2 TESALONICENSES 3
3
—Ecuanajo quiana oe mimipoquicue— jamaya poa Pablo.
1Ecuanaja dohuecuana jjo'icuana, oe-ejjenei ecuanaja esohui jama poani ba'a: Eyacuiñajjinijje oe mimipoquicuetii ecuanajo oja esohui queapame queameshihuiso ba'ecacuanahuasijje ehuohuiquijjijo. Mimipea-aipoquicue pea meshicuanajo ba'ecacuanaja queaja'a shajja-ajjajjijo ma ecua miquianaya oja esohui shajja-ajjamajje jjashahuabaqui'yapoa jama pea-aiya ona pojjijo. 2Mimipea-aipoquicue oe onijje Eyacuiñajjija ecuana enahuejjijo dejjamimishi queamasecuanajo. Queahuisocuana Eyacuiñajjija esohuijo jjashahuabaqui'yoajjanei poani. 3Emeshimesenei caca queaca'aneetii nequi, ojaya ejjashahuabaquijji ohuaya ajeyocapoquianitii. Jamajjeya ohuaya quiana queaca'a nequimeecapoquije, edosiquianajo quiana ohuaya jaahuanacapoquije pea-ai. 4Ecuana caca Emeshimeseneijotii jjashahuabaquipoquiani, oya pea jjashahuabaquime po'yoajjanei. Jamajjeya ohuaya quiana jjeya queaja'a ba'emeesahuacani, quijje pea-ai ba'emeesahuacapoquijetii ma ecua ecuaa quiana esohui huohuiquinaje jama pea-ai eba'epoquijji. 5Emeshimeseneija quiana queajeanee poanitii miquianajaya ebajjijo ecuana majoya mimipoquiani onijje. Ecuana mimipea-aipoquiani miquiana queaca'atii eba'epoquijjijo Quitojo.
Jesosaja epeejjicuana hueya-ama chacochacocapoquijji ojjañajo
6Jesosaja epeejji ecuanaja dohuecuana jjo'icuana, Emeshimesenei Jesosa Quitohua ecuana bacanitii. Jamajjeya ecuaa quiana huohuineiaña jama ba'a: Joya Jesosaja epeejji bobijo chacochacoajja poanijo jjasejjaquisocue, ¡a'a onijje jjapeequitiipoquijji! Joya ecuanaja huohui echacochacojjijo jjashajja-ajjaquisapo-ajja poanicuanajo jjasejjaquisocue. 7Miquianajaya eba achajja queaja'a ba'ecapoquijji jiquio ecua ecuana queaja'a ba'epoquiani jama pea-ai epojji. Ecuana miquianaja meshijo ani jamatii chacochacojjimanei pojjeama aninaje. 8Miquianaja bobi jamatii sosema' ijjiapojjima'nei poanaje ecuana. Ecuana ca epojjajo, mecajje pea-ai chacochaconeinaje miquianaja bobi huohuiajjajjima yajji, miquiana majoya queacamaja epo poanijje ecuana bobiajjijo. 9E'ejojonei ecuanaja miquiana bobi huohuiajjacajji poanaje Eyacuiñajjija esohuijo queahuiso chacochaconajeyajjejojoya. Ecuana ca jamaya chacochaconeinaje hueya-amanei miquiana jama pea-ai eba'epoquijji ecuana jayojja pea-aiya. 10Ecuana miquianaja meshijo ani jama poanaje ba'a: Joya chacochacoajja poanicuana ca bobi jamatii quiaca-ajja. 11Ecuanaja eshajja-ajja beca quiana chacochacoajjanei poani. Jamatiinei ani, peacuana chacomeejjima yajjijo queahuiso mimimimiani. 12Emeshimesenei Jesosa Quitoja huoojeaajjejojo ecuaa coma dejjacuana chacochacoajja jama niñesheame aña ba'a: “Queapame oe chacochacopoquicue miquianaja bobi jjeshejjijo.”
13A'a oe hueyahueyajji queapame echacochacopoquijji quiana ecuanaja dohuecuana, jjo'icuana pea-ai. 14Miquiananijje jjachichaquipoquiani Jesosaja epeejji jiquio ecuaa tehuenaje esohui jayojja ba'esapo-ajja poanicuana bacue. Jamajjeya oe comanijje a'a jjapeequitiipoquijji o queabicho pojji oja mimishijo. 15Jamatii a'a oya botiamanei ajji. Miquianaja huapa pojjeama jama niñesheameya oya acue quea-ojeaa.
16Emeshimesenei ese queaquijijjijajinee pomeejji poaniya queabei meteama capomeecapoquiahua quiana ojjaña pojjajo, ojjaña ese queacamaja pomeejjicuanajo pea-ai. Emeshimesenei caca miquiananijjetii nequipoquije.
17Eyaya Pablohua jiquio esohui miquiana queabihui pojji tehuemeenaje. Jiquio esohui ecue tehuemeenei poani ebajji eyaya ecuea bajjani jeasiinaje. 18Eseja Emeshimesenei Jesosa Quitohua ojjaña quiana queapamenee ca-acapoquiahua ojayanei ejjashahuabaquijjijo.
Currently Selected:
2 TESALONICENSES 3: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
