Mat 5
5
Okwegesa kwa ha rusozi: okusemererwa okwa mananu
(Luk 6:20-23)
1Yesu obu yarozire ebitebe by'abantu, yatemba orusozi, yaikarra hansi, nukwo abeegesebwa be kwija nambere ali,
2yatandika kubeegesa ati:
3“Baina omugisa abeemanya nkooku bali banaku
omu mwoyo,
habwokuba obukama bw'omwiguru bwabo.
4 #
Is 61:2. Baina omugisa abarukuganya, habwokuba Ruhanga
alibahuumuza.
5 #
Zab 37:11. Baina omugisa abaculeezi, habwokuba baligweterwa
ensi.
6 #
Is 55:1,2; Sir 24:21. Baina omugisa abarukurumwa enjara bakakwatwa
n'iroho habw'obuhikiriire,
habwokuba baliiguta.
7Baina omugisa ab'embabazi, habwokuba baligirirwa
embabazi.
8 #
Zab 24:3,4; 2Esid 7:98. Baina omugisa ab'emitima esemiire, habwokuba
balirora Ruhanga.
9Baina omugisa abanyakuteeraniza abantu omu businge,
habwokuba balyetwa baana ba Ruhanga.
10 #
1Pet 3:14. Baina omugisa abahiiganizibwa habw'obuhikiriire,
habwokuba obukama bw'omwiguru bwabo.
11 #
1Pet 4:14. Inywe mwina omugisa abantu obu baraabajumaga, obu baraabahiiganizaaga kandi bakabahangirra ebintu ebibi byona habwange. 12#2 Byok 36:16; Sir 2:8; Ebik 7:52.Musemererwe, mukyanganuke, habwokuba empeera yanyu nyingi omu iguru; nukwo baahiiganiize bati abarangi abaabandize inywe.”
Ekisura n'ekyererezi ky'ensi
(Mar 9:50; Luk 14:34-35)
13 #
Mar 9:50; Luk 14:34,35. “Inywe muli kisura ky'ensi; kakuba ekisura kihoibwamu orusa, orusa oru ruligarurwamu ruta? Kiba kitakyagasa, kisigaliire kunagwa n'okurubaatirirwa abantu.
14 #
Yoh 8:12; 9:5. “Inywe muli kyererezi ky'ensi. Orubuga orwombekerwe ha rusozi tirusobora kuserekwa. 15#Mar 4:21; Luk 8:16; 11:33.Busaho muntu ahemba etaara akagijuumikira ekigega, baitu bagita ha kikondo, nukwo emulikire abantu boona abali omu nju. 16#1Pet 2:12.Ekyererezi kyanyu nukwo kimulikire kiti abantu, barole ebikorwa byanyu ebirungi, bakugize Isiinywe ow'omu iguru.”
Yesu naagumya Ebiragiro
17“Mutateekereza ngu, nkaija kwihaho Ebiragiro n'abarangi. Ebi ntaije kubiihaho, baitu nkaija kubihikiriza. 18#Luk 16:17.Mazimakwo nimbagambira nti: Iguru n'ensi bitakahoireho, busaho enyuguta n'emu ey'omu Biragiro noobu kaakuba kacweka kaayo akaliihwamu, okuhika byona obu birikahikirra. 19Nahabweki weena anyakucwa ekimu ha biragiro binu ebike, kandi akeegesa abandi kubicwa, alyetwa muto omu bukama bw'omwiguru; kandi weena anyakubikwata akabyegesa abandi, alyetwa mukuru omu bukama bw'omwiguru. 20Baitu nimbagambira nti: Obuhikiriire bwanyu obu butalikira obw'abeegesa b'ebiragiro n'obw'Abafalisaayo timulitaaha omu bukama bw'omwiguru.”
Enyegesa za Yesu nizikira eza ira
(Luk 12:57-59)
21 #
Kurug 20:13; Bir 5:17. “Mukahurra aba ira nkooku baagambiirwe bati: ‘Otaliita; weena anyakwita w'okusingwa omusango’. 22Baitu nyowe nimbagambira nti: Weena anyakubiihirirwa mugenzi we ali w'okusingwa omusango; weena anyakujuma mugenzi we alitwarwa omu rukurato; kandi weena anyakweta mugenzi we ati: ‘Kidoma we!’ Ogu alinagwa omu kiinongoro ky'omurro. 23Habweki, kakuba oba noohayo ekisembo kyawe ha itambiro, okaijuka nkooku mugenzi waawe aina eki arukukujunaana, 24siga aho ekisembo kyawe omu maiso g'itambiro, genda obanze ogarukanganemu nawe, nubwo ogaruke ohonge ekisembo kyawe.
25“Garukanganamu bwango n'ogu arukujunaana, atakakuhikize omu bulemi; nukwo aleke kukunyegerra hali omucwi w'emisango, n'omucwi w'emisango akakukwasa omuserikale, kandi omuserikale akakuta omu nkomo. 26Mazimakwo nyowe ninkugambira nti: Tolirugamu okuhika obu olikasasurra kimu akasente koona.”
Okutasiihana
27 #
Kurug 20:14; Bir 5:18. “Mukahurra nkooku kyagambirwe kiti: ‘Otalisiihana’. 28Baitu nyowe nimbagambira nit: Weena ogu arora omukazi akamwegomba, buli omu mutima gwe aba asiihaine nawe. 29#Mat 18:9; Mar 9:47.Eriiso lyawe ery'obulyo kakuba nirikuleetereza kusiisa, liihemu olinage; haakire ofeerwe orugingo rumu orw'omubiri gwawe, kukira omubiri gwona kunagwa omu kiinongoro ky'omurro. 30#Mat 18:8; Mar 9:43.Kandi omukono gwawe ogw'obulyo kakuba gukuleetereza kusiisa, gutemeho ogunage; haakire ofeerwe orugingo rumu orw'omubiri gwawe, kukira iwe weena kugenda omu kiinongoro ky'omurro.”
Okulinda obuswere
(Mat 19:9; Mar 10:11-12; Luk 16:18)
31 #
Bir 24:1-4; Mat 19:7; Mar 10:4. “Kandi kikagambwa kiti: ‘Omuntu weena obu abingira kimu mukazi we, amuhe ebbaruha erukwoleka nkooku amubingire.’ 32#Mat 19:9; Mar 10:11,12; Luk 16:18; 1Kor 7:10,11.Baitu nyowe nimbagambira nti: Omusaija kakuba abingira kimu mukazi we, atarukusigikira ha busiihani, nuwe aba amuleeteriize kusiihana obu aswerwa handi; n'omusaija anyakuswera omukazi ayabingirwe, nawe aba asiihaine.”
Naabahabura okutarahira
33 #
Lev 19:12;
Kubar 30:2; Bir 23:21. “Mukagaruka mwahurra nkooku abantu ba ira bagambiirwe bati: ‘Otalirahirra busa, baitu eki orahiriire MUKAMA okihikirizeege!’ 34#Yak 5:12; Is 66:1; Mat 23:22.Baitu nyowe nimbagambira nti: Mutalirahira naakake konka, noobu lyakuba iguru, habwokuba nikyo kitebe kya Ruhanga; 35#Is 66:1; Zab 48:2.rundi ensi, habwokuba nuko akatebe k'ebigere bye; rundi Yerusaalemu, habwokuba nurwo orubuga rw'Omukama omukuru. 36Noobu kwakuba okurahira omutwe gwawe, habwokuba tosobora kuhindura akasoke kamu kuba akarukwera rundi akarukwiragura. 37Leka ekigambo kyawe ‘Ego’ kiikale kiri ‘Ego’, rundi ‘Nangwa’ kiikale kiri ‘Nangwa?’; Ebirukukira hali ebi biruga hali Omubi.”
Naabahabura ha kuhoora enzigu
(Luk 6:29-30)
38 #
Kurug 21:24; Lev 24:20; Bir 19:21. “Mukahurra nkooku kyagambirwe kiti: ‘Eriiso lirehwe eriiso, n'eriino lirehwe eriino.’ 39Baitu nyowe nimbagambira nti: mutalyeholerra enzigu. Omuntu obu araakuteeraga oruhi ha rusaya rw'obulyo, omuhindurre n'orundi. 40Omuntu kakuba nakunyegerra habw'esaati, leka atwale n'ekooti. 41Kakuba omuntu naakuhambiriza kugenda nawe kilomita emu, genda nawe n'eya kabiri. 42Omuntu kakuba akusaba, omuhe; kakuba akwohoza, otalimwangirra.”
Okugonza abanyanzigwa
(Luk 6:27-28,32-36)
43 #
Sir 12:4-7. “Mukahurra nkooku kyagambirwe kiti: ‘Ogonzeege mutaahi waawe kandi onobege omunyanzigwa waawe’. 44Baitu nyowe nimbagambira nti: Mugonzeege abanyanzigwa banyu, kandi musabirege abarukubahiiganiza, 45#Sir 4:10.nukwo mube baana ba Isiinywe ali omu iguru, habwokuba ajwisiza omusana ababi n'abarungi, kandi anagira enjura abahikiriire n'abatali bahikiriire. 46Obu muraaba nimugonza abarukubagonza, mulitunga mpeera ki? N'abasorooza b'omusoro tinukwo bakora bati? 47Obu muraaba nimuramukya bagenzi banyu bonka, abandi nimubakizaaho ki? N'Abanyamahanga tinukwo bakora bati? 48#Lev 19:2; Bir 18:13.Habweki mube bahikiriire nka Isiinywe ow'omu iguru oku ahikiriire.”
Currently Selected:
Mat 5: BRR2008
Highlight
Share
Compare
Copy
Want to have your highlights saved across all your devices? Sign up or sign in
Bible in Runyoro/Rutooro Interconfessional Translation © Bible Society of Uganda, 2008.
