1 CORINTIOS 7

Esohui ejjahuanaquijjijo ejjahueaquijjijo tehuecapoa

1Jjeya eyaya huohuije'yo ma miquiaa e huohuiajjanaje etehue ma miquiaa huoojeanajejo. Eya jjashahuabaquiani dejjacuana jamatii shacuima' nequi eponanijje jaaca-ajja. 2Dejjacuana, eponacuana pea-ai ojee jaasapopoquijetii ejjacojjoquijji. Jamajjeya oe ojjaña dejjacuana huanasejji pocajji, ojjaña eponacuana pea-ai ahuejji pocajji oya peacojjojji epo poanijje. 3Majoya ojahue oja yami nahueama oja huanasenijjenei jaapoquije. Ehuanase pea-ai oya jayojja oja yami nahueama jaapoquije ojahuenijjenei. 4Ehuanaseja ojayaneitii poani oja yami baca-ajja. Jjeya ca ojahueja pea-ai poani ojo jjahueaquimajje. Oya jayojjaya yahueja ojayaneitii poani pojjeama oja yami ojo jjahuanaquimajje. Oja huanaseja pea-aiya poani. 5Jamajjeya yahuecuana, ehuanasecuana pea-ai a'a oe jjanahuequijji onijje ejaapoquijji. Becacuana pojja'a mimije ojee ehuanasenijje jaajjima epojjijo so'o Eyacuiñajjinijje emimineijji. Jamaya queapame. Majoya aje quijjepishana oya jaaje'yo ehuanasenijje, yahuenijje pea-ai. Jama mijaao'oyajo ebionei eshahua Satanás bajjaniya oya queamimishi pomeecachana eyami nahuecajo peanijje ejaajji.

6Ecuea esohui jama ajjima' ojjañatii jaapajeacajji so'o Eyacuiñajjinijje emimineijji. Eya jama jjashahuabaquiani ba'a: Cua jama posapoani yahue oja huanase pea-ai Eyacuiñajjinijje emimineijji cajaapajeasahua. 7Ecueanei ejjashahuabaquijji jama poani ojjañacuana eya jama pea-ai pocajji shacuima'. Eyacuiñajjija ejjashahuabaquijji ca ojjañatii jama epojji pojjeama shacuima', ahuema' pea-ai eba'epoquijji. Ojjañatii pojjeama Eyacuiñajjiya queaca'a pomeecani jjahuanaquijjimatii, jjahueaquijjimatii pea-ai eba'epoquijji. Peacuana ohuaya jjahuanameequicani, jjahueameequicani pea-ai.

8Ahuema' anicuana, eahuemano'yocuana pea-ai queapame poani ahuema'tii eba'epoqui'yojji. Joya shacuima', eshacuimano'yo nequica pea-ai queapame poani shacuima'tii eba'epoqui'yojji jiquio ecua eya jama shacuima'tii nequipoquiani jama pea-ai epojjiya queapame. 9Jamatii joya jjashahuabaneiquipoquianitii eponanijje ejaajjijo dejja cajjahuanaquiahuaya. Eponacuana pea-ai joya dejjanijje jaasaneipoani cajjahueaquiahuaya. ¿Apiojji majonei jjashahuabaquipoquijetii jamatii jjahuanaquijjima, jjahueaquijjima ba'e? Apiojjipishana.

10Eyaya jjeya joya jjahuanaquinaje, jjahueaquinaje pea-ai huohuije jiquio Eyacuiñajjija esohui, ecuea pojjeama. Jamajjeya ehuanaseya ojahue hueica-ajja. 11Epona ojahue hueimajje jamatii anica'yojji pea dejjajo jjahueaquica'yoajja. Ojahueneitii oyaya jjesheca'yojji ehuanase jama sapo'yomajje. Oya jayojja yahueya oja huanase hueica-ajja.

12Eyaya jiquio pea esohui ejjahuanaquijjijo huohuije, Emeshimeseneija esohui ca majo chama' so'o, jiquio meshijo nequija huohuijjima poa. Jesosaja epeejjija ehuanase queapame ba'epoquiani onijje jamatii oja huanase Jesosaja epeejji pojjeama ani ojahueja oya hueica-ajja. 13Ehuanaseja Jesosa epeejji pojjeamajo jjahueaquija queapame ba'epoquiani onijje ojee ojahue hueica-ajja. 14Ojahue jamatii Jesosaja epeejji pojjeama nequi Eyacuiñajjiya oya queapame onijje ba'epoquiani bacani oja huanase Jesosaja epeejji poanijojoya. Oya jayojjaya oja huanase onijje queapame ba'epoquiani bacani Eyacuiñajjiya ojahue Jesosaja epeejji poanijojoya. Ehuanase Jesosaja epeejji poanijojoya oja bacuacuana pea-ai Eyacuiñajjiya queapame bacani, oya jayojjaya yahuejo. Oja nae oja chii Jesosaja epeejji hueicajo oja bacuacuanaja Eyacuiñajjija esohui bajjima poaje. 15Yahueya joya Jesosaja epeejji pojjeamaa oja huanase Jesosaja epeejji poani hueisanei-amajje cahueicahuaya. Oya jayojjaya ehuanaseya Jesosaja epeejji pojjeamaa ojahue Jesosaja epeejji hueisanei-amajje cahueicahuaya onijjetii ojee eba'epoquijji pojjeama poaje'yo. Eyacuiñajjiya quiana queabihui queneama ojee ba'emeesa-acani, jamajjeya Jesosaja epeejji pojjeamacuana jama posapomajje jjasejjaquica'yojji ojo. 16Ehuanase Jesosaja epeejji poani quiana miqueahue minijjetii ba'epoquianijo, ¿a'a shai oya pea-ai Jesosaja epeejji pome? ¡E'e, oya jama pea-ai pocajji jama sapomajje! Oya jayojjaya quiana yahuecuana Jesosaja epeejji poani mique huanase minijjetii ba'epoquianijo, ¿a'a shai oya Jesosaja epeejji popea-aime? E'e, oya jama pea-ai pocajji jama sapomajje. Eyacuiñajjiya miya jama pomeesa-acanijo jamaya pocue.

17Eyaya esohui huohuiañatii ojjaña miquiana ba'ecapoquijjitii ma ecua Eyacuiñajjiya miquiana Jesosajo jjashahuabameequica'yapoajo jama. Oya jayojja huanasejji, ahuejji pea-ai ba'ecapoquijjitii jamatii mimishiama. Miquianaya joya Jesosaja epeejji pojjimahua ba'e huanasejjitii, ahuejjitii pea-ai poanajecuana oya jayojjatii ba'ecapoquijji. Jamaya eyaya queameshihuisojo ba'eca Jesosaja epeejjicuana ejjachichaquipoqui huohuiañatii. 18Eyacuiñajjiya quiana becacuana ecuiishashajehuisejja iyaacanaje ojaya epeejji epojji. Jamajjeya ¿ajeo queabicho epojji ecuiishashajehuisejja poani jjabaquimajje? ¡Ajeopishana! Pea quiana ca Eyacuiñajjiya iyaacanaje joya cuiishashaña. Jamajjeya a'a majo queapame epoaje poso jjacuiishashajehuisejjameepea-aiquijji. 19Joya Eyacuiñajjija esohuijo jjashajja-ajjaneiquipoquianicuana comacuanajoya Eyacuiñajji queabihuinee poani. Joya cuiishashañacuana, ecuiishashajehuisejja pea-ai jamajo pojjeama oya queabihui poani. 20Jamajojoya aje quiana oya jayojjatii popoquije ma Eyacuiñajjiya quiana iyaacanajejo oja epeejji epojji. 21E'e pojja'a beca quiana ejjeshe peajo chacochacopoquianitii Eyacuiñajjiya iyaacanaje oja epeejji epojji. Jamajjeya ¡a'a majotii queayeno popoquijji! Mi chacomeejji poaniya ojo echacochacopajea'yojjijo huohuicajje cuayaqui'yocue. Jama pea-aiya queapame epo'yojji. 22Bacue, joya Eyacuiñajjija iyaa oja epeejji poani jamatii peajo chacochacopoquianitii ejjeshe comacuanaya Eyacuiñajjiya oja nahue'yo bacanitii. Jamaya ohuaya bacani cuana ojaya'yo, apoa epo ojo echacochacopoquijji. Joya Eyacuiñajjija iyaa oja epeejji poani jamatii peajo chacochacojjima nequi coma dejja pea-aiya chacochacopoquije queahuiso Quitojo. 23Eyacuiñajjiya quiana jjesheca'yonaje Jesosa mano'yapoa sosejje ojayatii epo'yojji. Jamajjeya miquiana ojaya esohuijo jjashajja-ajjaquicapoquijji, peaja esohuijo jjashajja-ajjaquica-ajja. 24Ecue dohuecuana jjo'icuana, miquianaya ma ecua Eyacuiñajjiya quiana iyaacanajejo jama pea-aiya ba'epoquije peajo chacochacoani, peajo chacochacojjima, queapame Eyacuiñajjijo.

25Miquiaaya eya huohuiajjanaje jama ba'a: A'a eponacuana ahuema' anica jamatii ba'ecapoquijji ahuema'tii jjahueaquijjima. Emeshimeseneija esohui ca majo chama' etehue. Jamajjeya ecuea ejjashahuabaquijji majo huohuije so'o. Eyacuiñajjiya eya queapamenee acaniyajjejojoya eya huohuimeesahuacani queaja'a, jamajjeya jiquio shajja-ajjacue so'o. 26Jjeya eseya jiquio meshijo queacamajanee ba'epoquiani. Jamajjeya eyaya quiana niñesheaña jiquio ecua quiana jjeya ba'epoquiani jama ahuema' ani, shacuima' nequi pea-ai oya jayojjatii ba'epoquicue. 27Pea quiana ca shacuijji poani ejjahuanaqui, jamajjeya a'a oya hueijji. Pea quiana shacuima' nequi, a'a oe epona sajji. 28Jamatii epona saneineimajje ejjahuanaquijji miquiana queamimishi pojjeama poani majoya. Oya jayojja eponacuana ahuema' anica yahue saneineimajje ejjahueaquijji queamimishi pojjeama poani pea-ai. E'ejojonei joya jjahuanaquije jjahueaquije queacamajapishana ojee ba'eje yamijjijjejojoya. Jamajjeya miquianaya queacamaja ojee ba'e pomeesapo-ajja.

29Ecue dohuecuana jjo'icuana bacue, epojja oe-ejjenei beshahuanei apoa. Jamajjeya joya shacuijji quiana poani ejjahuanaqui, ¡a'a oe majotii jjashahuabaquipoquijji! Eyacuiñajjijo echacochacojji oe jjashahuabapea-aiquicue. 30Joya queayenonee poanicuana majotii jjashahuabaquica-ajja queayenotii epojjijo. Joya jjeya queabihuinee poanicuana majotii jjashahuabaquica-ajja queabihuitii epojjijo. Joya aquianacuana jjeshejji poanicuana majotii jjashahuabaquica-ajja oja jjeshe aquianacuanajotii. 31Eseya jiquio meshijotii ba'epoquiani jamatii jiquio meshijotii eba'epoquijjijo mahuisotii jjashahuabaquicapoquiajja jiquio meshijo ani aquianacuana eseya baña huisotii oe popoquianijojoya.

32Eyaya quiana jiquio meshijo anica aquianacuanajo jjashahuabaquimeetiisapo-ajja aña majo queayeno epo poanijje. Bacue, joya shacuima' nequicacuana Emeshimeseneijo chacochacosapomajje oya chacochacopoquije Eyacuiñajji queabihui pomeejji, oya aquianajo jjashahuabaquiajja. 33Joya shacuijjicuana ejjahuanaqui ca jiquio meshijo anica aquianacuana queahuisojo jjashahuabaquipoquiani oja huanase queabihui pomeejjijo. 34Jamaya oya jjashahuabaqui beca poani oja huanase ojo queabihui epojji, Eyacuiñajjijo echacochacojji pea-ai. Ahuema' anicuana joya jjahueaquijjima Eyacuiñajjijonei jjashahuabaquiani ojo queapame echacochacopoquijji. Oya jjaquiaquiani ojo echacochacojji, oja sapadojjo pea-ai nahuecani Eyacuiñajjijo queaja'a eba'epoquijji. Joya ejjahueaqui anicuana ca jiquio meshijo anica aquianacuanajo jjashahuabaquipoquiani ojahue queabihui epojjijo.

35Eyaya jamaya huohuiaña miquiana jjahuanaquijjima, jjahueaquijjima epojjijo pojjeama. Eyaya ca jamaya huohuiaña miquiana queapame echacochacopoquijji Eyacuiñajjijo, queaja'a eba'epoquijjijo pea-ai. Beca jjashahuabaquime miquiana epojjijo pojjeama huohuiaña.

36Oe miquiana dejja shacuima' nequi tiinaje ejjahuanaquijji jjabaquimajje epona ahuemaja echiimesenijje miminaje oja bacuase huanajjijo. Majoya oya jjashahuabaquinaje Eyacuiñajjijo echacochacopoquijji jamatii shacuima' nequi. Oja mesena ani eponanijje jaasaneineipomajje cajjahuanaquiahua oya ojo. Jama ca queamimishi epojji pojjeama. 37Pea quiana ca jjashahuabaquiani jamatii shacuima'tii enequipoquijjijo, ahuema' eanipoquijjijo. Eponanijje jaasapo-ajja, dejjanijje jaasapo-ajja. E'e jama posaneipomajje queapame ba'epoquije quiana shacuima', ahuema'. 38Jamajjeya joya oja mesena ani eponajo jjahuanaquije dejja queapame poani Eyacuiñajjiya bacani. Joya jamatii nequipoquije dejja, joya jamatii anipoquije epona queapamenee bapea-aicaje Eyacuiñajjiya.

39Epona ejjahueaqui anija ojahue eshe nequi ojaya ehueijji pojjeama. Oya ojahue mano'yajo cua o jjahueaqui'yosapoaje dejjajo jjahueaquica'yojji joya Jesosaja epeejji poani dejjajo, peajo ca cho. 40Eya ca jjashahuabaquiani oya queabihui ba'epoquije jamatii ani ahuema'tii jjahueaqui'yojjima. Jiquio ca ecueanei ejjashahuabaquijji miquiana niñesheajji anaje. Eya pea-ai Eyacuiñajjija Edojjoshahuapame yamijji poani e queaja'a jjashahuabameequijji.

Currently Selected:

1 CORINTIOS 7: ESE

Highlight

Compare

Copy