من قصة النبي داود (2 صموئيل) 7
7
وعد الله للنبي داود عليه السلام
1لمّا استقرّ النبي داود (عليه السلام) ملك عقصرُه، لأنّه أنعم الله عليه وعشعبُه بالسلام والأمان، 2قال النبي داود للنبي ناثان (عليه السلام) هالكلام:
"شوف ناثان! أنا ما ممكن ضلّ ساكن بقصر صلب من خشب الأرز معمول،
وبذات الوقت، منحط صندوق ميثاق عهد الله بخيمة. هالشي مش معقول!"
3فقال ناثان للملك: "عمول شو ما بدَّك، ما في شي بيمنعَك،
لأنّه الله معَك."
4-5ولكن، بهيديك الليلة، أوحى تعالى لناثان يروح عند داود وينطق كلمات الله:
"إنتَ يلّي بدّك تبنيلي بيت حتّى أُقيم فيه؟
6أنا ما أقمت ببيت من لمّا أخرجت بني يعقوب من مصر لهالحين،
ولكن كنت إتجلّى إلهُن بخيمة يحملوها وهن مرتحلين.
7شي مرّة سألت القادة الّي عيّنتهُن يرعوا بني يعقوب، ليه ما بنولي بيت من خشب الأرز الثمين؟"
8"ولهيك اسماع يا داود كلام ربّ العالمين: "من ورا الغنم، أنا أخدتَك،
ورئيس عقومي بني يعقوب حطّيتَك.
9ووين ما رحت وجيت كنت معَك، بِدِت أعدائَك، نصرتَك!
وخلّيت إسمك يصير عظيم متل القادة العظما أجمعين.
10وجعلت مكان لقومي بني يعقوب، فيه ثابتين،
يعيشوا بلا خوف، آمنين.
وما بعودوا متل قبل إدّام الأشرار مُضطهدين.
11وأكتر من هيك يا داود، أنا رح ريحَك من عدوَّك،
أنا الله يلّي رح إبنيلَك بيت من نسلَك،
12وبعد ما تنتهي إيّامَك، وتندفَن مع آبائَك،
رح قيم من بعدَك خلف إلَك من صلبَك،
وثبِّت مملكتُه،
13وهوّ يلّي رح يقيم إلي بيت للعبادة، بمجّدني فيه، وعالعرش للأبد رح ثبتُه.
14ورح كون إلُه بمقام الأب وهوّ يكون إلي بمقام الإبن،
فإذا ارتكب أيّ سوء، أدّبتُه.
بعصا، يعني بعدوان الأمم، ضربتُه.
15ولكن مش رح أرفضُه متل ما رفضت الملك طالوت،
يلّي عشانَك زحتُه.
16أمّا إنت يا داود فبيتَك وملكَك ثابتين لأبد الآبدين."
وختم الله كلامُه ربّ العالمين.
17وهيك خبَّر النبي ناثان النبي داود كامل الوحي المُبين.
دعاء النبي داود عليه السلام
18دخل النبي داود (عليه السلام) حرم خيمة العبادة ودعا ربّ العالمين:
"مين أنا يا ربّ، اللهُمّ يا رحمن يا رحيم؟
ومن وين أهلي حتّى نال كلّ هالكرم العظيم؟
19وكلّ هالشّي وبتشوفُه يا ربّ قليل!
وأكتر من هيك وعدتني إنّه يدوم نسلي لوقت طويل!
اللّهمّ يا رب، هيك بتعامل عبادك أجمعين؟ شي عجيب!
20فشو بعد بدّي أطلب منَّك، اللهمّ، يا عليم يا مُجيب.
21فبإرادتَك يا ربّ وحسب وعدَك، عملت هالشّي العظيم، وكشفتُه لعبدَك.
22فسبحانَك يا الله، الذي لا إله إلاّ إنت، والشاهِد هوّ يلّي سمعناه عنَّك.
23ومين عوجّ الأرض متل بني يعقوب، قومَك؟
يلّي نجّيتُن من مصر ليكونوا عبادَك، تينرَفَع بالعالي إسمَك؟
بكلّ العجايِب الّي عملتها إدّامهُن،
والأمم وأصناما يلّي بِدِتْها كرمالهُن.
24وهيك صار بني يعقوب قومَك للأبد،
وإنتَ يا ربّ صرت إلُن الله الواحد الأحد.
25ف، اللهمّ، حقِّق وعدَك إلي بنسل يدوم لأبد الآبدين،
26وليتمجَّد إسمَك يا عظيم، يا ربّ العالمين."
27"يا قدير يا ربّ بني يعقوب، تشجّعت إتوجّه إلَك وإدعيلَك لأنّك كشفتلّي،
إنّك رح تجعل من أهل بيتي ملوك، أنا عبدَك، هيك أوحَيتِلّي.
28فاللهمّ يا ربّ العالمين،
إنتَ هوّ الله، وعدَك الحق، وكلامَك خير ويقين.
29فاللهمّ أنعِم علينا وبارك نسل عبدَك،
حسب وعدَك، ليدوم ويبقى للأبد يعبدَك."
Currently Selected:
من قصة النبي داود (2 صموئيل) 7: LRT
Highlight
Share
Copy
Want to have your highlights saved across all your devices? Sign up or sign in
© 2021 Sabeel Media
