Lwaḥi 4

Arebbi itmeḍhar-d x Lƹarc nnes ḏeg ujenna

1Menbaƹd i manaya ẓriɣ ijjen n ṯewwarṯ ṯnurzem ḏeg ujenna, sȓiɣ i ṯmijja nni iy ɣari d issiwȓen zi qbeȓ ṣṣut nnes igga am zzammar, ṯenna-ayi-d: "Gaƹƹeḏ-d ḏanita aḏac d smeḍhareɣ min labud ɣa iweqƹen menbaƹd i manaya." 2Ȓexddenni ihwa-d xafi Arruḥ n Arebbi, imeḍhar-d ḏinni ijjen n lƹarc ḏeg ujenna iqqim xas ijjen. 3Wenni xas iqqimen itcabbah ḏi ṯezrut n lyaceb ḏ lƹaqiq azeggwaɣ. Ijjen n ṯesȓiṯ n unẓar ṯenneḍ-as-d i lƹarc-a, tcabbah ḏi ṯezrut ṯazeyzawṯ n zzumurrud. 4Nnḍen-as-d i lƹarc-a arbeƹa u ƹicrin n lƹarcaṯ, xasen arbeƹa u ƹicrin n imɣaren ggin arruḍ ḏ acemȓaȓ, kuȓ ijjen zzaysen ɣares ttaj n ddheb x uzeǧif nnes. 5Iteffeɣ-d zi lƹarc wassam#4.5 Assam netta ḏ ȓebruq. ḏ iɣuyan ḏ wajjaj. Zzaṯ i lƹarc ḏinni sebƹa n isfeḍawen n ṯmessi ceƹƹȓen, yina niṯni ḏ sebƹa n arruḥaṯ n Arebbi. 6Zzaṯ i lƹarc ḏinni am ȓebḥar n jjaj iṣfa aṭṭas. Ḏinni arbeƹa n lmexluqaṯ iddaren ḏi ȓwesṭ, nnḍen-as-d i lƹarc ɣarsen ṯiṭṭawin ɣar zzaṯ ḏ ḏeffar. 7Lmexluq amezwaru itcabbah ḏi ssbaƹ.#4.7 Ssbaƹ netta ḏ ayraḏ, s ṯeƹrabṯ al-asad. Wis ṯnayen itcabbah ḏeg uyenduz. Wis ṯȓaṯa ɣares aɣembub am bnaḏem. Wis arbeƹa itcabbah ḏi nser iṭṭawen. 8Kuȓ ijjen zi lmexluqaṯ-a ɣares setta n wafriwen, kuȓ afriw iccur s ṯiṭṭawin x jjihetayen. Qqaren ǧiȓeṯ ḏ nhar bȓa ma aḏ bedden:

"Mecḥaȓ ƹaḍim, ƹaḍim, ƹaḍim, Siḏi Arebbi izemmaren i kuȓci.

Netta ḏ wenni iy tuɣa iǧan, ḏ wenni iy iǧan, ḏ wenni ƹaḏ iy d ɣa yasen."

9Lmexluqaṯ-a meȓmi ma semɣaren tweqqaren ḥemmḏen-as i wenni iqqimen x lƹarc ig iddaren i ȓebda n ȓebdaṯ, 10ssenni ƹaweḏ arbeƹa u ƹicrin nni n imɣaren trekkaƹen-as i wenni iqqimen x lƹarc, tsejjaḏen-as i wenni iddaren i ȓebda n ȓebdaṯ. Kuȓ ijjen zzaysen ineṭṭar ttaj nnes zzaṯ i lƹarc iqqar:

11"A Mawlana a Siḏi Arebbi nneɣ,

ḏ cek iy isḏaheǧen lƹaḍama ḏ uweqqar ḏ jjheḏ,

ȓaḥeqqac cek ṯxeȓqeḏ kuȓci,

s ȓxaḍar nnec twaxeȓqen-d aqaṯen ǧan."

Currently Selected:

Lwaḥi 4: RIF

Highlight

Copy

Compare