1 CORINTIOS 9

Achajja Eyacuiñajjija babaca dejjacuana ona sohuihuohuiquinequijji poani ba'ecajji tehuecapoa

1Miquianajaya eba poani eyaya e'ejojonei Jesosa eseja Emeshimesenei ecuea ecojjaa bapoa. Jamajojoya aje eya oja babaca ona sohuihuohuiquinequijji poani bacajji quianaja. Eya e'ejojonei Eyacuiñajjija esohuijo chacochacopoquianijojoya miquianaya jjashahuabaqui'yonaje ojaya esohuijo. Jamajjeya ¿a'a miquianaya jjashahuabaquiani eya chacochacopea-aicajji bobi jjeshejjijo? ¡Chojja de! 2E'e pojja'a peacuaa miquianaja meshijo ba'ecacuaa eya Eyacuiñajjija babaca pojjeama poso acani, oja huoojea pojjeama poso pea-ai acani. Miquiaaya ca jama pojjeama, e'ejojonei eya oja babaca ona sohuihuohuiquinequijji poani baña. Eya sohuihuohuiajje quiana Jesosajo jjashahuabaqui'yonaje. Jamajjeya miquiana jama po'yonaje jjabaquimajje eya Pablo e'ejojonei Emeshimeseneija babaca poani bacajji quianaja poanaje.

3Jjeya eyaya queaja'a huohuije joya e niñebajji poanicuanaja joya oja babaca pojjeama huohuijji poanicuanaja pea-ai queaja'a e oja bajji. 4Ecuanaja joya Eyacuiñajjijo chacochacopoquianija miquianaja quia bobi, aquianacuana jjeshecapoquijji poanaje ecuana queapame ba'epoquijji. 5Eya shacuijjiyajjemo ecue huanase Jesosaja epeejji ecuea dojocajji pome enijjetii jiquio ecua pea oja babacacuaa oja huanase onijjetii dojocani cua o poquijeyasijje ona sohuihuohuiya, jama pea-aiya ecuea acajji. Ma ecua Emeshimesenei Jesosaja chahuacuaa acanaje jama pea-ai ecuea acajji. Pedrohua oja huanase dojocanaje onijjetii, jamajjeya jama pea-aiya ecuea acajji. 6E'e pojja'a ¿a'a queapame ecuananei eya, Bernabé pea-ai bobi jjeshejjijo chacochacocapoquijji miquianaja asahuajjima? Chojja de, jama queapame pojjeama. Ecuana pea-aiya miquianajaya asahuacapoquijji poanaje e'ejojonei Eyacuiñajjija babaca poanijojoya. 7Bacue, soldadocuana oja bejjoneijo bobicuana jjesheajja. Emeshimeseya oya bobi quiacani sosema'. Oya jayojjaya meshi chacojji poanicuaa oja bana sejja'yomajje ijjiacani sosema'tii. Oya jayojjaya joya ovejacuanajaahuanajji poanicuaa ovejaja tojjona' ishicani sosema'tii. 8¡A'a jiquio eya aña esohui dejjaja ejjashahuabaquijji mahuiso poani poso ajji! Eyacuiñajjija esohui Moisesja tehuecuana yahuajonei oya jayojja pea-ai poa. 9Oja esohui etehue jaa jama poani ba'a: “Joya macaa anosoai quishisajacaniya ejjii quishijjojjajji, a'a oja naba jeyojji. Ojaya macaja anosoai ijjiacajji pea-ai.” Jiquio esohui etehue jama poanijje pojjeama Eyacuiñajjiya macacuananeijo jjashahuabaquiani. Chojja, majonei pojjeama. 10Jiquio esohui ca jama poanijje Eyacuiñajjiya eseya queajeanee acapoquiani esejo jjashahuabaquipoquianitii. Eyacuiñajjiya oja esohui tehuemeecapoa esejo, esejaya yajji, eseja bapoquiajji. Bacue, joya meshi chacojji poanicuaa ishoacani oja bana quijje eijjiajji oja chaco sosejje. Oya jayojjaya joya ejjajja sejja'yojji poanicuaa oja sejja'yo ijjiacaje oja chaco sosejje. 11Ecuaa quiana Eyacuiñajjija esohui huohuineinaje jiquio ecua eso' quejo banacani cuaa, jamaya ecuana esohuijo chacochaconeinaje. Jamajojoya aje che ecuana bobi quiacajji poanaje quianaja, ecuana asahuacajji pea-ai poanaje ma ecuaa miquianaque esohuijo chacochaconeinaje sosejje. 12Pea Eyacuiñajjija esohuihuohuijji poanicuana ca quiaa ca oe asahuanaje, bobi quianaje pea-ai. Jamajjeya quianaja oe ecuana pea-ai asahuacajji poanaje, bobi quiacajji poanaje.

Ecuana caca chacochaconeinaje bobi jjeshejjijo, jamajjeya ecuanaja quiana huohuiajjajjima poanaje bobi quiajjijo. Ecuana jamaya poanaje miquiaaya majonei chacochacoani ea poanijje mihuohuiajjanaje quiana. Majonei ecuana chacochacoani poso bamajje ecuanaja ye esohui queapame Quitojo shajja-ajjasapo-ajja quiana pojja'a pome. 13Miquianajaya eba poani ojjaña joya judiocuana Eyacuiñajjija equi-aijo chacochacoanicuanaya ma echacojoya queapame ba'epoquiani. Ehuonecuana onaja ye enaa jehui'yo Eyacuiñajji quiajji etiicuaa dahuacani. Majoya quijje majo chacochacoanicuaa onaja quia noe yami oepojji ijjiaca'yani. 14Oya jayojjaya Emeshimesenei jama poani joya oja esohui queapame Quitojo huohuiquijji poanicuana ma echacojoya queapame ba'ecapoquijji. 15Eya pea-ai jiquio echacojoya queapame ba'ecapoquijji poanaje jamatii bobi, aquianacuana e ba'emeesahuajji ecuea jjeshejjimatii. Jjeya eyaya jiquio esohui tehueaña miquianaja e bobi quiajjijo pojjeama. Jama posapo-ajja eya. Jamajjeya ecuea majo ehuohuiajjajji pojjeama quiana. Esosejje eyaya sohui huohuiaña eaca poanijje cuaa mihuohuiajjaña majoya. Eya mano'yosapome eyaya sosejje esohui huohuiaña onaa acajje.

16E'ejojonei eyaya esohui queapame Quitojo queahuiso huohuipoquiaña cuana jamatii eyanei queaca'a poani jjabaquiajjaa. Yahuajonei Eyacuiñajjiya eya babacacapoa majoya oja esohui huohuiquinequijji epojji. Eya majo michacochacotiimajje queayenonee pome. 17Ecueanei ejjashahuabaquijjijo eya esohui huohuijji poanijjemo eya sosequiacajji cuanaja pome jiquio ecue chaco sosejjeya. Jamatii ecueanei ejjashahuabaquijjijo pojjeama eya babacacapoa oja esohui huohuiquinequijji epojji. Jamajjeya Eyacuiñajjiya eya queaja'a hueya-ama chacomeesa-acani ojo joya ecua dejja peaja aquianacuanajaahuananeijji poani jama. 18¿Ae shai eyaya jjesheje jiquio eya chacochacopoquiani sosejje? Bacue, eyaya Eyacuiñajjija esohui queapame Quitojo huohuiaña queabihui poaniya jamatii onaja esosequiajji pojjeamaa. Majoya eya queabihui poani jamajotii sosemajo. Ecuea quiana huohuiajjacajji poanaje e ba'emeesahuajji aquianajo ecue chaco sosejje, jamatii ecuea quiana huohuiajjajjimatii poanaje.

19Eya sosequiajjima acani cuaa esohui huohui sosejje. Jamajje chama'nei e chacomeejji poani dejja. Eya ca joya ecua dejja ejjeshe peajo chacochacopoquianitii, jama pea-aiya eya jjapomeequiani ojjañacuanajo. Jamaya eya jjapomeequiani queahuisocuanaja ecue huohui eshajja-ajjajji. Majoya Quitojo jjashahuabaquije'yo cuana. 20Eya judiocuananijje animajje oya jayojja pea-ai ba'epoquinaje onijje ejjapeequijji o Quitojo ehuohuijji. Joya Moisesja tehuecuana jayojja ba'epoquianicuana oya jayojja pea-ai eya ba'epoquinaje onijje ejjapeequijji, o esohui Quitojo ehuohuijji pea-ai. Jamatii Moisesja tehuecuana jayojja eya ba'etiipoquiajja Eyacuiñajjija eya mimishima'yo ebajji. 21Eya judío pojjeamacuananijje animajje joya Moisesja tehuecuanama'nijje animajjeya oya jayojja pea-ai ba'epoquinaje onijje ejjapeequijji o esohui Quitojo ehuohuijji. Jamatii eya queamimishi ba'eajja, eya caca Eyacuiñajjija esohui jayojjatii ba'epoquiani, Quitoja jayojja pea-ai eya ba'epoquiani. 22Joya Jesosaja epeejjicuana ca'a-ama poaninijje animajje eya oya jayojja pea-ai ba'epoquinaje onijje ejjapeequijji. Jamaya eya nequipoquinaje macuana jayojja pea-ai epojjiya o Quitojo queaca'a etiipoquijji. Jamaya eya jjeya pea-ai ba'epoquiani, peacuanajo jjashahuabaquiani onijje ejjapeequijji o esohui Quitojo huohuiajje ejjanahuemeequijji. 23Eya jamaya ba'epoquiani peacuana esohui queapame Quitojo sohuihuohuipoquiajji. Majoya Eyacuiñajjiya eya queabihui ba'emeesahuacaje, ma eya huohuiquije cuana pea-ai.

24Miquianajaya eba quebanei poanijo queahuisocuana cuajicuajiani aquiana queapame jjeshejjijo. Jamatii queahuiso cuajicuajiani oeya aquiana queapame jjeshecaje ma ebionei poejeya. Jama epojjiya Eyacuiñajjijo queaca'a ba'epoquicuetii, jjashahuabaquiani quijje Eyajo ani'yo quiana Eyacuiñajjiya aquiana queapame quiacaje queapame ba'epoquinaje sosejje. Jiquio ecua dejja aquiana queapame ejjeshejjijo cuajicuajineianitii jama pea-aiya oe queaja'atii ba'epoquicue. 25Joya cuajicuajijecuana jjajaahuanaquiani. Oja yami queaca'a pomeecani ecuajicuajineijji. Jamaya poani cuana acui-iña esipi oja sapajo etiija eiyacuajijji ojjaña majo nequicaja oya ebihuiacuajijji. Majoya oja sipi shocanacuaji'yani. Eyacuiñajjija quia ca ma eseya quijje jjesheje jama pojjeama poaje, anitiitiipoquije'yo. 26Eya Eyacuiñajjijo hueya-amanei chacochacopoquiani joya ecua dejja aquiana queapame jjeshejjijo cuajicuajineiani jamaya. Joya ecua dejja ehuoo jjashahuacuiaquiani jama pojjeama eya ba'epoquiani. E'ejojonei eya queaja'a ba'epoquiani ojo echacochacopoquijji, jamatii pojjeama. 27Jamajjeya eya jjajaahuananeiquipoquiani. Ecue eyami nahueneiaña queamimishi epo'yo poanijje. Eya nequipoquiani queahuisocuana sohuihuohuipoquiajji epojji. Eya queamimishi ba'epoqui'yomajje ca ecuea ejjeshejji pojjeama poaje ma quijje Eyacuiñajjiya queapame quiacaje cuana, jamatii ecuea peajaajjicuana sohuihuohui epo nequiya.

Currently Selected:

1 CORINTIOS 9: ESE

Highlight

Compare

Copy