من حكمة النبي سليمان 3
3
من توصيات النبي سليمان عليه السلام: اتّكَل عربَّك ومش عنفسَك
1يا إبني لا تنسى شو علَّمتَك،
حْفاظ توصياتي عن ضهر قلبَك.
2لأنّه بتعيش عيشة هنيّة، وبْيِطوَل عمرَك.
3خلّي الأمانة والوفا جنبَك،
حْفَظُن جوّاتَك، أسلوبَك ونهجَك.
4وهيك ربّ العالمين والناس بيرضوا عنَّك،
وبتصير سمعتَك منيحة، وبيرتفِع شأنَك.
5توكَّل عاللّه يا إبني، وثاق فيه من كلّ قلبَك،
وما تعتمد عفِهمَك.
6حاوِل بكلّ طُرُقَك تتعرَّف عالعليّ العظيم،
وهوّ بيِهديك عالصراط المستقيم.
7لا تشوف حالَك وتتباهى إنّك راشِد وفهيم،
ولكن اتّقِ ربَّك، وابعود عن الشّر والعمل اللئيم.
8وهيك بتِجيك الصحّة والعافية،
والقوّة الشافية.
9كرِّم ربَّك وأعطِ من مالَك،
ومن أجود إنتاجَك.
10وبوقتا بتِنْتِلي مخازنَك قمح وشعير،
وبتفيض معاصرَك عصير.
11يا إبني، لا تستخِف لمّا اللّه يدلَّك عالصحّ، ولا ترفُض تأديبُه.
12لانُه اللّه بأدِّب الّي بحبُّه، متل ما بيعمُل الأب مع إبنُه حبيبُه.
قيمة الحكمة
13هنيئاً ليلّي عالحكمة وصِل،
وليلّي عالفِهِم حُصِل.
14لأنُّه الحكمة أكتر من الفضّة والدهب مكْسَبها،
15أغلى من الجواهر والزينه،
وكلّ كنوزَك الثمينة،
ما بتعادِلها.
16من جهة بتقَدِّملَك عمر طويل،
ومن جهة تانية بتعطيك جاه ومقام جليل.
17طرُقها طُرُق بتقودَك للنِعَم،
وكلّ دروبها خير وسِلِم.
18هيّ بتعطي طول العمر لمِقْتِنيها،
وهنيئاً ليلّي بيِتمسَّك فيها.
19فربّنا خلق الأرض بحكمتُه،
ورفع السماوات بمعرِفتُه.
20وبعِلْمُه المُطلَق الينابيع تفجَّرِت،
والغيوم أمطَرِت.
كيف منتعامَل مع الآخرين
21يا إبني، خلّي بُعْدْ النَظَر وحسن التدبير،
يلازْموك بأيّ قرار وتفكير.
22لأنُّه فيهُن بيِطوَل عمرَك،
وحياتَك رِضى بتصير.
23وهيك بتعيش بأمان،
وبتمشي بإطمِئنان.
24وبلا خوف لمّا بتنام،
نوم عميق وأحلامَك سلام.
25فلا تخاف من أيّ مُصاب،
ولا من أيّ بلاء بحلّ بالأشرار إذا صاب.
26لأنّه اللّه هوّ يلّي بيحفَظَك،
وبيحميك وبيحِرسَك.
27يا إبني، لا تمنَع الخير عن أهلُه،
إذا طالِع بإيديك تعملُه.
28إذا جارَك طلَب منَّك شي وهوّ عندَك،
لا تقلّه: "روح هلّأ، تعا بكرة بعطيك شو بدّك".
29لا تخطِّط وتِأذيه لجارَك،
يلّي ساكِن جنبَك ومطَّمَنلَك.
30ما تِخاصِم حدا بلا سبَب،
إذا مش عامِل معَك ذنِب.
31لا تِحسُد الظالمين عشو معاهُن،
ولا تمشي ممشاهُن.
32لأنّه اللّه بيِكره الضّالين،
أمّا ثقَتُه فبيوضعها بالمستقيمين.
33لعنة اللّه بتلحِق بيت الأشرار،
ولكنُّه ببارِك بيوت الأَبرار.
34ومتل ما بيستَهزِيء من المستهزئين،
فهيك بيعطي نعمة للمتواضعين.
35وأهل الحكمة بنالوا المقام الجليل،
أمّا الجاهلين فمقامُن قليل.
Currently Selected:
من حكمة النبي سليمان 3: LRT
Highlight
Share
Copy
Want to have your highlights saved across all your devices? Sign up or sign in
© 2021 Sabeel Media
