Aos. 18
18
Abu akica tocau aneni ayakasi Ŋisirael
1Abu akica ŋina apolon nooi tocau aneni ayakasi ŋituŋa kon ŋuluseuna.
Apotu ŋimoe kec kiirasi ŋitoilon a ŋituŋa kon, nai apotu nyiŋolikis ŋasima kec
ka apotu kirworo atemar erae ŋituŋa kon ŋulu elakara, anerae emam ŋican apotu toryamut,
2apotu ikes tolakaros aŋuna aponiata ŋituŋa kon nyisicaniata ikes aŋuna sek etiyato ikes neni a ŋuluseuna kon,
apotu ikes kiŋita ŋituŋa kon akisyon ikes aŋuna a ediŋet a ŋolo sek ayakatar ikes.
3Aŋun, ibu iyoŋ inak ŋituŋa kon ibore ŋini anoki ikwa akim,
ikotere eruwor ibore ŋin ŋini iteni ŋituŋa kon alorot a ŋolo pa ayenete ikes
ka ibu iyoŋ inak ikes akica ŋina ka akoloŋ ŋina pa apedorit akiwan ikes anawosit kec a ŋina apolon a ŋin.
4Nai amaikina ŋimoe kec nyeryamut akica ka amaikina toenae anakiryonut,
anerae apotu ikes kiwuakis ŋituŋa kon nakiryonut,
ŋituŋa kon ŋulu amaikina erae neni kec isitorunio akica ŋina a ŋikisila a ŋulu a ŋikaru ka ŋikaru pena neni a ŋituŋa a daadaŋ.
Atwanare a ŋikiyae anakwap a Ijipit
5Apaki ŋina aponiata Ŋijipitian akiar ŋiŋwea a ŋituŋa kon a ŋuluseuna,
ido aponi apaki ŋin toesikinae ikoku ipei tolakunae;
ibu iyoŋ anakisican Ŋijipitian tolema ŋidwe kec ŋulu alalak nooi,
ibu iyoŋ tomunya a akalele a ŋina apolon nooi Ŋijipitian daadaŋ kaapei.
6Ayenete atapapaa kosi ŋakiro ŋuna itiyakin akoloŋit ŋin nakwaare,
ikotere nai ikes elelyanete anayenut ŋuna ka aosou a ŋina a ŋakiro aŋuna ekoŋito ikes akitiya ka ekinyomito ikes.
7Edarito ŋituŋa kon alakuno ŋina a ŋulu iyookino
ka amunyaro ŋina a ŋimoe kec.
8Ibu iyoŋ a apedor a ŋina ibunio kisicania ŋimoe kosi
ikinyara isua neni kon ikitopoloo isua;
9anerae apotu anakimunono ŋidwe ŋuluseuna ŋulu a ŋituŋa kon a ŋulu ajokak ikiinakis iyoŋ ŋamuronisya
ka anacamuna kaapei apotu tocamut akiwuap ŋikisila ŋulu ka Akuj,
ikotere nai ŋuluseuna emorete kaapei ŋiboro ŋulu erae ŋipei,
ŋarereŋisyo kaapei ka ŋatyokisyo.
Tari apaki ŋin, aeosi ikes isitiyaete ŋieosyo ŋulukoloŋ atapapaa.
10Nai abu akigworo ŋina eŋopitotor ŋimoe a ŋituŋa kon igworosi toboŋu neni a ŋituŋa kon,
ido abu akigworo aŋuna ka atwanare a ŋidwe kec todol nakibois daadaŋ.
11Aponi epito kisicanae lopite ŋolopei esicanere ekapolon
ka apotu ŋituŋa ŋulu pa arae ŋikepukak totwakiyasi ŋiboro kec lopite ŋolopei abunio erwosit totwaniyarya ŋiboro keŋ,
12ido apotu ŋituŋa ŋulu alalak totwaka alopite ke epei,
alalak ŋawat a ŋikatwak, arae ŋuna pa emarun.
Apotu ŋituŋa ŋulu ayarete nyepedosi akinuk ŋawat ŋun,
anerae alotooma apaki apei bon aponi ŋidwe kec ŋuluminan tomunyarae.
13Tari ŋina aponiata ŋituŋa ŋul nyenupa ŋakiro daadaŋ aŋuna ka akiwuapit kec ŋakujo,
apotu apaki ŋina amunyarere ŋikiyae kec tocamut atemar erae Isirael ikoku ŋini ka Akuj;
14anerae apaki ŋina eyapunor akililiŋ ŋina abu torapuwa ŋiboro daadaŋ
ka ŋina abunio todol kidiŋ akuwar atipei,
15abu akirot kon ŋina ka apedor a daadaŋ bu anakuj alokicoloŋ kon a ŋolo ipukator iyoŋ,
abu akirot ŋin bu nakwap ŋina amaikina tomunyarae ŋituŋa keŋ,
abu bu lopite ŋolo ebunio ekajion etenit akitijikin.
16Abu bu eyakar ekileŋ ŋolo akwanan ŋolo ka alimunet kon a ŋina ka apedor,
abu akirot ŋin bu yau atwanare neni a ŋiboro a daadaŋ,
ani ewoi akirot ŋin alokwap, adolunit tari nakuj.
17Abu nai apaki ŋinapei bu atakanunet ŋina aŋakirujaeta aŋuna a ŋinyas a ŋulu apotu kitubulo ikes nooi,
abu akuryanu ŋina ka atipei min neni kec.
18Apotu ŋituŋa topero irakara, ice ama ka ŋinice iwace,
ido aponi kiteyenikinae ikes ŋakiro ŋuna atwakyata
19Ayenete ikes ŋakiro ŋuna alwaketa, anerae aris ŋakirujaeta kec ŋuna etubulok kelimokis ikes,
ikotere nai ikes nyetwaka pa eyenete ŋakiro ŋuna eryamunitotor ŋican.
Tolimokinae Ŋisirael analoŋisat atemar ikimunyaryo
20Apotu ŋakiro ŋuna ka atwanare a ŋin kitubulo tari ŋituŋa ŋulu eyookino,
ido abu edeke bu analoŋisat neni a ŋituŋa a ŋulu alalak nooi,
nai abu anyunyura ka Akuj ŋin nyeya apaki ŋina aoyan eriŋa eyai.
21Abu ekile ŋolo eyookino kirwor atipei aŋuna a ŋituŋa,
abu kilip atipei ikwapei araakar ŋol etic keŋ aŋuna a ŋituŋa.
Abu iŋes kilip ka kicuny ekinyate,
abu nyeker ŋakiro ŋuna ka aŋoit kon ka abu kitasalu amunyaro,
itoodiunit atemar erae iŋes eketiyan kon.
22Abu iŋes kitasalu ŋakiro ŋuna ka anyunyura, meere ka agogoŋu keŋ,
meere alotooma akitijiore,
nai anakirot keŋ, abu iŋes kitojoŋo akisicanio anadyekitoi irworo ŋakiro ŋuna ikoŋitoe ka ŋuna a ŋacamuneta a ŋuna ibunio iyoŋ tocamunotor ka atapapaa kosi;
23anerae apaki ŋina arisyo ketwaka ŋituŋa ketukokin ŋawat kec iwapei,
abu ekile ŋolo eyookino ŋol kilip neni kon kitasalu anyunyura kon,
tojoŋo atwanare abunit neni a ŋulu ariŋa eyarete.
24Anapit iŋes ekaaso ŋolo esibusitae a ŋitorubei a ŋulu ka akwap a daadaŋ,
ido anakitopoloorit atapapaa kosi, abu iŋes tonap anatorobu keŋ ŋamoru ŋuna arekinitae lolaino ŋiomwon, ŋuna eciekinitae ŋakiro atapapaa kosi
ka anapit iŋes anakou keŋ ebokot ŋolo ka apolou kon a ŋina ailiilon.
25Aloboro a ŋul, abu ekaaran toboŋo, abu toesik akiar.
Arae ŋin akitoodiunet ŋina ka anyunyura kon ŋina adit, ŋina abu kitemokin.
Currently Selected:
Aos. 18: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.