Ȓexḏayem 9

Itamen Cawul s Siḏiṯneɣ Ƹisa

1Cawul ƹaḏ itheddaḏ s ȓmewṯ imeḥḍaren n Siḏiṯneɣ. Ikkar iruḥ ɣar arrayes n ȓfuqaha, 2ittar zzayes arruxṣaṯ aṯent iysi ɣar ṯemziḏawin n Ayṯ-Israʼil ḏi Dimaceq bac yinni ɣa yaf ḏeffaren abriḏ n Ƹisa s ṯemɣarin ḏ iryazen aṯen yawi ḏ imeḥbas ɣar Lquds. 3Wami iggur ɣar Dimaceq iqqim-as cwayt aḏ yaweḍ, ƹlaɣafla inneḍ-as-d ijjen n nnur itceƹciƹ-d xas zeg ujenna. 4Iwḍa ɣar ṯmurṯ, itesȓa i yijjen n ṯmijja ṯeqqar-as-d: "A Cawul a Cawul, mayemmi ḏayi tƹeddabeḏ?"

5Yarra xas Cawul inna-as: "Min ṯeƹniḏ cek a Siḏi?"

Ṯenna-as ṯmijja nni: "Nec ḏ Ƹisa wenni iy tƹeddabeḏ." 6Inna-as: "Kkar aḏef ɣar ṯendint, aḏac itwanna ḏinni min itxeṣṣa aḏ teggeḏ."

7Iryazen nni isafaren ak Cawul bedden ḏinni ḏewȓen war ssiwiȓen ca. Sȓin i ṯmijja walakin war twiȓin ḥadd. 8Ikkar Cawul zi ṯmurṯ irzem ṯiṭṭawin nnes iḏweȓ war itwiȓi walu. Ṭṭfen-ṯ zeg ufus nnes uwin-ṯ ɣar Dimaceq. 9Iqqim ḏinni ṯeȓtiyyam war itett ca, war isess ca, war itwiȓi ca.

10Ḏinni ḏi Dimaceq ijjen n umeḥḍar qqaren-as Anas. Imeḍhar-as-d Siḏiṯneɣ ḏi lwaḥi inna-as: "Ay Anas."

Yarra xas inna-as: "Aqayi a Siḏi."

11Inna-as Siḏiṯneɣ: "Kkar ruḥ ɣar zzenqeṯ nni umi qqaren <Abriḏ Iseggḏen>, rzu ḏinni ḏi ṯeddarṯ n Yahuḏa x yijjen n uryaz zi ṯendint n Ṭarsus, isem nnes Cawul. Netta itẓaǧa ḏinni. 12Tuɣa iẓra ḏi lwaḥi ijjen n uryaz qqaren-as Anas aḏ d yas axas isers ifassen nnes bac aḏ iḏweȓ itwaȓa."

13Yarra xas Anas inna-as: "A Siḏi, nec xebbaren-ayi aṭṭas n yiwḏan x bnaḏem-a Cawul, mecḥaȓ iƹeddeb netta ȓmuminin nnec ṣṣaliḥin ḏi Lquds. 14Ȓexxu aqaṯ ḏa, ucin-as arruxṣa arruyas n ȓfuqaha ḥima aḏ iṭṭef marra yinni iƹebbḏen s yisem nnec."

15Inna-as Siḏiṯneɣ: "Lla ruḥ, qa aryaz-a ḏ nec iy ṯ ixḍaren aṯ ssekkeɣ ḥima aḏ issiweḍ isem inu i yinni war iǧin ca zi Ayṯ-Israʼil, ḏ izeǧiḏen nsen, ḏ israʼiliyen. 16Nec aḏas d seḍhareɣ mecḥaȓ iy ɣa itwaƹeddeb u labud x ssabab n yisem inu nec."

17Iruḥ Anas yuḏef ṯaddarṯ nni isers ifassen nnes x Cawul inna-as: "Ay uma Cawul, nec qa issekk-ayi-d Siḏiṯneɣ Ƹisa, wenni iy ḏac d imeḍharen ḏeg ubriḏ nni iy d ṯuwiḏ. Issekk-ayi-d ɣarek ḥima aḏ tḏewȓeḏ twaȓiḏ aḏ teccareḏ s Arruḥ iqeddsen." 18Ȓexddenni ṯewḍa-yas-d ijjen n ȓḥajeṯ zi ṯiṭṭawin nnes am ṯeqcurṯ, iḏweȓ itwaȓa. Ikkar itwaṭehhar s waman. 19Wami icca, iḏweȓ-d ɣares jjheḏ nnes.

Cawul itbeccar ḏi ṯendint n Dimaceq

Iqqim Cawul ȓebƹaḍ n wussan ak imeḥḍaren ḏi Dimaceq. 20Ȓexddenni ibḏa itḥeddaṯ ḏi ṯemziḏawin n Ayṯ-Israʼil iqqar-asen qa Ƹisa ḏ Mmis n Arebbi. 21Tƹejjben marra yinni itesȓan qqaren: Ma war iǧi ḏ wanita irzun aḏ iqḍa x yinni itȓaɣan x yisem-a n Ƹisa ḏi Lquds? Ma war iǧi ɣarsen iy d yusa ḏanita bac aṯen iṭṭef aṯen yawi ɣar arruyas n ȓfuqaha? 22Cawul netta yarni itḥeddaṯ s jjheḏ, iseḏhac Ayṯ-Israʼil ig izeddɣen ḏi Dimaceq, isbeyyen-asen-d s wawaȓ nnes qa Ƹisa ḏ Lmasiḥ.

23-24Wami ƹḏun aṭṭas n wussan, mcawaren Ayṯ-Israʼil jarasen ḥima aḏ nɣen Cawul, netta yarra-d ȓexbar. Ǧiȓeṯ ḏ nhar ḥeṭṭan ṯiwwura n ṯendint ḥima aṯ nɣen. 25Ijjen n ǧiȓeṯ imeḥḍaren nnes serwȓen-ṯ, sehwan-ṯ-iḏ s iseɣwan ḏeg yijjen n uqbub#9.25 Iqbuben teggen-ṯen x usarḏun neqȓen ḏaysen imendi, irḏan, ibawen, ṯinifin u ḏ ȓeḥwayej nneɣni. zeg yijjen n ṯburjat n ṣṣur n ṯendint.

Cawul ḏi ṯendint n Lquds

26Wami d yuweḍ Cawul ɣar Lquds irezzu aḏ imun ak imeḥḍaren, walakin ggwḏen zzayes marra war ḏayes ttiqen ca netta ḏ ameḥḍar n ṣṣaḥ. 27Barnaba ikkar ikellef zzayes yuwi-ṯ ɣar arrusul. Iƹaweḏ-asen xas mammec ḏas d imeḍhar Siḏiṯneɣ i Cawul ḏeg ubriḏ nni ḏ mammec iy kis issiweȓ ḏ mammec itḥeddaṯ s zƹameṯ ƹlaḥsab isem n Ƹisa ḏi Dimaceq. 28Ssenni ṣafi, itraḥ itas-d Cawul akiḏsen ḏi Lquds, itḥeddaṯ s yijjen n zƹameṯ ƹlaḥsab isem n Siḏiṯneɣ. 29Issawaȓ ak israʼiliyen yinni issawaȓen s lluɣa ṯayunaniṯ itemnaqar akiḏsen, ssenni niṯni rezzun aṯ nɣen. 30Wami d arrin ȓexbar ayṯmaṯneɣ, uwin-ṯ ɣar Qayṣariya ssenni ssekken-ṯ ɣar ṯendint n Ṭarsus.

31Ḏi ȓweqṯ nni jmaƹeṯ n ȓmuminin ḏi marra jwayeh n Yahuḏiya ḏ Ljalil ḏ Samarya hnan. Twajehḏen, teggwḏen zi Siḏi Arebbi, twacejjaƹen s Arruḥ iqeddsen, tmarnin ḏi lƹadad.

Agenfi n yijjen n bnaḏem qqaren-as Ƹinyas

32Buṭrus itraḥ zeg umcan ɣar umcan, iruḥ iẓra ȓmuminin ṣṣaliḥin iy zeddɣen ḏeg ubilaj n Ludda. 33Yufa ḏinni ijjen n uryaz qqaren-as Ƹinyas, netta izzeȓ ṯmenya iseggwusa ḏi ṯassuṯ mmuṯen-as iḍaren. 34Inna-as Buṭrus: "A Ƹinyas, qa cek isgenfa-cek Ƹisa Lmasiḥ! Kkar jmeƹ ṯassuṯ nnec." Ȓexddenni ikkar ibedd x iḍaren. 35Marra iwḏan iy zeddɣen ḏeg ubilaj n Ludda ḏ ȓewḍa n Carun ẓrin-ṯ tuben ɣar Siḏi Arebbi.

Ṭabita tnekkar-d zi ȓmewṯ

36Ḏi ṯendint n Yafa ḏinni ijjen n ṯmeḥḍarṯ qqaren-as Ṭabita (ȓmaƹna n yisem-a, <ṯiɣit n uzɣar>). Tegg ȓxir aṭṭas tƹawan imesƹan. 37Ḏi ȓweqṯ nni ṯehȓec ṯemmuṯ, ysint-teṯ sirḏent-teṯ sgaƹƹḏen-teṯ ɣar yijjen n ṯɣurfat.

38Sȓin imeḥḍaren ḏi ṯendint n Yafa belli Buṭrus aqaṯ ḏeg ubilaj n Ludda. Ludda ṯuḏes-d i Yafa, ssekken ɣares ṯnayen n yiwḏan ḥecmen-ṯ nnan-as: "Ƹafek arwaḥ akiḏneɣ ḏeɣya!" 39Ikkar Buṭrus iruḥ akiḏsen. Wami yuweḍ sgaƹƹḏen-ṯ ɣar ṯɣurfat nni. Nnḍent-as-d i netta marra ṯajjaȓin, trunt seḍharent-as ičammiren ḏ izeǧuba tuɣa ṯxeyyeḍ Ṭabita wami tuɣa ṯeǧa akiḏsent. 40Ssenni isufeɣ-iṯen Buṭrus marra zi ṯɣurfat, iwḍa x ifadden ibḏa itẓaǧa. Ixzar ɣar ddat nnes inna-as: "Ya Ṭabita, kkar!" Uca nettaṯ ṯerzem ṯiṭṭawin nnes, wami ṯeẓra Buṭrus ṯekkar ṯeqqim. 41Isiɣ-as fus nnes, isekkar-it-id. Iȓaɣa-d i ȓmuminin ṣṣaliḥin ḏ ṯajjaȓin inna-asen aqa ṯeddar. 42Iffeɣ ȓexbar ḏi ṯendint n Yafa marra, umnen zi Siḏiṯneɣ aṭṭas n yiwḏan. 43Iqqim Buṭrus ḏi Yafa aṭṭas n wussan ak yijjen n bu-yiȓemawen#9.43 Bu-yiȓemawen netta ixeddem ḏeg yiȓemawen n lḥayawan. qqaren-as Simƹan.

Currently Selected:

Ȓexḏayem 9: RIF

Highlight

Copy