1 TESALONICENSES 2
2
Pablohua esohui huohuicapoa cuana Tesalónica meshijo nequiya
1Jesosaja epeejji ecuanaja dohuecuana jjo'icuana pea-ai, miquianajaya eba ecuana queapame chacochaconaje miquianaja meshijo ani. Jamatii aniya pojjeama ecuana poquinaje. Miquiana sohuihuohuiya caca ecuana poquinaje cuamaya. 2Miquianajaya eba pea-ai ecuana ebionei Filipos meshijo nequi queacamajanee acanaje cuaa Eyacuiñajjija esohuijo. Esohui queatainee ecuanajo jeacuayacanaje cuaa. Majoya quijje miquianaja meshijo nequi eseja Eyacuiñajjiya ecuana queaca'a meteama pomeecanaje oja esohui queapame Quitojo miquiana huohuijji, jamatii majo nequicacuaa ecuana esohui huohuimeejjima a-ajjacanaje. 3Ecuaa esohui queapame Quitojo miquiana jjashahuabaqui'yojji huohuiquimajje esohui siajje ajjima'nei huohuime quiana anaje. Queaquehua jjashahuabaquiani pojjeamaa huohuiquinaje quiana. 4Miquiana oja esohui queapame Quitojo huohuiquinaje Eyacuiñajjija babaca poaniya oja huoojeaa, jamatii nequi poeya pojjeama. Bacue, ecuaa oja esohui huohuipoquiaña esenijje dejjacuanaja ecuana queapame poani ebajjijo pojjeama. Eyacuiñajji ecuananijje queabihui pojjijo ca ecuana chacochacopoquianitii oja esohuijo. Eyacuiñajjiya ajeo eseya chacochacopoquiani eseja eyamiquipajje queaja'a bacanitii. 5Eyacuiñajjiya ecuana bacanitii ecuaa quiana esohui huohuiquinaje miquianaja aquianacuana ejjeshejjijo pojjeama. Miquianaja bejjo jjeshejjijo pojjeama pea-ai ecuaa Eyacuiñajjija esohui huohuiquinaje quiana. Chojja de, majo pojjeama. 6Ecuana jjashahuabaquijjimanei poanaje a'a dejjacuaa ecuanaja chaco queapame poani bamajje ecuanajo queapame mimije. Chojja, ecuana jama jjapomeequisapo-ajjanei dejjacuanajo, miquianajo pea-ai. 7Bacue, ecuana Eyacuiñajjija babaca Quitoja huoojea miquiana sohuihuohuiquiya nequiquinaje miquiananijje. Jamajjeya ecuana bacajji poanaje quianaja etii poani miquiana huoojeajji. Chojja, ecuana jama pojjima'nei poanaje miquianajo. Ecuaa ca quiana ca oe queapame aquinaje joya ecua enaesecuaa oja bacuacuana queajeajo tojjoacani, jamaya ecuana miquianajo ponequinaje. 8Ecuaa quiana queajeanee anequinaje miquianaja meshiyasijje poquimajje. Eyacuiñajjija esohui queapame Quitojo mahuisonei huohuiya pojjeama ecuana poquinaje. Miquiana ojjañajo queabihui ba'emeesahuaa pea-ai ecuana majo pea-aiya poquinaje miquiana queajeanee poanijojoya. 9Miquianajaya eba pajea'yojjima achajja ecuana hueya-amanei chacochaconaje bobi jjeshejjijo miquianaja meshijo nequi. Epojjajo, mecajje pea-ai ecuana chacochacomajamajanaje miquianaja bobicuana huohuiajjajjima yajjijo miquiana majo queacamaja epo poanijje. Ma Eyacuiñajjiya ecuana huohuimeesa-acanaje esohui queapame Quitojo ecuaa huohuiquinaje miquianaja bobicuana huohuiajjapojjima' nequiya.
10Miquiaaya banaje achajja ecuana poeyanaje miquianaja meshiyasijje miquiana sohuihuohuiya. Eyacuiñajjiya ecuana bapea-aicanaje. Ecuana queapamenee, queamimishi epojjijo jjashahuabaquijjimanei aninaje miquiana Jesosaja epeejjicuananijje. 11Miquianajaya eba pea-ai ecuaa esohui miquiana queaca'a etiipoquijjijo, yenoama epo'yojjijo pea-ai huohuineinaje. Joya ecua echiimeseya oja bacuacuana esohui o queapame tiipoquijjijo huohuineicani, jamaya ecuaa quiana anaje. 12Ecuaa quiana huohuineinaje esohui jama ba'a: —Queapamenee oe ba'epoquicue jiquio ecua se Eyacuiñajjiya queapame ba'emeesa-acani jamaya. Ohuaya quiana nahueca'yonaje ojayatii epo'yojji. Eyacuiñajjiya quiana ba'emeecapoquije'yotii ma ohua queaca'aneetiiya queasajajanee nequiya huoojeacapoquianitii meshi Eyahuasijje.—
13Jamajjeya ecuaa Eyacuiñajji gracias apoquiañatii miquianajo. Miquiaaya Eyacuiñajjija esohui ecuaa huohuije shajja-ajjaneineinaje. Jama quiana poanaje ba'a: “Jiquio se ohuaya huohuicani dejjaja esohui pojjeama, Eyacuiñajjija esohui oja ye.” E'ejojonei jiquio ecuaa huohuiquinaje Eyacuiñajjija esohuinei poani. Cua miquiana ojaya esohuijo jjashahuabaquipoquije comaya quiana queaja'atii ba'epoquije. 14Judea meshijo nequica judiocuaa onijjejaajji queacamajanee pomeecanaje joya Eyacuiñajjija esohuijo jjachichaquipoquianicuana oja epeejji. Queameshihuisohuasijje ba'eca Jesosa Quitoja'yo poanicuana queacamajanee pomeepea-aicanaje cuaa. Ecuanaja dohuecuana jjo'icuana, miquiananijje ba'ecacuaa quiana queacamajanee pomeecanaje Eyacuiñajjija esohuijo oya jayojjaya. 15Yahuajonei judío etii poacuaa ma oja esohuihuohuijji poa dejjacuana manomeeca'yapoa. Majoya pea judío etii poanajecuaa yahuajo Emeshimesenei Jesosa manomeepea-aica'yapoa. Jjeya pea-ai judío etii poanicuaa ecuana queacamajanee pomeepea-aicani oja esohuijo. Eyacuiñajji ca ma dejja etiicuanajo queabihui po-ajja. Ma dejjacuanaya queaquene queamase popoquiani ojjañacuananijje. 16Ecuana judío pojjeamacuanahuasijje esohui huohuiya epoquijji nahueajjacanaje ma dejja judío etiicuaaya peajaajjicuana Eyacuiñajjija esohuijo ejjashahuabaqui'yo poanijje. Jamajjeya ma judío dejja etiicuana quea-ojamimishihuisoneetii nequipoquiani. Quijje macuanaya queaneenee pomeecaje'yo Eyacuiñajjiya oja mimishijo.
Pablo poquio'oyasaneipoa Tesalónica meshijo ba'eca Jesosaja epeejjicuana ba'yohua
17Jesosaja epeejji ecuanaja dohuecuana jjo'icuana, ecuaa pea meshiyasijje epoquijji queayenonee miquiana jiñanaje. Queahuesha pea meshijo nequi ecuana jjashahuabaquipoquinajetii miquianajo jamatii ecuanaja ecojjaja miquiana ba'yojjimatiijo. Ecuana poquio'oyasaneipoanaje miquiana ba'yohua. 18Ecuana epoquineijji nisho po-ajjanaje. Eya ca iña Pablo epoquineineijji nisho queahuiso po-ajjanaje miquiana ba'yohua. Jamatii ebionei eshahua Satanás bajjaniya eya poquimeejjima acanaje cocuamaya miquianaque. 19¿Ajeo shai ecuana queabihui jjaishoaquipoquiani, ajeo shai ecuana queabihuinee poaje? Bacue, miquianaya queaja'anee ba'epoquiani ecuanaja sohuihuohui shajja-ajjamajje ecuana queabihui poani majoya. Eseja Emeshimesenei Jesosa Quitohua miquianaya queaja'a ba'epoquiani bamajje ecuana queapame chacochaconaje miquianajo sosejje quijje quiacaje. 20E'ejojonei ecuana queabihuinee poani miquianaya queaja'anee ba'epoquiani shajja-ajjamajje. Queahuisocuaa ecuana bacanaje miquiana sohuihuohuijji epo jamajje ecuana majoya queabihui pea-ai poani.
Currently Selected:
1 TESALONICENSES 2: ESE
Highlight
Share
Compare
Copy
Want to have your highlights saved across all your devices? Sign up or sign in
Copyright Mision Nuevas Tribus, 2006
