HECHOS 24

Emeshimese etii Felixya Pablo mimije shajja-ajjacapoa

1Majoya aje quijje Pablo cinco cahuime huiso soldadocuanaja dojojo Ananías Eyacuiñajjija equi-aijo chacochacopoquiani ebionei etii poani poeapoa Cesarea meshiyasijje pea judío dejja etii poanicuananijje. Pea dejja Tértulo bajjani dojopea-aicapoa macuaaya. Oya pea dejja queamimishi epo queaja'a huohuijji poani. Jamajjeya oya poquiapoa emeshimese aniyasijje Pablo queamimishi poani queaja'a huohuiya. 2Majoya aje soldadocuaa Pablo yecapoa. Tertulohua huohuicoocapoa emeshimeseja eshajja-ajjajji yajja oya Pablo poanaje. Jama huohuime acoocapoa emeshimese Felix ba'a: —Emeshimese miya queapame, ecuana queabihui ba'epoquiani mijo. Miyaya queasapaja'aa huoojeapoquiaña cuana, jamajjeya ecuana queapame popoquiani jiquio meshijo nequi. 3Ojjaña ecuaaya bañatii miyaya queapame apoquiaña ojjaña jiquio meshicuiñajjicuana. Miya queapamenee, emeshimese Felix. Jamajjeya ecuana queabihui poani mijo. 4Ecuana miya jiquiojo anitiitiimeesapo-ajja jiquio dejja queamimishi poani miquea eshajja-ajjajji. Jamajjeya jjeyanei che ecuanaja esohui yajja oya poanaje shajja-ajjasocue. 5Jiquio dejjaa ecuaaya baña judiocuana queahuiso meshijo ba'eca quenequenecuajimeecani ohua esohui queatai huohuicajje. Ohuaya judiocuana pea jjashahuabaquime pomeecani oya jayojja pea-ai jjashahuabaquime epojji pojjeama. Nazareno dejjacuana huohuijji oya poani pea-ai.#24.5 Nota: Nazareno dejjacuana Roma emeshimeseja esohuijo jjashajja-ajjaquisapo-ajjanei poa. Jamajjeya quehuajje jjachichaquicapoquiapoa cuana.* 6Eyacuiñajjija equi-ai queapamenee ohuaya judío pojjeama dejjacuana dojonobia-ajjaquicanaje. Equi-ai jama aca-ajjanei Eyacuiñajjija. Jamajjeya ecuaaya oya iñaca'anaje ohua oja equi-ai jama a-ajjacajo. 7-8Miyayanei oya huohuiajjacue ebajji a'a jiquio ecuaaya aña esohui ojo a'a e'ejojonei poani— jamaya Tertulohua acapoa.

9Pea judiocuaa majotii nequiya oya esohuiya apea-aicapoa Pablojo. 10Majoya aje emeshimeseya Pablo mimijji eme jeasohuacapoa oque. Jamajjeya Pablo jama mimime poa onijje ba'a: —Ee, jjeya eya mimisaneipoani e queaja'anee mique bajjijo. Ecuea eba miya queashequiajahuiso jiquio meshicuiñajjicuana huohuipoquiaña queapamenee. 11Miyaya huohuiajjacue jiquiojo anicuana a'a jiquio jjeya eya huohuije e'ejojonei poani. Eya poeyanaje Jerusalén meshiyasijje Eyacuiñajji bihuiaa, 12 cahuime huiso epoe nequi so'o jiquiojo. 12Jiquiojo anicaja eya Jerusalén meshijo nequi bajjimanei poanaje mimijajiqui peacuananijje. Judiocuana Eyacuiñajjija equi-aiquibojo ani queaquene pomeejjima cuana ecuea poanaje. Judiocuanaja equi-ai ejjachichaquijjijo ani eya mimijajijjimanei poanaje pea-ai majo anicanijje. 13Jiquiojo jjeya e queatainee miminaje huohuijji poanicuanaja caca eya bajjimanei. Esohui ejo a'a e'ejojonei a'a siajje poani ojaya ehuohuijji pojjeama eya ojaya bajjimajojoya. 14Jiquio esohui eyaya jjeya queaja'a huohuije. Eyacuiñajjija esohui Ejeojji Eyacua jayojja poani eyaya e'ejojonei huohuipoquiañatii jiquiojo anicaa bacani siajje poani poso esohuiya. Eya ecuea etiiquiana poaja Eyacuiñajjijo chacochacopoquianitii. Jamajjeya eya jjashahuabaquianitii ma yahuajonei oja sohuihuohuijji poacuaa tehuecapoa esohuicuanajo, Moisesja etehuecuana pea-aijo. 15Eya jiquiojo ani judiocuana jayojja pea-ai jjashahuabaquime poani Eyacuiñajjijo. Ohuaya ojjañatii emano'yo jaacuana quijje shequimeecaje'yo. Ojjaña mimishicuana, ma queapame ba'enaje pea-ai shequimeecaje'yo quijje. 16Jamajojoya ecue mimishi huanaquehuajjima eya jjashahuabaquipoquitiisapoani Eyacuiñajjiya eya bacanijojoya. Dejjacuaa eya ecue mimishi huanaquehuajjimanei bapea-aicani.

17—Queashequiajahuiso pea meshicuanahuasijje poquinequimajje eya Jerusalén meshiyasijje poe'yonaje enijjejaajji aema'cuana bejjo quiaa. Ehuone enaa jehui'yo pea-ai Eyacuiñajji quiaa poe'yonaje. 18Eyaya bejjo, ehuone enaa jehui'yo pea-ai quiajjimahuaa ecuanaja etiiquianaja esohui queaboejea epo'yojji anaje. E majo Eyacuiñajjija equi-aiquibojo nequijo beshahuanei chama' poanaje cuana. Ejo queaquenenee taaajjima poanaje majo anicacuana. Enijje mimijajijjima pea-ai poanaje. 19Majo ani beca judiocuaa Asia meshijo nequi poecuaa eya bacahuanaje Eyacuiñajjija equi-aiquibojo ani. Macuanaya caca oe e majo ani bajji epo jiquiacua poecajji mi huohuiya ejo yajja eya queatai ponequinaje jama mimisapomajje. 20Macuanaya poesapo-ajjajo jiquiojo jjeya anicacuaa cahuohuicahua jjeya ajeo eya queamimishi poanaje bacanaje cuaa eya judío etii poanicuana Junta Supremanijje aninajejo. 21Eya etiicuana oopana anijo miminequinaje janobajjimanei jama ba'a: “Jjeya miquiaaya eya baña queaquehua mimiani eyaya emano'yo jaacuana shequicaje'yo esohui huohuiañajo.” E'e pojja'a mahuisojoya eya queamimishi poani poso aña quiaa— jamaya Pablohua huohuicapoa cuana ja'anei.

22Pablohua huohuicani shajja-ajjamajje emeshimese Felixya peaja ye esohui Pablojo shajja-ajjapajeacapoa so'o. Ojaya ebatii poa esohui Ejeojji Eyacua poani jayojjajo. Jamajjeya emeshimeseya jama acapoa cuana ba'a: —Bacue, comandante Lisias bajjaniya poemajje queaja'a huohuijeyocañaje yajja oya Pablo ponequinaje majo ani. Majoya eyaya queaja'a huohuije'yo a'a oya queatai ponequinaje.—

23Majoya emeshimese Felixya oe capitán huohuicapoa Pablo jaahuanajjijo. Jamatii ohuaya Pablo huoojeacuayameecapoa epoaequinequijji so'o oja epeejjicuanaja oya easahuajji, ebobiajji pea-ai.

24Majoya aje quijje pea pojjajo emeshimese Felix poeo'oyapoa oja huanasenijje. Oya Drusila bajjani judío epona. Majoya Felixya Pablo yemeecao'oyapoa oque oja esohui eshajja-ajjajji. Jamajjeya shajja-ajjaneicapoa cuaa ojjaña ma Pablohua huohuicapoa esohui ejjashahuabaqui'yojji Jesosa Quitojo. 25Pablohua emeshimese esohui queaja'anee huohuicapoa jama ba'a: —Dejjacuana queapame, mimishiama ba'ecapoquijji. Oya jjanahuequicajji queamimishitii epo poanijje. Eyacuiñajjiya ojjañacuana oja mimishi ja'anei quijje huohuicaje'yo o queaneenee pomee'yojji— jamaya poa.

Ohua jama huohuime acajje Félix queamete ponanapoa oja esohuijo. Majoya oya jama poa Pablonijje ba'a: —Jjeya poquicue so'o. Eyaya miya iyaaje o'oya miquea esohui eshajja-ajjao'oyajji quijjepishana ecuea echacojji chamajo.—

26Emeshimese Pablohua o poquimee'yojji sosejje bejjo equehuaquiacaje poso jjabataiquiapoa. Jamajojoya Pablo iyaamajamajacapoa onijje emimijji. Jamaya acapoquiapoa beca shequiajame huiso emeshimeseya. 27Majoya aje beca shequiajame huiso jjayejjequiajo oya Félix emeshimese popajea'yapoa. O jjocojo pea dejja Porcio Festo bajjani nequi'yapoa. Félix ca judío etiicuananijje jjapeequitiisapoa, jamajjeya emeshimeseya Pablo mihuoojeacuayameeca'yapoa.

Currently Selected:

HECHOS 24: ESE

Highlight

Compare

Copy