2 PEDRO 1
1
Jesosaja epeejjicuana queabihui pojji Pedrohua esohui acapoa
1Eya Simón Pedro Jesosa Quitojo chacochacopoquiani oja huoojea ona sohuihuohuiquinequijji poani. Jiquio esohui eyaya tehueaña ojjaña joya Eyacuiñajjija esohui queapamenee Jesosa Quitojo ejjanahuemeequi'yojji shajja-ajjajji poanicuanaja ebajji. Eyacuiñajjiya quiana queaja'a jjashahuabameequica'yonaje ojo ejjanahuemeequi'yojji ma ecua ecuana yahuajopishana queaja'a jjashahuabameequica'yapoa jama pea-aiya oya jayojjaya. Jesosa Quito Eyacuiñajji poani queapamenee nequiyajjejojoya jamaya eseya jjashahuabameequica'yonaje ojo ejjanahuemeequi'yojji. 2Eyacuiñajjiya quiana queapamenee ca-acapoquiahuatii ojayanei ejjashahuabaquijjijo, queaquijijjijajinee capomeecahua quiana pea-ai ohuaya. Eyacuiñajjinijje jjapeequipoquiajo, ese nahue'yojji poani Jesosa Quitonijje jjapeequipoquiajo Eyacuiñajjiya quiana jamaya queapame acapoquije ojayanei ejjashahuabaquijjijo.
Jesosaja epeejjicuana achajja ba'eme epopoquijjijo tehuecapoa
3Eyacuiñajjiya oyanei queaca'aneetii poaniyajjejojoya ojjaña joya ese queaja'anee mimishiama ba'emeesahuajji poanicuana quiacanaje. Jamaya se queaja'a ba'epoquije Quitonijje jjapeequipoquianijjejojoya. Ohuaya eseya iyaacanaje oja bacuacuana epojji queaja'a eba'epoquijji mimishiama. 4Jamaya Eyacuiñajjiya eseya ebionei quiacapoa ese queaja'a ba'emeesahuajji. Majoya oja esohui queapamenee queahuiso huohuicanaje yajja se pomeecaje quijje ohuaya. Ma esohui queapameneejo ohuaya quiana oja bacuacuana pomeecanaje queapame ejjashahuabaquipoquijji o jayojja. Jamajjeya miquianaya jiquio meshijo nequicacuanaja ejjashahuabaquijji queamimishica'a jayojja pojjeama ba'epoquije. Coma ejjashahuabaquijjicuaaya queatainee pomeecani cuana queahuiso. 5Jamajjeya quiana oe queaca'a pocue Eyacuiñajjijo etiipoquijji. Ebionei quiana oja esohuijo jjashahuabaqui'yapoa. Jamajjeya quiana oe jjeya queapame ba'epoquicue mimishiama. Majoya queapame mimishiama popoquiani jjabaquimajje queajjashahuabaquija'a pocue Eyacuiñajjija esohui jayojja eba'epoquijjitii. 6Majoya quiana queajjashahuabaquija'a poani jjabaquimajje jjajaahuananeiquicue queamimishi epo poanijje. Majoya jjajaahuananeiquiani jjabaquimajje queaca'a ba'epoquicue jamatii queacamajanee onaa acani. Majoya queaca'atii poani jjabaquimajje Eyacuiñajjija ejjashahuabaquijji jayojja ba'epoquicue mimishiama. 7Majoya Eyacuiñajjija ejjashahuabaquijji jayojja ba'epoquiani jjabaquimajje miquiananijje ba'eca Jesosaja epeejjicuana queaboti acue. Majoya Jesosaja epeejjicuana queaboti aña jjabaquiamajje ojjañacuana queajeanee apoquiacue quiaa.
8Miquianaya jama queaja'a jjashahuabaquime popoquianitii jjabaquimajje queapamenee ba'epoquije. Jamatii eba'ejeapoquijji pojjeama quiana poaje jiquio ecua acuicuana jamatii nequiani jjajja-ajja jama epojji pojjeama. Eseja Emeshimesenei Jesosa Quitonijje jamatii ejjapeejeaquijji pojjeama pea-ai poaje. 9Joya Jesosaja epeejji queaja'a jama jjashahuabaquime po-ajjacuana ca joya ecua dejja cojjama' jjabaquiajjanei poani jama jayojjaya. Comacuaaya pajeaca'yani Eyacuiñajjiya oja mimishicuana yahuajo cuijeaca'yonaje. Queaboejea epo oja mimishima'yo oya jjabapajeaqui'yonaje. 10Jamajjeya quiana oe ecue dohuecuana jjo'icuana, queaca'atii ba'epoquisapocue. Miquianaya jama queaja'a ba'epoquiani shajja-ajjamajje e'ejojonei Eyacuiñajjija babacanei quiana bacaje cuaa. Majoya quiana huacuaya epoqui'yojji oma' jayojja o'oya pojjeamatii poaje, queaca'atii ba'epoquije. 11Majoya quiana quijje Eyacuiñajji queabihuineeya nequimeecaje'yo onijje ma Emeshimesenei Jesosa Quitohua huoojeacapoquianitii meshi Eyahuasijje eanitiitii'yojji.
12Ecuea quiana eba, jiquio esohuicuana miquiaaya shajja-ajjanaje yahuajopishana. Ma miquiana huohuicanaje esohui e'ejojoneicuanajo jjashahuabaquipoquianitii. Jamatii eyaya quiana jiquio huohuije o'oya miquianaja pajea'yojjima yajji. 13Eyaya quiana jjeya eshe nequiya mano'yojjimaa jiquio esohuicuana huohuipoquiajetii so'o. Jamaya ecuea echacojji yajjijo eya jjashahuabaquiani. 14Bacue, eseja Emeshimesenei Jesosa Quitohua eya huohuicanaje iyeshono eya manoje'yo. Jiquio meshijo nequi eya poquijeyoje'yo. 15Jamajjeya quiana eyaya jjeya jiquio esohuicuana huohuineineiaña. Majoya e mano'yajo jiquio esohui ecue huohuijotiiya quiana jjashahuabaquipoquije cua eshe ba'epoquije quiana.
16Jiquio esohui ecuaa miquiana huohuiaña eseja Emeshimesenei Jesosa Quito queaca'aneetii poeje o'oya quijje e'ejojonei poani, siajje pojjeama. Esenijje dejjaja esohuinei pojjeama ecuaa quiana huohuiaña o poeo'oyajjijo. E'ejojonei ecuaa Jesosa queaca'aneetii queasajajanee bapoa yahuajo ecuanaja ecojjaa. 17-18Ecuana Eyacuiñajjija babaca Quitonijje eyiyoaojo aniapoa. Majo nequiya Eyacuiñajji Echii-aiya Quito queasajajanee pomeecapoa ecuanaja oya ebajji. Ohuaya esohui queapame acapoa Quitojo queaca'aneetii nequiya ecuanaja eshajja-ajjajji. Eyajo nequi oya jama mimime poaje ecuaa shajja-ajjapoa ba'a: “Jiquio ecue Bacuaejja ecuea queajeanee, eya ojo queabihuinee poani.”
19Jamaya ecuaa oya queaca'anee nequi bapoa eyiyoaojo nequiya. Ma yahuajonei esohuihuohuijji poaja ehuohui ojo e'ejojonei poani bacajji quianaja. Jamajjeya quiaa oe esohuihuohuijji poacuanaja esohuicuana shajja-ajjaneicue. Ma huohuicapoquiapoa cuaa esohuicuana jiquio ecua cuaquijijiya meca jeaja'acani jamaya. Oja huohui esohuicuana jijipoquijetii. Eseja Emeshimesenei Jesosa Quito poeje o'oya, jamajjeya quiana majoya jjashahuabaquicapoquijjitii queaja'a jiquio ecua eshequihuiyejji jjapojjaquiani jamaya oya poeje o'oya. 20Jiquio esohui shajja-ajjaneicue. Ma yahuajonei esohuihuohuijji poacuaa huohuicapoa esohui yajja poaje quijje oenei dejjaja ejjashahuabaquijjijo yajja poanijje, acheshono jama pomeecaje baca-ajja. 21Ma yahuajonei oja sohuihuohuijji poa dejjacuaa ojayanei ejjashahuabaquijji huohuijjimanei acapoa. Ma dejjacuaa caca Eyacuiñajjija ejjashahuabaquijjinei huohuicapoquiapoa cuana Edojjoshahuapameja quia esohuiya, ojayanei pojjeama.
Currently Selected:
2 PEDRO 1: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
