من الإنجيل – عن متّى 5
5
أخلاق أتباع المسيح
1بيوم لمّا شاف سيدنا عيسى (سلامه علينا) جَمِع من النّاس عم تِتْبَعُه،
قام طُلِع على تلّة وقعد تيعلِّم، وإجوا حوارييه قرّبوا منّه تيِسمعوا،
2-3وقال: "هنيئاً للمتواضِع قلبُن إدّام ربُّن،
لأنُّه المملكة الربّانية من نصيبُن.
4هنيئاً للحزانى المقهورين،
لأنُّه الله رح يواسيهُن ويكونوا متعزّيين.
5هنيئاً للبُسطا المُسالمين،
لأنُّهن المملكة الربّانية يلّي وعدهُن ربنا فيها وارتين.
6هنيئاً ليلّي لطاعة الله متعطشين،
لأنّه الله رح ينصفهُن ويكونوا راضيين.
7هنيئاً ليلّي بيرحموا غيرُن، لأنّه الله رح يرحمُن.
8هنيئاً ليلّي قلوبُن طاهرة، لأنُّه الله بشَوْفْتُه رح ينعَم عليُن.
9هنيئاً لصانعي السّلام، لأنُّه "عيالُ الله" رح يتسمّوا.
10هنيئاً للمضّطَهدين بسبيل طاعة الله، لأنّه للمملكة الربّانية رح ينضمّوا.
11هنيئاً إلكُن إذا طردوكُن أو شتموكُن، لأنكُن أتباعي،
أو حتّى كذَّبوكُن، 12لا تحزنوا أبدا، ما في داعي،
بالعكس! افرحوا كتير وانبسطوا من كلّ قلبكُن،
لأنُّه أجركُن كبير عند ربكُن
فهيك اضْطَهدوا الأنبيا يلّي قبلكُن."
إنتو ملح ونور الأرض
بعد ما خطب سيدنا عيسى (سلامه علينا) بأتباعُه وسمعوه
وأعطاهُن تشجيع وفكرة عن كيف بيتبعُوه.
كفّى تعليمُه وقال: 13"إنتو الملح للنّاس
بس إذا الملح ما عاد ملَّح،
ما في شي بِرَجّعُه، وما بقى لشي يِصْلَح،
إلّا إنّه ينكب برّة ويِنداس.
14إنتو نور العالم،
متل مدينة عراس جبل، ما بْتِخْفَى عحدا، واضحة المعالِم.
15في حدا بضوّي قنديل وبقوم بغطّيه!
ولّا بحطُّه بأعلى مطرح تينوّر القرنة كلّا وقت يضوّيه؟
16فكونوا نور الله عالأرض إدّام النّاس
وهيك بشوفوا أعمالكُن الصّالحة بالأساس،
وبيِتّجهوا لوليكُن الرحمن يلّي بيهتم فيكُن متل الأب الحنون.
وبِقَدموا الشكر والتسبيح لله في عُلاه، ربّ الكون."
عيسى بكمّل التوراة ما بينقضها
17"ما تفكروا إنّي جاية إنقُض التّوراة أو كتب الأنبياء وإلغيها،
لأ! أنا جيت لكمِّلها.
18فبقلّكُن الحقيقة، طالما السما والأرض موجودين،
ما بيِتغيّر حرف واحد أو بتِسقُط نقطة من الشريعة حتى يتحقّق كلّ المكتوبين.
19فكرمال هيك يلّي بخالِف حتى أصغر وصيّة،
وبعلِّم الناس يعملوا متلُه، ف رح يكون إلُه أقل مقام بالمملكة الربّانيّة.
أمّا يلّي بعلِّم هالوصايا وبيعمِل متلا،
فإلُه بهالمملكة المقام الأعلى.
20وبقلكُن الحقيقة كمان، إذا كانت طاعِتكُن ما بتزيد عن طاعة علما شريعة التوراة والمتشدّدين،
فمش رح تنعموا برضاه تعالى وبدخول المملكة الربّانيّة."
والحمد لله ربّ العالمين.
قول المسيح بالعلاقات بين الناس
21"إنتو سمعتوا الكباريّة
عم بيحكوا من التوراة بهالوصيّة،
يلّي بتقول "لا تقتُل،
وإنُّه يلّي بيِقتُل إدّام القضاء بيِمثُل."
22بس أنا بدّي وضِّح هالوصيّة:
يلّي بس بيِغضَب من إخواتُه المؤمنين رح يحاسبُه قضاء ربّه الأعظم.
ويلّي بسبُّن عالمحاكِم بيِتقدَّم.
ويلّي بقول لحدا: "يا غبي" خرجُه نار جهنَّم.
23فكرمال هيك إذا جيت تقدِّم ضْحيّة لربَّك،
وتذكّرِت إنُّه مزعَّل خيَّك،
24فاتروك ضحيتَك، روح صالحُه ورجاع قدِّم شو عندَك.
25وكمان، حاوِل بسرعة تتصالَح مع خصمَك،
وإنت رايِح معُه عطريق المحكمة، حتّى للقاضي ما يسلّمَك،
ومن القاضي للسجّان يلّي بالحبس بِكبَّك.
26وما بتعود تِطلَع منُّه إلاّ ما تِدفّع آخر قرش عليك، أنا بأكِّدلَك."
قول المسيح بالزنى
27"لا تزني". هالوصيّة قالوها بالتوراة. فلكلّ يلّي سِمعا،
28أنا بدّي وضِّح هالوصيّة: يلّي بس بيِتطلّع عمرة وبيِشتهي ينام معا،
بكون بقلبُه زنى والشّهوة صنعا.
29-30وبهالحالة، إذا مَثَلاً عينَك أو إيدَك بتغلط والآخرة بتخسّرَك،
فعينَك قلَعا وإيدَك قطَعا.
فإنُّه تفقُد عضو واحد من جسمَك،
أحسَنلَك! ولا تنكَب بنار جهنَم كلَّك."
وهون سيّدنا عيسى (سلامه علينا) استعمل المبالغة حتى الناس تبعُد عن الشهوات والزنى.
شو قول المسيح بالطلاق
31"هالوصيّة قالوها بالتوراة: "يلّي بطلِّق مرتُه لازِم ورقة طلاق يعطيها،"
32بس أنا بدّي وضِّح هالوصيّة:" يلّي بطلِّق مرتُه بدون ذنب الزنى، بعمِلتُه ضحيّة زنى بخلّيها،
ويلّي بيِتزوَّج هالمطلّقة بكون عم يزني فيها.
شو قول المسيح بالحلفان
33"سمعتوا هالوصيّة قالوها بالتوراة، لا تتراجَع عن حلفان اليمين، ولازِم توفي بندورَك لالله،
34-35بس أنا بدّي وضِّح هالوصيّة: لا تحلفوا أبداً، لا بالسماوات ولا بالأرض لأنّه وسعُن عرش الله.
ولا مدينة القدس لأنُّه هوّ الملك مقدّسها.
36ولا يحلُف حدا براسُه، لأنّه القدرة عتغيير لون شعرة ما بيِملِكها.
37فخلّوا كلامكُن نعم يعني نعم ولأ يعني لأ،
وأيّ شي زيادة عن هيك بكون من عمل الشيطان فما تحلُف عشان تِتصدَّق."
شو قول المسيح بالإنتقام
38"سمعتوا هالوصيّة قالوها بالتوراة،
أبا عن جدّ،
"العين بالعين والسنّ بالسنّ"،
ومش أكتر من هالقدّ،
39بس أنا بدّي وضّح هالوصيّة:
لا تقاوم يلّي بيغلط معَك،
بالعكس يلّي بيضربَك عخدَّك اليمين برملُه التاني وخلّيه يضربَك.
40ويلّي بدُّه يقدِّم فيك دعوى تَياخُد عبايتَك، فعطيه فوقا جلّابيتَك.
41وإذا حدا جبرَك تخدمُه وتحمله شي لمسافة ميل، إمشي ميلين.
42وإذا مسكين طلَب منَّك شي عطيه، ويلّي بدُّه يتديَّن عطيه دين."
كيف منحبّ أعداءنا؟
43"سمعتوا هالوصيّة قالوها بالتوراة: "حبّ جارَك، ووقتا فِهْمُوَها إنّه كْرَهوا عدوَّكُن،"
44بس أنا بدّي وضّح هالوصيّة: حِبّوا أعداءكُن، وإدعوا بالخير لكلّ يلّي بيضطَهْدّوكُن.
45وهيك بتكونوا عصورة "عيال الله"، الله وليكُن الرحمن في عُلاه، ربّ العالمين،
يلّي بتشرق شمسُه عالطّالحين والصّالحين،
وبتمطُر سماه عالنّاس أجمعين، أبرار وظالمين.
46فإذا كنتو بتحبّوا بس يلّي بحبكُن فشو أجركُن؟
حتّى جباة الضرايِب الغشّاشين بيعملوا هيك!
47وإذا ما بترحّبوا إلاّ بإخوانكُن بالإيمان، فشو لّي مميَّز عندكُن؟
حتّى المشركين بالله بيعملوا هيك!
48فيا أحبّائي كونوا بمحبِّتكُن كاملين،
متل وليكُن الرحمن في عُلاه ربّ العالمين."
Currently Selected:
من الإنجيل – عن متّى 5: LRT
Highlight
Share
Copy
Want to have your highlights saved across all your devices? Sign up or sign in
© 2021 Sabeel Media
