2 Ayṯ-Kurinṯ 12

Jjheḏ ḏ ḍḍuƹef n arrasul Bulus

1U labud aḏ ftaxareɣ ƹaḏ, waxxa war ḏayes bu nnfaƹ. Aḏ ssiwȓeɣ ȓexxu x ṯmesȓayin iy d ihwan ḏi lwaḥi ḏ ṯmesȓayin innufaren iy d isbeyyen Siḏiṯneɣ. 2Ijjen n uryaz iǧan ḏi Lmasiḥ,#12.2 Ḏi lʼayaṯ-a arrasul Bulus issawaȓ x yixef nnes. aqa ssneɣ-ṯ ḏ nec. Arbeƹṭac iseggwusa zeg wami itwaxḍef ɣar ujenna wis ṯȓaṯa. Ma itwaxḍef s ddat niɣ bȓa ddat manayenni war ṯ ssineɣ ca nec, issen-iṯ illa Arebbi. 3-4Aryaz-a ssneɣ itwaxḍef ɣar jjeneṯ. Ma itwaxḍef s ddat niɣ bȓa ddat manayenni war ṯ ssineɣ ca nec, issen-iṯ illa Arebbi. Aryaz-a iṣenneṭ i ṯmesȓayin war twaneṭṭiqent ca, war ḏas itwasmiḥ ca i bnaḏem aṯent inṭeq. 5Ijjen n uryaz am wanita zemmareɣ nec azzayes ftaxareɣ. Walakin war teftaxareɣ ca zi min ḏayi d yusin, teftaxareɣ zi ḍḍuƹef inu u ṣafi. 6Cuf, mȓi xseɣ aḏ ftaxareɣ zeg yixef inu ataf ssawaȓeɣ s ȓḥaqq maci s ṯubbuhȓiya. Walakin ugiɣ aḏ ggeɣ ammu, mayemmi? Ḥima aḏayi ḥesben yiwḏan ɣir s min twaȓan ḏayi s ṯiṭṭawin nsen u ḏ min tṣennaṭen zzayi s imejjan nsen.

7Iḏen immuc-ayi ijjen n usennan ḏeg uysum inu,#12.7 Maci maƹruf min iƹna usennan-a mixef issawaȓ arrasul Bulus, walakin issawaȓ s ȓmaƹna. Imken ḏ ijjen n lmaraḍ iy ṯ itcukan s jjheḏ. mayemmi? Ḥima war semɣareɣ ca ixef inu ƹlaḥsab ṯimesȓayin-a istƹejjiben iy ḏayi d isbeyyen Arebbi ḏi lwaḥi. Asennan-a wenni iy d issekken Cciṭan itƹeddab-ayi bac war semɣareɣ ca ixef inu. 8Ttareɣ-as i Siḏiṯneɣ ṯȓaṯa n ṯwaȓaṯin bac axafi isbeƹƹeḏ manaya. 9Netta inna-ayi lla, icfa-yac arḍa inu; Jjheḏ inu aḏ iḏweȓ ikmaȓ s ḍḍuƹef-a. Falihaḏa farrḥeɣ aṭṭas aḏ ftaxareɣ s ḍḍuƹef n jjheḏ inu bac jjheḏ n Lmasiḥ aḏayi izḏeɣ. 10S manaya ƹlaḥsab Lmasiḥ nec farrḥeɣ s ḍḍuƹef inu ḏ ṯukkwra ḏ tamara ḏ uƹeddeb ḏ uziyyar. Mayemmi? Meȓa ḍeƹfeɣ ȓexddenni nec aḏ iȓiɣ jehḏeɣ.

Arrasul Bulus ikessi amnus x ȓmuminin n Ayṯ-Kurinṯ

11Ƹaḏ ssawaȓeɣ s ṯubbuhȓiya-ya zaƹma, ḏ kenniw iy xafi ibezzen ammu. Cuf, tuɣa itxeṣṣa-kenniw aḏayi ṯcekarem, mayemmi? Liʼanna nec waxxa ḏ walu iy ǧiɣ, war ǧiɣ bu ḏ aneqṣi zi arrusul nni imezwura. 12Ṯimesȓayin nni iy d isbeyyanen nec ḏ arrasul iy ǧiɣ niṯenti tuɣa twaxeȓqent-id jarawem s yijjen n ṣṣbar ḏ ameqqran, iƹni lƹalamaṯ ḏ lmuƹjizaṯ ḏ lburhanaṯ. 13Ma ḏinni ca n ṯmesȓayṯ minxef arḍiɣ nec ḏi ṯjumaƹ n ȓmuminin ṯinneɣni war xas arḍiɣ ca jarawem? Wah icten, iƹni war xawem tbessiȓeɣ ca!#12.13 Iƹni war xasen ibesseȓ ca Bulus ȓaḥeqqac yugi aḏ iqbeȓ tmenyaṯ zzaysen bac aṯ ƹawnen niṯni ḏi ȓxeḏmeṯ nnes ḏi Lʼinjil. Semḥem-ayi x falṭa-ya.

14Ȓexxu aqayi wejḏeɣ aɣarwem d aseɣ ḏi zziyara wis ṯȓaṯa. War xawem tbessiȓeɣ ca, war rezzuɣ ca x wagȓa nwem rezzuɣ xawem kenniw. Ȓaḥeqqac war itxeṣṣi ca iḥenjiren aḏ smunen agȓa i lwalidin nsen, itxeṣṣa lwalidin nsen iy ɣa ismunen agȓa i iḥenjiren. 15Nec s ȓefraḥeṯ aḏ hḏiɣ ixef inu aḏ twahḏiɣ ƹlaḥsab ȓaƹmar nwem. Meȓa texseɣ-kenniw aṭṭas, ma ṯesneqṣem ȓemḥibbeṯ nwem xafi?

16Iwa ṣafi, meȓa war xawem bessȓeɣ ca, ma ṯeqqarem ȓexxu qa nec ḏ aɣeccac ṭṭfeɣ-kenniw s ṯeḥraymiṯ, ah? 17Ma ṯenwim xewwneɣ-kenniw s yijjen zeg yinni tuɣa ɣarwem d ssekkeɣ? Lla, walu. 18Ḏ nec iy d iweṣṣan Titus aɣarwem d yas, ssekkeɣ-d akiḏes umaṯneɣ nni. War izemmar akenniw iɣecc Titus. Nec ḏ netta nxeddem s yijjen n ȓaƹqeȓ ḏ ijjen, isurifen nneɣ ḏ ijjen.

19Mecḥaȓ zeg wami ṯnewwam zaƹma ndafeƹ x yixef nneɣ zzaṯwem waha? Lla ay imƹizzen inu, nessawaȓ marra manaya ḏi Lmasiḥ zzaṯ i Arebbi bac akenniw nsejheḏ. 20Cuf, ggwḏeɣ xmi d ɣa awḍeɣ war kenniw tifeɣ ca mammec tmenniɣ akenniw afeɣ. U ƹaweḏ war ḏayi tifem ca mammec tmennim aḏayi ṯafem. Ggwḏeɣ aḏ afeɣ jarawem amenɣi ḏ ȓeḥseḏ ḏ uƹaṣṣeb, kuȓ ijjen irezzu i yixef nnes waha, ḏ ȓbaṭeȓ ḏ nnamima, ḏaywem ttakebbur ḏ ȓfawḍa. 21Ggwḏeɣ aɣarwem d ƹeqbeɣ aḏ seḏḥiɣ zi Arebbi inu aḏ ruɣ aṭṭas x yinni ig iƹṣan zi qbeȓ, ƹaḏ war tuben ca zeg ufelles ḏ lfasad ḏ ȓeqbaḥeṯ iy tuɣa teggen.

Currently Selected:

2 Ayṯ-Kurinṯ 12: RIF

Highlight

Copy

Compare