Sir 26
26
Alelyanu a ekile aŋuna a aberu a ŋina ajokan
1Elakara ekile ŋolo eyakar aberu ŋina ajokan;
iatakinio ŋirwa ŋulu ka akiyar keŋ.
2Eyauni aberu ŋina ikinyoma alelyanu neni alokile keŋ,
ido irikakini ekile keŋ ŋikaru ŋulu a akiyar keŋ a ekisil.
3Erae aberu ŋina ajokan arereŋu ŋina apolon nooi;
iteryamunio iŋes ŋarereŋisyo a ekile a ŋolo itopoloorit Ekapolon.
4Tari kebarit kori kekulyakana ekile ŋol, elakara iŋes alotau keŋ ka
emaisyani ereet keŋ ŋisaae daadaŋ.
Aronis ŋina aronon akilo iŋes aberu ŋina aronon
5Erae lu ŋiboro ŋiuni ŋulu itukuryanete etau kaŋ
ka ŋini a ŋiomwon ŋini akerit ayoŋ nooi:
Akiyanyanar alotaun, acunanakin ayeun aruruma ka akisitanakin ŋina ka alyokon, eroko ŋun daadaŋ akilo atwanare.
6Nai ani kelilit aberu aŋuna a nakain keŋ, eyakar iŋes aryeba ka akiyaloloŋ lotau keŋ,
ido eyenunete ŋituŋa daadaŋ aberu ŋin aŋuna a ebura keŋ.
7Ikoni aberu ŋina aronon ayokot ŋina apoton ŋimoŋin,
akikamun iŋes ikoni akikamun ekiitwan.
8Itolomununui aberu ŋina ameran aŋoit ŋina apolon,
nyimunoni iŋes ŋikeleec.
9Akitopolooro bon, erae ibore ŋini emunaari aberu ŋina nyiyokuuno bon anakiyar keŋ, idupori iŋes akibuses a ŋakonyen keŋ.
10Kitee ejok ikoku ŋinipese ŋini itogogoŋit akou,
acepaki keryamu iŋes apaki ŋinakitiyaet aronis, epedori akisitiya apaki ŋin.
11Kitee ejok ŋakonyen keŋ ŋuna esuparak
ka nyiumok erae kitiya iŋes ŋuna aronok neni kon.
12Lopite ŋolo eŋaarya ekaloton ŋolo enyamit akure akeekituk,
tomat ŋakipi ca daadaŋ ŋuna eya diyete keŋ, aŋun epedori aberu ŋina aronon akiboikin kiŋaren asesit a ŋoloema daadaŋ,
ido kidareu a nen ekile ca daadaŋ ŋolo ebuni neni keŋ.
Arereŋu aŋuna ka aberu a ŋina ajokan.
13Italakari akibuses a aberu lokile keŋ
ka itumi apiiryanut akuwan a ekile keŋ.
14Erae aberu ŋina eliliŋan ainakinet aneni ke Ekapolon ka emam ibore ejok ŋini iloit ŋipitesyo keŋ ŋulu ka apatanu.
15Aberu ŋina etyamaana, iyasi akibuses nakibuses keŋ ka emam akipimet ŋina ipimunere etyae ŋolo ka atyamaara keŋ.
16Ikoni akibuses a aberu a ŋina ajokan a ŋina esubakinit ere keŋ ejok,
akoloŋ ŋina elomuni alokidiama ŋimoru ŋulu a Ekapolon.
17Lopite ŋolo enepya etaa anawoyet a ŋina asegan, ikoni nenipei ereet ŋolo ka aberu a ŋina ajokan.
18Lopite ŋolo eyakatar ŋipirin ŋulu a egolid nawoeta ŋuna a esilipa, ikote nenipei ŋakejen ŋunadiryae ŋuna nyiryaŋiryaŋasi ŋuna ka aberu a ŋina ajokan.
19Ikaakoku, kiturubak asoroko kon erae ŋina ejokya akuwan kon ka nyiinak akonigogoŋu neni a ŋigelaanotin. 20Kiwaru anadipo a daadaŋ emanikor ŋolo etaroko ŋalup, ido todupak nen ekinyomit kon a ilope; kikinyomite ŋikinyom kon a ilope. 21Aŋun, epitunete ŋiletok kon ikinyomito eyakae a ŋikauruunak kec epolounete ikes erae ŋulu itopolooritae.
22Itete ŋituŋa amalaat ikwaan ka akimulat ŋina emwaar, ido ikwaan aberu ŋina iisitae aneni a ŋulu eminasi iŋes ka aduketait ŋina aoyan ŋina ikiari keritakin.
23Einakinio aberu ŋina emam ayenut Akuj neni a ekile a ŋolo nyiwuapit ŋikisila, nai einakinio aberu ŋina einakina neni ka Akuj neni a ekile a ŋolo itopoloorit Ekapolon.
24Itiyae jwi jwi aberu ŋina nyirumeneneete ŋileec ŋakiro ŋuna nyejokak,
nai aberu ŋina ajokan a ŋipitesyo, nyepedori tari akitiya ŋuna a ŋileec alokiŋaren ekile keŋ.
25Itusubunitae aberu ŋina agogoŋon a akou aŋok, nai ŋina ecoit aryamun ŋileec, itopoloori Ekapolon.
26Aberu ŋina itopoloorit lokile keŋ, ileereuni erae ŋina eos aneni a daadaŋ, nai ani pa kitopoloo iŋes lokile keŋ, alotooma akituro keŋ, eyenunete ŋituŋa daadaŋ iŋes erae ŋina nyiwuapit ŋuna ka Akuj.
Elakara ekile a aberu a ŋina ajokan; ido iatakinio ŋikaru ŋulu ka akiyar a ekile a ŋol.
27Aberu ŋina ecelana ka kiburana, ikoni arupepe ŋina ekutakinio akitaŋatakinia ŋituŋa ajiore ka ituŋanan ŋini eyari alopite a ŋol, iboi elemarit aŋuna ke ejie.
Ŋiboro ŋiuni ŋulu ikisiyaloloŋete
28Eyakasi ŋiboro lu ŋiarei ŋulu isiyaloloŋete etau kaŋ ka aŋuna a ŋini a ŋiuni, aŋoyenene ayoŋ: Ekajion ŋolo eyakar akiitanit alotooma keŋ, ŋikilyok ŋulu apiiryanak ŋulu ejamuwaritae ka ituŋanan ŋini eesikini akitiya ŋuna ka akiyookino kitiya asecit, itemokini Ekapolon ituŋanan ŋin aŋuna ke ekileŋ.
Ŋakitemyeta ŋuna ka amucuruso
29Nyepedori emucurus akitiya ekeetic emam akitiya ŋuna nyiyookino, kori nyebucar ekagyelanaran anakitiya asecit.
Currently Selected:
Sir 26: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.