HECHOS 22

1—Enijjejaajji ecuea epeejjicuana, etii poanicuana pea-ai, shajja-ajjaneicue jiquio jjeya eya huohuije esohui miquianajaya queaja'a ebajji ejo.—

2Oya hebreo esohuineijo mimije shajja-ajjamajje jecanei anica'yacuanapoa. Jamajjeya Pablohua huohuitiicapoa cuana jama ba'a: 3—Eya ca iña judío dejja quio. Tarso meshi ejeojjijo provincia Cilicia meshimijijje eya cuayapoa. Eya quio Jerusalén meshijo tiimee. Gamaliel bajjani dejjaa eseja etiiquianaja esohui etehuecuana eya huohuicapoquiapoa. Eya Eyacuiñajjijo chacochacopoquinajetii queapamenee hueya-amanei jiquio ecua jjeyanei quiana ojo chacochacopoquiani jamaya. 4Yahuajo eyaya sa-ajjaneineiapoa ma esohui Ejeojji Eyacua jayojja bapoquiajji poanicuana quecuamee'yojji. Yahuajo queahuisocuana dejjacuana, eponacuana pea-ai eyaya jeyomeepoquiapoa edojo'yojji ejjajeanobiaquijji equiyasijje. 5Eyacuiñajjija equi-aijo chacochacopoquiani ebionei etii poaniya, ojjaña ma pea dejja etii poanicuaa pea-ai eya jama apoquiaje bacapoa. Ma etii poanicuaa eya papeni etehue quiacapoa esenijjejaajji Jesosaja epeejji Damasco meshijo ba'eca ecuea edojo'yojji ejeanobiameequijji. Jamajjeya cuamaya eya poquiapoa ona sa-ajja'yohua Jerusalén meshiyasijje huacuaya jjequi'yohua ejeanobiameejji, ecuiameejji pea-ai.

6—Majoya aje eya ejeojjijje Damasco meshichipinei poquijejo eshequi biacojjajja nequijo jijijeya eyajje jeaja'ajeacuajicananapoa e nequipejjeneiyasijjeyee. 7Jama acajo eya meshiyasijje jaabichajeananaquiapoa. Majotii jaaya eyaya shajja-ajjapoa oe mimije jama poaje enijje ba'a: “Saulo, Saulo, ¿yajjajo eya miyaya queaneenee pomeeaña?” 8Eyaya huohuiajjapoa oya jama ba'a: “¿A'ya acuae mi so'o, emeshimese?”

—Eya saja-acapoa jama ba'a: “Eya ca iña Jesosa Nazaretcuiñajji oyaya jiquio miyaya queaneenee pomeeañaya.” 9Ma enijje poquiapoa cuaa queajijija'anee bapea-aicapoa. Jamatii ma enijje mimijeja esohui ca shajja-ajjajjimanei poa cuanaja. 10Eyaya oya huohuiajjapoa jama ba'a: “Emeshimesenei, ¿yajja eya pocajji?”

—Ohuaya eya saja-acapoa jama ba'a: “Nequisohua'yocue. Damasco meshiyasijje poquicuetii. Majo nequiyaya aje oe dejjaa huohuicaje ojjaña cua miquea acajjijo.” 11Eya cojja jeasajajaneicapoajjejojoya jjacojjama'quiapoa majotii jaaya. Jamajjeya eya ecuea epeejjicuaa emejo dojocapoa Damasco meshiyasijje.

12—Ma meshijo nequiapoa oe dejja Ananías bajjani. Oya queapame mimishiama ba'epoquiapoa. Moisesja tehuecuana ohuaya shahuabaneitiicapoquiapoa. Ojjaña judiocuana Damasco meshijo ba'eca oya queapame poanijo mimicapoquiapoa. 13Majoya Ananías e baa poeapoa. Jama eya ohuaya acañapoa ba'a: “Ecue dohue Saulo, jjacojjaja'aqui'yocue.”

—O jama pojeahuajo eya queacojjaja'a jjabananaqui'yapoa. Eyaya oya queaja'a ba'yapoa. 14Majoya quijje eya huohuicapoa jama ba'a: “Eseja babacuanaja Eyacuiñajjiya miya babacacanaje oja ejjashahuabaquijjicuana miquea queaja'a ebajji. Joya dejja mimishima'neitii poani queaja'a miquea ebajji, oja esohuinei eshajja-ajjaneipea-aijji ohuaya miya babacacanaje. 15Miya ojjañajaajjicuana huohuipoquiajji poaje ojo. Miyaya huohuiquije ojjaña ma mi banaje huisotii, ma mi shajja-ajjanaje huisotii pea-ai. 16Jamajjeya, ¡a'a jjaishoatiiquipoquijji! Jjeya nequisohua'yocue. Jjaiñajeanobiameequicue enaojjohuasijje. Emeshimeseneinijje ja'anei oja eshajja-ajjajji mimicue miquea mimishicuana oja ecuijea'yojjijo” jamaya eya acapoa.

17—Majoya quijje Jerusalén meshiyasijje poe'yomajje eya poquiapoa Eyacuiñajjija equi-aiyasijje majotii mimiya onijje. Majo eya jjacahuibaquiani jayojja ani ohuaya huohuicapoa. 18Emeshimesenei nequi eyaya bapoa enijje mimije jama ba'a: “Jerusalén meshijo ani jja-acuajiquicue epoquicuajijji miquea esohui ejo jiquio ba'ecacuana shajja-ajjasapo-ajjajojoya” jamaya eya acapoa. 19Majoya eya jama poa onijje ba'a: “Emeshimesenei, ojjañaja eya ebaneinei. Yahuajo eya judiocuanaja equi-aicuana ejjachichaquijji aniyasijje poquinequiapoa majo anica mijo ejjashahuabaqui'yocuana jeanobiameeya. Ma dejjacuanaya eyaya cuiameeapoa pea-ai. 20Esteban ma mijo chacochacopoquiapoa dejja onaa jajahuejjajeaca'yoquijo meiya eya majotiiya enequipea-aiapoa. Ohuaya mijo esohui queaja'a huohuicapoquiapoa. Jamatii eyaya apea-aiapoa jama ba'a: ‘Cajajahuejjajeaca'yahua cuaa.’ O jajahuejjajea'yojji poanajecuanaja daqui eyaya jaahuanapoa. Jamaya eya yahuajo ponequiapoa.” 21Jamatiiya Emeshimeseneiya eya huohuicapoa jama ba'a: “Jjeyahuanei jiquiojo ani poquicuajicue ejeojjijje. Eyaya miya huoojeaña peajaajjicuana judío pojjeama queahueshanee jaacacuana sohuihuohuiquiya”— jamaya Pablohua huohuicapoa majo ejjachichaqui queamase nequica judiocuana.

Pablo esoldadocuanamese etii poanija cojjaneijo nequimeecapoa

22Mahuisotiiya Pablo mimije shajja-ajjacapoa cuaa. Ohua esohui judío pojjeamacuana huohuiquijji acajje ma ejjachichaqui nequica taaapoa janobajjimanei Pablojo jama ba'a: —¡Joya dejja ca eshetii enequijji pojjeama! Eseja meshijo a'a oya eshe nequimeejji, manojeamee'yocue oe.— Jama taaameya pocapoa cuana Pablojo. 23Macuaaya queaqueneneeyajjejojoya oja yamijo ba'e daqui-ao jjequihuijjiajeacapoa. Meshipohui eyahuasijje jeasohuajeacapoa cuaa. Oya taaamajamajanequiapoa oya esohuitiiya. 24Judiocuana queaqueneneetii jama poequi bamajje comandanteya Pablo jeanobiameecapoa soldadocuana anijji equiyasijje. Majotii nequiya comandanteya huohuicapoa cuana Pablo cuiasejjajeajjijo. Ajeo queahuiso queaqueneneetii taaamajamajanequiani o ebajjijo Pablo cuiasejjajeameesa-acapoa comandanteya. 25Majoya aje Pablohua oja jeyo ecuiasejjajeajji nequiya soldadocuana huohuijji etii poani capitán huohuiajjacapoa jama ba'a: —¿A'a eya romano dejjanei poani miyaya cuiasejjajeameeje jamatii miquea bajjima ache esohui shai eyaya queatai aña? Jjeya miyaya eya ameesa-aña jiquio ecua eseja romano emeshimeseja esohui etehue jama pojjeama.—

26Pablo jama poani shajja-ajjamajje capitanya huohuiquicapoa comandante jama ba'a: —¿Yajja miyaya ameeje joya dejja? ¡Oya romano dejja pea-ai poani!—

27Majoya aje comandante Pabloque poquiapoa o huohuiajjaa. Jama huohuiajjame acañaquiapoa ba'a: —¿A'a pa e'ejojonei miya romano dejja pea-aiya poani?—

Pablohua oya saja-acapoa jama ba'a: —E'e.—

28Comandanteya oya jama apea-aicapoa ba'a: —Eyaya bejjo queahuisonee quianaje e romano dejja pea-ai po'yojji sosejje.—

Ohua jama acajje Pablohua huohuicapoa jama ba'a: —Eya ca iña cuayapoa romano dejja epojji.—

29Pablo jama poani shajja-ajjamajje o cuiasejjajeajji epojjinishocuana jjanequishiñananajeaquiapoa Pablojo o yajjajo. Comandante pea-ai o romano dejja poani esohui shajja-ajjamajje queamete popea-ainanapoa. Oja esohuineijo Pablo cadenaa jeyocapoa cuaa jamajjeya oya queametenee poa. Roma emeshimeseja etehue jama ajjima' acapoa ohuaya. Roma dejja jamatii jeyoca-ajja.

Judío etii poani oopanacuanaja ebajji Pablo nequiacapoa cuaa

30Majoya aje pea pojjajo comandanteya shajja-ajjaneisa-acapoa ajeo judiocuana Pablojo queaquenenee mimiani. Jamajjeya ohuaya Pablo cadenaja jeyo pichojeameeca'yapoa. Ohuaya judío etii poanicuana Junta Suprema bajjani, Eyacuiñajjija equi-aijo chacochacopoquiani etii poanicuana, pea dejja etiicuana pea-ai iyaameecapoa. Majoya ohuaya Pablo jeacuayamee'yomajje nequimeecapoa judío oopana etii poanicuana anicaja eshajja-ajjajji.

Currently Selected:

HECHOS 22: ESE

Highlight

Compare

Copy