Iƹibraniyen 5

1Cuf, kuȓ ȓefqi ameqqran tixḍaren-ṯ-iḏ zeg iryazen, ticcen-as ȓweqṯ n ȓxeḏmeṯ nnes bac aḏ ixḏem zzaṯ i Arebbi ƹlaḥsab iwḏan aḏ iqeddem ṣṣeḏqeṯ ḏ dbiḥaṯ x ȓmuƹṣiyaṯ. 2Izemmar netta aḏ iḥinn x yinni war ifehhmen ca ḏ yinni iffɣen abriḏ minzi netta s yixef nnes ḏayes ḍḍuƹef. 3X manaya wa labud aḏ iqeddem dbiḥaṯ x ȓmuƹṣiyaṯ nnes nniṯ mammec iy ṯent itqeddam x yiwḏan.

4Ƹaweḏ war ḏinni ḥadd iy ɣa isemɣaren ixef nnes aḏ ixḏem s ccan-a iƹni ḏ ȓefqi ameqqran; Lla, ḏ Arebbi iy ḏas iticcen ȓḥaqq nni mammec ḏas ṯ yuca i ȓefqi nni umi qqaren Harun.#5.4 Harun netta ḏ umas n Siḏna Musa. 5Ammu uȓa ḏ Ƹisa war isemɣar ca ixef nnes aḏ ixḏem s lƹaḍama-ya iƹni ḏ ȓefqi ameqqran; Lla, inna-as Arebbi: <Aqa cek ḏ Mmi, nhara nec ḏewȓeɣ ḏ Babac.> 6Ƹaweḏ iqqar Arebbi ḏeg yijjen n umcan nneɣni: <Cek ḏ ȓefqi i ȓebda amecnaw lfirqa nni n ȓefqi umi qqaren Malikiṣadiq.>

7Ḏeg wussan nni iy ḏi tuɣa iddar Ƹisa ḏi ṯmurṯ-a, itẓaǧa itȓaɣa x Arebbi s jjheḏ u s imeṭṭawen itettar-as i wenni izemmaren aṯ isenjem zi ȓmewṯ. Arebbi itṣennaṭ-as wami Ƹisa iteggweḏ zzayes. 8Waxxa netta ḏ Mmis n Arebbi iy iǧa, iȓmeḏ ṭṭaƹa s uƹeddeb nni iy xas ikkin. 9Wami iƹḏu aƹeddeb nni bȓa ȓmuƹṣiyeṯ, iḏweȓ netta ḏ ȓƹunṣar n usenjem iƹni izemmar aḏ isenjem marra yinni iy ṯ itṭaƹan. 10Ssenni yarri-ṯ Arebbi ḏ ȓefqi ameqqran amecnaw lfirqa nni n ȓefqi Malikiṣadiq.

Yallaheṯ a nuyureṯ ɣar zzaṯ ḥima a nemɣar

11Ƹaḏ nzemmar a nini aṭṭas x ṯmesȓayin-a walakin iqseḥ akenniw nsefhem. Mayemmi? Liʼanna kenniw ṯḏeqȓem aḏ tfehmem. 12Cuf, wa labud kenniw ȓexxu aḏ tiȓim ḏ imseȓmaḏen walakin ƹaḏ itxeṣṣa-yawem ijjen akenniw isɣar s ṯɣuri nni ṯamezwarut zeg wawaȓ n Arebbi. Kenniw teḥḏajam aɣi#5.12 Aɣi netta ḏ aceffay ḏi ȓebƹaḍ n imucan ḏi Arrif. waha, maci lmakla ḏ ṣṣaḥ. 13Kuȓ ijjen ƹaḏ ḏ aseymi itƹic s uɣi waha, iƹni war ifehhem ca i useȓmeḏ x min iṣeȓḥen. 14Walakin lmakla n ṣṣaḥ tetten-teṯ ɣir yinni war iǧin ca ḏ iseyman. Niṯni zemmaren i lmakla nni n ṣṣaḥ minzi ȓebda xeddmen i ṯɣuri nni iy qqaren tmeyyazen jar min iǧan ḏ aṣebḥan ḏ jar min iǧan ḏ aƹeffan.

Currently Selected:

Iƹibraniyen 5: RIF

Highlight

Copy

Compare