Iƹibraniyen 11
11
Lʼiman ḏ yinni iy zzayes itƹicen
1Fa lʼiman netta ḏ ijjen n ttiqeṯ ijehḏen ḏi min netraja, neccin metʼakkadin ḏi ṯmesȓayin waxxa war ṯent netwiȓi ca. 2S lʼiman-a iy twacekkaren iwḏan n zman.
3S lʼiman iy nfehhem qa ddunect-a ṯetwaxȓeq-d s wawaȓ n Arebbi iƹni min ḏayes netwaȓa war d ikki ca zi min d itbanen.
4S lʼiman ikkar nnabi Habil iqeddem ijjen n dbiḥeṯ iy zi xas yarḍa Arebbi ḥsen zi ṯenni n wumas Qabil. Ƹlaḥsab lʼiman-a itcekkar-iṯ Arebbi iqbeȓ-iṯ netta nican wami xas issiweȓ Arebbi mliḥ x min iqeddem. U nnabi Habil s lʼiman nnes netta ƹaḏ issawaȓ waxxa immuṯ.
5S lʼiman ikkar nnabi Axnux itwaxḍef ɣar ujenna ḥima war itwiȓi ca ȓmewṯ. War ṯ ufin ca, iysi-ṯ Arebbi ɣares. U qbeȓ ma aḏ itwaxḍef itwacekkar am yijjen yarḍa xas Arebbi.
6Iwa uȓa ḏ ijjen war izemmar axas yareṭṭa Arebbi bȓa lʼiman. Minzi wenni iy ɣa qarrben ɣar Arebbi labud aḏ yamen belli netta iǧa u ḏ netta ig itjazan yinni iy xas irezzun s wuȓawen nsen.
7S lʼiman nnabi Nuḥ wami ḏas iƹȓem Arebbi x ṯmesȓayin nni war ṯent ẓrin yiwḏan ƹemmarṣ, ikkar netta s yijjen n ṯiggwḏi ḏ yijjen n ȓeḥya igga aɣarrabu bac aḏ isenjem ayṯbab n ṯeddarṯ nnes.#11.7 Tuɣa Siḏna Nuḥ ḏ ijjen n bnaḏem nican netta ḏ ȓmumen waḥḏes jar yiwḏan n zman nnes, iggur nican ḏeg ubriḏ n Arebbi. Wami ixzar Arebbi ɣar ṯmurṯ yufi-t ṯƹemmar s ccarr ȓaḥeqqac iwḏan marra ffɣen abriḏ. Ikkar Arebbi inna-as i Siḏna Nuḥ qa yuweḍ-d ȓefna n marra n min iddaren ḏi ddunect-a ȓaḥeqqac iwḏan tmenɣan aṭṭas ḏi ṯmurṯ. Ƹlaḥsab manaya aṯen mḥiɣ niṯni ḏ ṯmurṯ. Egg i yixef nnec ij uɣarrabu ḏayes ṯȓaṯa n ṭṭebqaṯ icten x ṯenneɣni. Aqa nec aḏawem d ssekkeɣ ȓfayaḍan n waman x ṯmurṯ bac aḏ qḍiɣ x marra minḏi ig iǧa arruḥ ḏ marra min iǧan x ṯmurṯ aḏ immeṯ. Walakin cek akic ggeɣ ȓƹaheḏ, aḏ taḏfeḏ ḏeg uɣarrabu cek ḏ ṯarwa nnec ḏ ṯemɣarṯ nnec ḏ ṯemɣarin n ṯarwa nnec. Ikkar Siḏna Nuḥ igga marra s minzi ṯ iweṣṣa Siḏi Arebbi. Wami igga manayenni netta iƹeyyeb ddunect, iwareṯ ṣṣulḥ nni iy d itasen s lʼiman.
8S lʼiman ikkar nnabi Brahim iṭaƹ-as i Arebbi wami ḏas d iȓaɣa aḏ iraḥ ɣar yijjen n umcan iy ɣa iqbeȓ ḏ lwareṯ. Iffeɣ netta tuɣa war issin ca mani ɣa iraḥ. 9S lʼiman iruḥ netta izḏeɣ ḏi ṯmurṯ nni iy zi ṯ iwƹeḏ Arebbi, netta aqaṯ ḏinni am ca n ubarrani. Itƹic ḏeg iqiḍan akiḏes memmis Isḥaq ḏ wayyaw nnes Yaƹqub, twaraṯen akiḏes ƹlaḥsab min zi ṯen iwƹeḏ. 10Ȓaḥeqqac Brahim itraja ṯandint nni ɣar ǧan dsasaṯ itduman, ixaṭṭ-it Arebbi ibna-t.
11S lʼiman Sara s yixef nnes immuc-as jjheḏ aḏ teysi aƹeddis waxxa nettaṯ ṯnumɣar, minzi ṯekkar nettaṯ ṯḥesseb wenni iy t iweƹḏen ḏayes ttiqeṯ. 12Ṯumma zi Brahim ḏ ijjen n uryaz iwsar ikemmeȓ, ijja-d ijjen n ddurriṯ am yiṯran iǧan ḏeg ujenna am yijḏi iǧan x cceṭṭ n ȓebḥar war izemmar ḥadd at iḥesseb.
13Yina marra mmuṯen ḏi lʼiman nni nsen qbeȓ ma ḏasen d awḍent ṯmesȓayin nni iy zi ṯen iwƹeḏ. Walakin ẓrin-ṯent reḥḥben zzaysent zi ȓeggwaj, ƹtarfen belli niṯni ḏ ibarraniyen ḏ iƹezzaben ḏi ṯmurṯ-a. 14Iwḏan iy ssawaȓen ammu iteḍhar-d belli rezzun x yijjen n ṯmurṯ aḏ tiȓi ḏ ṯamurṯ nsen. 15Maƹlik tuɣa txemmamen ḏi ṯmurṯ nni manis d ffɣen, iȓi ɣarsen lfurṣa aḏ d ƹeqben. 16Walakin lla, rezzun x yijjen n ṯmurṯ ḥsen zi ṯenni, iƹni icten ḏeg ujenna. X manayenni Arebbi war iseḏḥi ca aḏas inin qa cek ḏ Arebbi nneɣ minzi netta isewjeḏ-asen ijjen n ṯendint.
17S lʼiman ikkar nnabi Brahim aḏ iqeddem ḏ dbiḥeṯ s memmis Isḥaq wami ṯ ijarreb Arebbi. Iƹni tuɣa itqeddam ḏ dbiḥeṯ s memmis waḥḏes iy zi iwƹeḏ Arebbi Brahim, 18tuɣa inna-as qa s Isḥaq iy zi ɣa twaḥesseb ddurriṯ nnec. 19Iḥesseb Brahim belli izemmar Arebbi aḏ d isekkar mmis zeg imettinen. Manayenni ḏayes ȓemƹani minzi wah, memmis iḏweȓ-d i Brahim am yijjen zi ȓmewṯ.
20S lʼiman ikkar nnabi Isḥaq ibarek ṯarwa nnes Yaƹqub ḏ Ƹasu ƹlaḥsab lmustaqbel nsen.
21S lʼiman ikkar nnabi Yaƹqub wami tuɣa itmetta ibarek ṯarwa n mmis Yusef ij-ij, iƹebbeḏ netta xmi itsennaḏ x ṯeɣȓiyṯ nnes.
22S lʼiman ikkar nnabi Yusef ɣar uneggaru n ṯuḏarṯ nnes, issiweȓ x wufuɣ n Ayṯ-Israʼil zi Miṣra iweṣṣa-aṯen aḏ ysin akiḏsen ixsan nnes.
23S lʼiman kkaren lwalidin n nnabi Musa snuffaren memmiṯsen wami d ixȓeq minzi ẓrin belli netta iṣbaḥ aṭṭas, war ggwiḏen ca zi min ḏasen iweṣṣa uzeǧiḏ.
24S lʼiman ikkar nnabi Musa wami imɣar yugi aḏas ȓaɣan memmis n yeǧis n lmalik Firƹun. 25Ixḍar axas buṣaren imiṣriyen ak ccaƹb n Arebbi, war iqbiȓ ca aḏ ifareḥ ḏeg ufelles nni war itdumin ca. 26Ifhem meȓa seḥqaren-ṯ ƹlaḥsab Lmasiḥ iƹni manayenni ɣares lqima ktar zi min ɣarsen ḏ lkunuz ḏi Miṣra. Aqa netta ixezzar ɣar zzaṯ ḏi ljaʼiza nnes.
27S lʼiman ikkar Musa iffeɣ zi Miṣra, war iggwiḏ ca zeg uɣḍab n uzeǧiḏ nni. Iṭṭef ḏi lʼiman nnes am yijjen itwaȓan Arebbi netta war izemmar aṯ iẓer ḥadd. 28S lʼiman ikkar netta igga Ȓƹiḏ Ameqqran irucc ṯiwwura s iḏammen n ȓƹiḏ ḥima Ƹazȓayen war ineqq ca imenza#11.28 Imenza niṯni ḏ ifxeddan, qqaren-ṯ i iḥenjiren iy d ixeǧqen ḏ imezwura. n Ayṯ-Israʼil.
29S lʼiman ikkar ccaƹb iẓwa ɣar ujemmaḍ-in n Ȓebḥar Azeggwaɣ s iḍaren nsen, ṯisi nnes ṯegga amecnaw ṯamurṯ yuzɣen. Walakin wami jarrben imiṣriyen aḏ ƹḏun ssenni infeyyeḍ-d xasen ȓebḥar ɣerqen.
30S lʼiman ikkar ccaƹb ȓexddenni wḍan ȓeḥyuḍ n ṯendint n Ariḥa wami ḏas inneḍ ccaƹb sebƹiyyam.
31S lʼiman ṯaḥenjirṯ nni umi qqaren Riḥab iy tuɣa iffɣen abrid, ṯekkar nettaṯ ṯreḥḥeb s lmuxabaraṯ n Ayṯ-Israʼil. S manayenni war ṯemmuṯ ca ak yinni war itṭiƹin ca.
32Iwa min ɣa iniɣ ƹaḏ? War ɣari bu ȓweqṯ aḏ ssiwȓeɣ x Jaƹḏun niɣ ḏ Barak niɣ ḏ Camcun niɣ ḏ Yafta niɣ ḏ nnabi Dawed niɣ ḏ nnabi Ṣamwil niɣ ḏ marra lʼanbiya. 33S lʼiman kkaren niṯni rebḥen lmemlakaṯ, ḥekmen s ȓḥaqq, ḥerṯen x lwuƹud, bellƹen iqemmumen n sbuƹaṯ, 34sexsin aḥaḏuq n ṯmessi, feȓṯen zi ȓeqḍeƹ n ssif. Ḍḍuƹef nsen iḏweȓ ḏ jjheḏ, jehḏen ḏi ȓḥarb uzzȓen x ȓƹaskar n ṯmura nneɣni. 35Ȓebƹaḍ n ṯemɣarin ysint-id imettinen nsent iy d kkaren zi ȓmewṯ. Ȓebƹaḍ n yiwḏan marrṯen-ṯen, walakin niṯni ugin aḏ twaḍeȓqen bac aḏ rebḥen ijjen n lqiyama ḥsen. 36Ȓebƹaḍ n yiwḏan ḥeggaren-ṯen, uwṯin-ṯen s usɣun, carfen-ṯen s snaseȓ, ḥebbsen-ṯen. 37Rejmen-ṯen s uzru, qessen-ṯen x ṯnayen s ȓmencar, nɣin-ṯen s ssif. Gguren s yiȓemawen n iḥuȓiyen ḏ iɣayḏen. Niṯni ḏ imesƹan, twaƹeddaben, tenƹeddan xasen. 38Niṯni ddunect-a war ṯen ṯesḏaheǧ ca. Tƹezzaben ḏi ȓexȓawaṯ ḏ iḏurar ḏ ixubac ḏ yifran n ṯmurṯ.
39Marra yina twacekkaren s lʼiman nsen. Innama, uȓa ḏ ijjen zzaysen tuɣa ƹaḏ war ḏas d yuwiḍ ca min zi ṯ iwƹeḏ Arebbi. 40Tuɣa Arebbi iḏebbar-aneɣ-d i neccin zi qbeȓ ijjen n ȓḥajeṯ ḥsen bac niṯni war tiwiḍen ca ɣar uneggaru iƹni aḏ iȓin kemȓen bȓa neccin.
Currently Selected:
Iƹibraniyen 11: RIF
Highlight
Copy
Compare
Share
Want to have your highlights saved across all your devices? Sign up or sign in
