Aos. 13
13
Abaŋao ŋina ka akilip neni a ŋisubuna
1Ŋituŋa daadaŋ ŋulu pa ayenete Akuj, arae ŋibaŋaanotin ŋulu idounitere abaŋao;
apotu ikes nyeyenut aloboro a ŋulu ajokak a ŋulu etakanete Akuj ŋina eyari jik,
apotu tari nyeyenut ekasubunan a ŋiboro a daadaŋ tari kitete ŋiboro ŋulu asubunio,
2Nai apotu ikes totamakis atemar kerae akim, kori ekuwuam, kori ekuwuam ŋolo ipiripiri,
kori anok a ŋikacer, kori ŋakipi ŋuna ipumasi,
kori ŋisubuna ŋulu alokidiama ikes erae ŋakujo ŋuna ipukato akwap.
3Ani kerae aŋuna ka alakara aŋuna ka akibuses a ŋisubuna a ŋul iŋes keponiata ŋituŋa totamakis atemar erae ikes ŋakujo,
emaikina ŋituŋa toyenut atemar ejok nooi Ekapolon kec akilo ŋisubuna ŋul,
anerae Akuj ŋina eyakar Akibuses iŋes asubuni ŋisubuna ŋul.
4Ani nai keumokinito ŋituŋa aŋuna a ŋakiro a ŋuna itiyanakin anapedor a ŋisubuna a ŋul,
emaikina nai ŋituŋa toyenut anapedor a ŋisubuna a ŋul
epite ŋolo epoloo nooi apedor ŋina ka Akuj a ŋina asubuni ikes.
5Analalau nooi ka anakibuses a ŋiboro a ŋulu esubunitae,
ikiyenuni iwon ŋakiro a Ekasuban.
6Nai acepaki edisyak ŋituŋa ŋul nyepedoryo akitoroniyar,
anerae acepaki eoliyorete ikes,
apaki ŋina iwaritotor ka ecamitotor aryamun Akuj.
7Ani eriŋa ikes iboiyete alokidiŋ ŋiboro ŋulu itiyat Akuj, erubakinito ikes iwarito Akuj,
ido ikinyomeneneete neni a ibore a ŋini iŋolikinete ikes,
anerae ibusak nooi ŋiboro ŋulu etakanete.
8Nai kikote neni daŋ, emam ŋuna emaikina torimakinere ŋituŋa ŋul;
9anerae ani keyakatar ikes apedor ŋina eyeniata ŋakiro ŋuna alalak
ŋuna itepedorito ikes aripirip ŋakiro ka akwap,
ekokinete ikes isipiyorosi ayenun atipei Ekapolon ŋolo a ŋiboro a daadaŋ ai?
Abaŋao ŋina ka akilip neni a ŋakujo
10Nai ŋituŋa ŋulu eryamunito ŋican nooi anakiwuakinit akigeno kec loboro ŋuluatwak,
ikes ŋulu elimonokinete ekiro ebe “akuj” neni a ŋiboro a ŋulu itiyaunit ituŋanan,
neni a egolid ka esilipa ŋolo eyeunitae anaosou
ka neni a ŋulu eyeunitae ikwaan ka ŋityaŋ,
kori amoru koŋin, ibore ŋini koloŋ kitiyauni ituŋanan.
11Epedori ituŋanan ŋini aoson ayepakin ekitoe kwap ikotere epatanikini akileny,
ido tobuto ka aosou ŋakaabuk daadaŋ,
tosodi analakara a ŋina ka ayenut akitiya ibore,
kitiyau eborosit ŋolo ajokan ŋolo iitana anakiyar.
12Ani ekaku, kisitiya ŋakiciet
akipoo akimuj keŋ, ido kimuj kimwono.
13Nai akitoe apei ŋina abu iŋes totub ŋina pa ajok,
acepaki kerae ŋina emagul ka elalak ŋikakomikom
eai iŋes akitoe ŋin, ido kice ecoikinit apaki ŋina emamukar ibore itiyae,
icie iŋes akitoe ŋin isitiyae aosou ŋina eryamunit anamamukau ibore ice ŋinikitiya;
icieuni iŋes anakitoe a ŋin ibore ŋini ikwaan ka ituŋanan,
14kori icieuni ikwaan ka etyaŋ ca koŋin,
kiwuak ibore ŋini ikoni ekot ŋini areŋan,
ido kiosak niboro ŋin eraŋgi ŋolo areŋan
ka torapuwa a eraŋgi neni aronon daadaŋ anibore a ŋin,
15tosodi kitiyak aŋuna a ibore a ŋin itedo narwatata,
ido kiwuak ibore ŋin nen, narwatata, kimijak ka asuwat.
16Totamatama nai aŋuna a ibore a ŋin, ikotere nyimasun
anerae eyeni iŋes atemar nyiŋarakin ibore ŋin bon,
aŋuna eraakar etorube koŋin ŋolo emaikina kiyokitetei.
17Ani ilipi ituŋanan ŋin aŋuna a ŋiboro a ŋulu ecamit ka aŋuna ka aryamun aberu ta ŋidwe,
nyirumete iŋes ŋileec akirworo neni a ibore a ŋini nyeyari.
18Ilipi iŋes aŋuna ka aŋaleu neni a ibore a ŋini emam agogoŋu,
ilipi iŋes aŋuna ka akiyar neni a ibore a ŋini etwanit;
ilipi iŋes aŋuna ka akiŋarakino neni a ibore a ŋini emam ŋakiro eyeni,
ilipi iŋes tomam ŋace alorot keŋ neni a ibore a ŋini nyerotonokini;
19ilipi iŋes aŋuna ka aryamun ŋisiliŋa ka aŋuna ke etic ta akitiyaunun ibore ŋini ecamit iŋes;
iŋita iŋes agogoŋu aneni a ibore a ŋini emam agogoŋu.
Currently Selected:
Aos. 13: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.