oja tehue jama poani ba'a: Abraham beca bacuaejjame poa. Oe oja huanaseja, ojo chacochacopoquinaje eponajaya mejo poa. Pea ca oja huanaseneija mejo poa. Oja huanasenei ojo echacochacojji pojjeamatii poa. 23Oja bacuaejja ma oja huanaseja ojo chacochacopoquiapoa ejjeshe eponajaya mejo cuayapoa jiquio ecua ojjañacuanaja cuayani jama pea-aiya poa. Ma ca pea oja huanaseneija mejo cuayapoa Eyacuiñajjija esohuijo ma ebionei ojo chacochacopoquiapoaja ebacua cuayapoa jama pojjeama. Ma Eyacuiñajjiya Abraham huohuicapoa esohui oya quea-osecuahuiso poaje oya jayojja ajeyo'yojji Eyacuiñajjiya oya cuayameecapoa. 24Jiquio eya huohuiaña esohui oja beca bacuaejjajo queaja'a bacajji yajja poanijje jiquio jama. Ma beca eponajo jjashahuabaquicue so'o. Oya beca epona ma ecua Eyacuiñajjiya beca esohui quiacapoa jamaya. Oe oja esohui quiacapoa Sinaí eyiyojamacoojo nequiya. Ma eyiyojamacoojo quia esohui Agar jama epojjiya eyaya quiana huohuiaña. Ojjaña joya ma oja quia esohuijo jjashahuabaquiani majo ejjanahuemeequi'yojji ma ecua Agar poa jama pea-ai poani. Ojjaña oja esohui Moisesja tehuecuana jayojja ba'etiitiicapoquijji oya majo ejjanahuemeequi'yojji. Joya ecua dejja ejjeshe peajo chacochacopoquiani jama pea-ai ba'epoquijetii Moisesja tehuecuana jayojja. 25Bacue, maya eyiyo Sinaí bajjani país Arabia meshijo nequi. Jjeya eyaya Agar eponajo huohuiañajo jama poanijje eyiyo Sinaí. Ma ciudad Jerusalén meshijo ba'ecacuana eyiyo Sinaí jayojja pea-ai poani ojjaña Moisesja tehuecuana jayojja ba'etiipoquiani majo ejjanahuemeequi'yojji nisho. Jamajjeya ojjaña majo ba'ecacuana jiquio ecua dejja ejjeshe peajo chacochacopoquianitii jama pea-ai macuana ba'epoquijetii Moisesja tehuecuana jayojja. 26Pea ciudad Jerusalén bajjani e'ejojonei yani eyajo. Ma meshijo ojjaña eseya joya Eyacuiñajjija esohuijo, ma ohua Abraham huohuicapoa esohuijoya jjashahuabaqui'yonaje huisotiicuana ba'yani. Eseya ca ma ojo chacochacoapoaja bacua jama pojjeama, Sara eseja nae jayojja poani. Jamajjeya eseya Eyacuiñajjija bacuanei poani majoya. 27Eyacuiñajjija esohui yahuajonei etehue jaa jama poani ba'a:

“Epona jjamejoquiajja,

miya bacuama' ani jjeya queabihui pocue.

Queabihuinee taaacue

jamatii miquea ebacua ecuayajji bajjimajo so'o.

Ma pea epona ojahueja cajaa'yaja queabacuahuisonee poaje,

ma pea yahuejotii ca iyehuiso bacuame poaje.”

28Jesosaja epeejji ecue dohuecuana, jjo'icuana pea-ai, bacue. Miquianaya Isaac jayojja pea-ai poani. Yahuajonei Eyacuiñajjiya Abraham huohuicapoa Isaac cuayaje oja esohuijo. Oya jayojja miquianaya oja bacua poani ojaya esohuijo, jamatii pojjeama. 29Yahuajonei Agarja bacuaa ma jamatii cuayapoa Eyacuiñajjija esohuijo pojjeama cuayaa queacamajanee pomeecapoquiapoa ma pea Eyacuiñajjija Edojjoshahuapame queaca'ajo cuayapoa Saraja bacua. Jjeya pea-ai oya jayojjatii popoquiani. Moisesja tehuecuana jayojja ba'etiipoquijji poanicuaa queacamajanee pomeecanitii ojjaña joya Eyacuiñajjija esohuijo jjashahuabaqui'yanicuana. 30Bacue, ¿yajja poani Eyacuiñajjija esohui? Oya jama poani ba'a: —Queahueshanee huoojea'yocue epona joya ejjeshe peajo chacochacopoquiani oja bacuanijje pea-ai. Oja bacuaja ejjeshe'yojji pojjeama poaje o jeajji epoja aquianacuana o mano'yajo. Ma pea oja huanaseneija bacua jama pea-ai epojji pojjeama oya bacaje.— 31Jamajjeya Jesosaja epeejjicuana, eseya ma ecua eponaja ma ejjeshe peajo chacochacopoquiapoaja bacua jama pojjeama se poani. Eseya ca ma ecua oja huanasenei poaja bacua jama pea-aiya poani.

Currently Selected:

GÁLATAS 4: ESE

Highlight

Compare

Copy