Sir 46
46
Yosua ka Kaleb
(Yos. 6—11)
1Arae Yosua lokoku a Nun ekile ŋolo etiron alojie
ka arae iŋes abu kilunyokin napolou ekaku a Moses alotic a ŋolo ka akidwar.
Abu iŋes toruwor ekaiunan ŋolo apolon a ŋituŋa ka Akuj a ŋuluseuna ikwa iteyenunitor ekiro keŋ,
aŋuna ka akinyaŋarya ŋakiro a ŋimoe a ŋulu aremokino ŋituŋa keŋ ikotere eryamunete Ŋisirael ŋalup ŋuna eruwor ŋuna kec.
2Arae nooi ibore ŋini ka aumokin ŋakiro keŋ apaki ŋina ikiarya iŋes ŋakan keŋ
ido kitijik a ekileŋ keŋ ŋitaunio eremokino.
3Ŋae epedori arubakin alojie ewoi alokiŋaren keŋ?
Anerae aji iŋes ŋijiesyo ŋulu a Ekapolon.
4Meere mono aŋuna keŋ abunio akoloŋ towuoya aiwapei,
ido abu apeikoloŋit tooyaar kikok ŋarwa ŋaarei a?
5Abu iŋes tonyara Akuj ŋina alokidiama nooi,
Akuj ŋina etiron apaki ŋina erikauniata iŋes ŋimoe alowaetin a daadaŋ,
ido abu Ekapolon ŋolo ka apedor toboŋok akilip keŋ,
tocaku ŋakako ŋuna ka apedor keŋ a ŋina etiron.
6Abu iŋes kitubul ŋituŋa ŋulu ka akwap a ŋin
ka abu Yosua tomunya ŋulu ajioto iŋes anadipoe a ŋimoru, ikotere eyenuniata ŋakwapin epite ŋolo agogoŋio Yosua alojie
ka atemar, aji iŋes alokiŋaren Ekapolon,
anerae arae iŋes ŋolo ainakina anakiwuapit Akuj ŋina etiron.
7Alorwa a Moses, abu Yosua kitoodiu akitopoloorit keŋ Moses ka Akuj;
apotu iŋes ka Kaleb lokoku a Yepune kitoodiut nu:
Apotu ikes kitepega atukot a ŋituŋa kiteesikis ŋituŋa ŋasecisya,
ido kisililiŋa aronis ŋina eŋuruŋuratar ikes.
8Alotooma ŋikajiok ŋulu alosete a ŋakejen ŋalipyo ŋamiae ŋakanikapei,
Yosua ka Kaleb bon aponi kimyekinae aŋuna ka arikoria ŋituŋa nakwap ŋina amaikina toruwor ŋina kec, nakwap ŋina elelyaata ŋakile ka ao.
9Abu Ekapolon inak Kaleb agogoŋu ŋina abu kidoŋ neni keŋ tari namojoŋu
aŋun, abu iŋes tolot nakwap ŋina a ŋikamukumukui,
ido apotu ŋidwe keŋ toryamut akwap ŋin, toruwor ŋina kec.
10Ikotere epedoryata Ŋisirael daadaŋ aanyun ajokis ŋina ka akiwuapit Ekapolon.
Ŋikatubok
(Ŋikat. 1—16; 1 Sam. 3:19-20)
11Erae lu daŋ ŋikatubok, elimunitoe ikes a ŋirorwa kec,
arae ikes ŋulu pa apotu kiwuapa ŋakujo ŋace alotai kec,
apotu ikes nyeŋero akiwuapit ŋuna a Ekapolon;
Elipi torubakinae etamunitae ikes anakitopoloorit.
12Elipi bu akiyar ŋinakitete aneni eperyoto ŋakoyo kec,
elipi kiboiyoto nabo ŋirorwa a ŋulu aponi kitopolooroe aneni a ŋipapae kec.
13Amina Ekapolon keŋ Samuel;
arae iŋes ekadwaran ŋolo ke Ekapolon,
abu iŋes kisyak apukan,
ido abu kiosak akimyet neni a ŋulu apotu toruwor ŋikapolok a ŋituŋa keŋ.
14Abu iŋes totubonok atukot alokisila a Ekapolon,
ido abu Ekapolon kiyok ŋituŋa a Yakob.
15Aponi kisileereunoe iŋes erae ekadwaran aŋuna ka akikinyomit keŋ Ekapolon,
ido anakiro keŋ, abu iŋes toruwor eketeyenikinan ŋolo ekinyoma nooi.
16Abu iŋes tonyara Ekapolon Akuj ŋina etiron,
apaki ŋina erikauniata ŋimoe keŋ iŋes alowaetin a daadaŋ,
abu iŋes inak ikwa amuronot ikale ŋini ariŋa enaki.
17Abu nai Ekapolon togirok anakuj,
kimyek etoil keŋ kiirarae erwo ka apedor a ŋina etiron.
18Abu iŋes toreu ŋikarikok a ŋimoe
ka ŋikepukak a Ŋipilistin daadaŋ.
19Ani eriŋa Samuel nyetwana, abu tolimu ŋakiro nu aŋuna a Ekapolon ka erwosit ŋolo abu iŋes kiosak akimyet,
abu tema, “Emam iborosit, emam tari ŋamuk alema ayoŋ aneni a ituŋanan a idio.”
Emam ituŋanan idio abu kisitak Samuel.
20Tari kedau iŋes atwanare, abu iŋes todwar,
ido kiteyenik erwosit Saul epite ŋolo etwania,
ido abu etoil keŋ kirworik analup edwari atemar kikisarae aronis ŋina a ŋituŋa.
Currently Selected:
Sir 46: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.