EFESIOS 2

Yahuajo eseya edojjoshahua mano'yo poanaje, jjeya ca se ca edojjoshahua shequi'yo nequi Quitoja'yo poanijjejojoya

1Yahuajo miquianaya Jesosajo jjashahuabaqui'yojjimahua ba'e edojjoshahua mano'yo ba'epoquiapoa Eyacuiñajjijo ejjasejjaqui miquianaja mimishicuanajo. Oja esohuijo jjashajja-ajjaquiajjanei poa quiana. 2Jiquio meshijo ba'eca dejja mimishicuana jayojja pea-ai quiana ebionei ba'epoquiapoa queamimishica'atii. Eshahuacuanameseja esohuijo miquianaya ebionei jjashajja-ajjaquipoquiapoa ma yamima' eyatahuatahuajo nequi queaca'aja esohuijoya. Maaya cuana queahuiso shajjama' jayojja pomeecapoquianitii Eyacuiñajjija esohuijo. 3Jamaya eseya yahuajo queamimishihuiso ba'epoquiapoa. Esejayanei ejjashahuabaquijji queamimishi epojjijo ba'epoquiapoa, mahuisocuanajotiiya. Mimishi eseja yamijo nequiya yahuajo eseya queamimishihuiso pomeecapoquiapoa, eseja ejjashahuabaquijji queaquehuaa pea-ai. Jamajojoya Cuaqui-aiyasijje ojaya eseya epoquimee'yojji poa eseya pea dejja mimishicuana jayojja pea-ai poajojoya. 4Eyacuiñajjiya ca se ca queajeanee acapoquiani jamatii quea-esejamimishihuisotii ba'e. Yahuajo eseya queamimishihuisotii ba'epoquiapoajo ese queaneenee pomee'yosapo-ajja poa oya. 5Jamajjeya se jamatii eseja edojjoshahua mano'yo ba'e eseja mimishijo Eyacuiñajjiya eseya dojjoshahua eshe pomeeca'yonaje eyacua eba'epoqui'yojji Jesosa jayojja pea-ai. Bacue, Eyacuiñajjiya quiana queapamenee acanaje ojayanei ejjashahuabaquijjijo. Jamajojoya aje oja nahue'yo quiana poani, Cuaqui-aiyasijje epoqui'yojjitii pojjeama poaje. 6Eyacuiñajjiya eseya Jesosa Quitonijje ojee shequimeeca'yapoa pea jjashahuabaquime eyacua eba'epoqui'yojji. Jjeya Eyacuiñajjiya eseya onijje Eyajo ojee ani jayojja bacani ese Quitoja'yo poanijojoya quijje ojjañacuana huoojeapoquiajji epojji. 7Jamaya eseya queapamenee acanaje ojayanei ejjashahuabaquijjijo quijje ojjañacuanaja queaja'a ebajji Eyacuiñajjiya eseya queajeaneetii acapoquiani. Ohuaya eseya queapamenee acapoquiani Jesosa Quitojo, oya jamaya poani bapea-aicajji cuanaja. 8Eyacuiñajjiya quiana queapamenee acanaje ojayanei ejjashahuabaquijjijo. Jamajjeya oja nahue'yo poani quiana Quitojo jjashahuabaqui'yomajje, miquianayanei queapame ba'epoquianijo pojjeama. Eyacuiñajjiya ca quiana ca oe jamaya nahueca'yonaje oya miquianajo jama sapomajje, miquianaja ejjashahuabaquijjineijo pojjeama. 9Miquianaya queahuiso Eyacuiñajjijo chacochacopoquinaje sosejje pojjeamajo quiana nahueca'yonaje ojjañacuana oja chacojonei ejjabihuiaquipoqui poanijje. Chojja de, majo pojjeama se nahueca'yonaje. 10Eyacuiñajjiyanei eseya jama pomeeca'yonaje. Jesosa Quitoja'yo poanijojoya ohuaya eseya pea jjashahuabaquime eyacua pomeeca'yonaje ojo queapame echacochacopoquijji. Jamaya oya yahuajoneitii jjashahuabaquianiapoa esejo ese queapame ojo echacochacopoquijji.

Eseya ojjaña Jesosaja epeejjicuana oya jayojja pea-ai bacani Eyacuiñajjiya Quitoja'yo poanijojoya

11Miquianaya oe jjabaquicue judío pojjeama quiana cuayapoa. Judiocuaa quiana ca jama acani ba'a: “Judío pojjeamacuana cuiishasha jehuisejjajjima nequi.” Ma dejjacuanaya jjacuiishashajehuisejjameequiani peacuanajo ejjabameequijji oya Eyacuiñajjija poani. Oya jamaya poani oja eyamijotii. 12Yahuajo pea shequiajajo miquianaya Quitoma' jayojja ba'epoquiapoa quea-ohueshatii ba'e. Eyacuiñajjija babaca Israelitacuanajo jjanequichipimeequijjima acapoa cuaa quiana yahuajo. Jaajji pea jama quiana bacapoa cuaa. Eyacuiñajjija esohuicuana, ma yahuajonei ohua Israelitacuana huohuicoocapoa ma quijje ohua ajeyocajejo, bajjimanei quianaja poa yahuajo. Jamatiineinei quiana jiquio meshijo ba'epoquiapoa Eyacuiñajjima'nei jayojja. Ohua miquiana queapamenee acajejo jjashahuabaquijjimanei poa. 13Jjeya quiana ca Jesosa Quitonijje ojee nequi ojaya'yo poani. Eyacuiñajjiya quiana oja nahue'yo bacani Quitoja na' cuayaqui'yapoa sosejje. Yahuajo quiana quea-Eyacuiñajjihuesha ba'epoquiapoa. Jjeya quiana ca Eyacuiñajjiya jjanequichipimeequicanaje o nequiyasijje Quitojo.

14Quitohua miquiana oja epeejji judío pojjeamacuanaya jjabeimeequicanaje Jesosaja epeejji judiocuananijje. Jjeya judiocuana judío pojjeamacuana oya jayojja pea-ai jjashahuabaquime pomeeca'yonaje Quitohua queabei eba'epoquijji oejaajji jayojja epo'yojji. Yahuajo judiocuana queaquenetii ba'epoquiapoa judío pojjeamacuananijje mei epeei ona queahuesha nequimeejji poani jayojja. Quitohua mano'yomajje jeabichajeacanaje ma mei epeei jayojja nequi judiocuana, judío pojjeamacuana oejaajji jayojja epomee'yojji. 15Eyacuiñajjija esohui ma ebionei ohua Moisés tehuemeecapoa esohuiya Quitohua maya, ese queaja'a ba'emeenishojji poani, popajeameeca'yapoa. Jamaya ohuaya acapoa Jesosaja epeejji judiocuana, judío pojjeamacuana pea-ai pea jjashahuabaquime eyacua eba'epoqui'yojji queneama, oejaajji jayojja epo'yojji pea-ai. 16Judiocuana queaquenetii ba'epoquiapoa judío pojjeamacuananijje. Majoya Jesosa Quitohua acui ecuiata'apeejo mano'yomajje ohuaya judiocuana judío pojjeamacuana pea-ai botiama jjabapajeameequica'yapoa joya ojo jjashahuabaqui'yonaje huisotiicuana. Quitohua Eyacuiñajji jjabeimeequica'yapoa judiocuananijje, judío pojjeamacuananijje pea-ai oya acui ecuiata'apeejo mano'yapoajjejojoya. Jjeya macuanaya oe eyami jayojja queabei po'yani Quitojo.

17Quitohua esohui queapame yecapoa miquianaya judío pojjeamacuana quea-Eyacuiñajjihueshatii ba'ejo judiocuananijje queabei eba'epoqui'yojji. Judiocuana pea-ai joya oja sohuijji poanicuana judío pojjeamacuananijje queabei eba'epoqui'yojji esohui yepea-aicapoa Quitohua. 18Quitohua eseya oja epeejjicuana, judiocuana, judío pojjeamacuana pea-ai jjanequichipimeequicanaje Eyacuiñajji nequiyasijje. Jamajjeya judiocuana, judío pojjeamacuana pea-ai onijje mimicapoquijji, oya bihuiacapoquijji pea-ai. Oja Edojjoshahuapameya ojjaña eseya o nequiyasijje jjanequichipimeequicanaje. 19Jamajjeya miquiana judío pojjeamacuanaya ojaya epeejji quea-Eyacuiñajjihueshatii pojjeama po'yani, jaajji pea jama pojjeama'yo quiana. Jjeya ca quiana ca Eyacuiñajjija bacuacuana poani, oja nahue'yo. 20Miquianaya jiquio ecua equi queapame eiya ani jama. Ma yahuajonei oja sohuihuohuijji poa dejjacuana, jiquio jjeya oja babaca ona sohuihuohuiquinequijji poanicuana pea-ai jiquio ecua mei-aicuana equi iyajji enequiacoo queaca'a nequiani jamaya poani comacuana. Ma dejjacuaaya esohui huohuicoocapoa. Jesosa Quito ca jiquio ecua ebionei mei-ai equi iyajji queaca'anee enequiacoo jamaya oya nequi. 21Eseya ojjaña joya Quitojo ejjashahuabaqui'yocuana jiquio Eyacuiñajjija equi-ai mei-aicuanajo iya queapame o bihuiapoquiajji ani jama pea-aiya poani. Eyacuiñajjiya eseya queaca'a tiimeesahuacapoquiani ojee queaca'a enequipoquijji equi queaca'anee ani jama Emeshimeseneija epojjitii. 22Miquianaya Quitoja'yo poanijjejojoya queaca'a tiipoquiani, oe equi queaca'anee ani jamaya jamatii queahuiso poani quiana. Bacue, ojjaña eseya Eyacuiñajjija equi-ai queapamenee ani jamaya poani ojee. Majotiiya Eyacuiñajjija Edojjoshahuapame nequipoquiani.

Currently Selected:

EFESIOS 2: ESE

Highlight

Compare

Copy