قصة النبي موسى - الخروج 2
2
مولد النبي موسى عليه السلام
1وبهالوقت كان فيه رجّال اسمُه عمران ويوكابِد من بني يعقوب تزوّجوا 2وجابت صبي صحّي وجميل،
فخبّته إمُّه عن عيون فرعون شي تلات تشهر عالقليل،
3وبس عِجزِت عن تخبايتُه وقت طويل،
جابت سلّة من قصب البُردى، وبالزفت والقطران دهنِتا،
وحطِّت الطفل فيا وبين القصب عضفاف النّيل حطِّتا.
4ووقفِت إختُه مريم بنت عمران، من بعيد تراقِب.
5ونِزلِت بنت فرعون عالنهر تتحمم، ووصيفاتا مرافقينها عالجوانب.
شافِت الأميرة السلّة فايشة بين القصب،
طلبِت من وصيفِتا تجِبلا ياها، 6وصابا العجَب
بس فتحِتا ولقِت صبي عم يبكي واتقطّع قلبا،
وقالت: "لا بدّ هالصبي من بني يعقوب"، 7فقرّبِت مريَم جنبا،
وقالتا: "ستّنا، بْدِلِّك عَمرة من بني يعقوب تْرَضِّعْلِك هالوليد؟"
8جاوبِتا بنت فرعون: "جيبي عالأكيد!"
قامِت راحت البنت وجابِت إمّ الولد. 9فقالِتلا بنت فرعون: "هالطفل بعهدتِك.
خديه ورضعيه وانا بَعْطيكِ إجرتِك".
وأخدِت الإمّ الولد تترضعُه.
10ولمّا كبِر وانفطم جابتُه إمُّه لعند بنت فرعون لترجعُه.
فاعتبرِتُه الأميرة إبنا وتبنِّتُه،
وموسى سمِّتُه،
وقالت: "لانّي من الميّ سحبتُه."
هروب النبي موسى عليه السلام من مصر وزواجه
11تربّى النبي موسى (عليه السلام) بمصر،
ببيت فرعون وكبِر.
وبيوم من الإيّام، كان تقريباً عمرُه أربعين سنة،
كان رايِح يشوف شعب بني يعقوب "شعبُه". قام لقاهُن معذَبين
عم يشتغلوا بالفاعِل مجبورين.
ورجّال من المصريّين،
عم يُضرُب واحَد منُن. 12فاتطلَّع موسى شمال يمين،
وقام ضرب المصريّ للقتل،
وطمر الجثّة بالرّمل.
13وتاني يوم كان موسى ضاهِر قام لاقى،
تنين من شعبُه بخناقة،
قام سأل المتعدّي: "ليش عم تضرُب خيَّك؟"
14فجاوبُه: "وإنتَ مين عيَّنك علينا حكم ورئيس حطَّك،
شو بدَّك تقتلني متل ما مبارِح هيداك المصريّ قتلِت؟"
فخاف النبي موسى وقال لحالُه: "طالما هيدا عرِف أكيد الكلّ عرفوا شو عمِلِت!"
15ووصِل لفرعون الخبر،
وقرَّر يقتلُه. فهرب (عليه السلام) من مصر،
وسكن بأرض مِديَن. ولمّا وصل قعد عبير ميّ.
16وبهيديك الأوقات،
كان فيه وليّ صالِح إسمُه شعيب عندُه سبع بنات
بيجو عالبير بملّوا الجرّات،
تيعبّوا الأحواض ويسقوا ماعز بيهُن والغنمات.
17وبهيداك اليوم إجا بعض الرّعاة بلّشوا يطردوا البنات،
لكن موسى (عليه السلام) قام ودافَع عنُّن وسقالَن الغنمات،
18ولمّا رجعوا لعند بيُّن قلُّن: "شو! كأنه هيك اليوم خلّصتوا عبكّير!"
19فجاوبوه: "اليوم أنقَذنا من الرّعاة رجّال مصريّ، وعبّى الأحواض وسقى غنمنا عالبير.
20سألُن بيُّن: "ووينُه هلّأ؟ ليه تركتوه هونيك؟ روحوا اعزموه يجي ياكُل معنا شي، عيب!"
21وقِبِل موسى الدعوة وعاش عندُه. وبعد فترة زوَّجُه صفّورة بنتُه لشعيب،
22فجابتلُه ولد سمّاه موسى جرشوم يلّي معناه "مغرَّب هون".
23وبعد زمن طويل، مات فرعون،
وكان بعدُن بني يعقوب عبيد، يشتغلوا بالفاعل، وصرخوا بسبب معاناتُن،
24فسمِع الله مناجاتُن،
وحفظ عهده تعالى لِإبراهيم وإسحاق ويعقوب (عليهم السّلام).
25وشاف سبحانُه معاناة بني يعقوب لأنّه العليم البصير إله السّلام.
Currently Selected:
قصة النبي موسى - الخروج 2: LRT
Highlight
Share
Copy
Want to have your highlights saved across all your devices? Sign up or sign in
© 2021 Sabeel Media
