Sir 20
20
Akililiŋ ka akirworo.
1Eyai akiŋenyakin ituŋanan ŋina eŋesun
ka eyai ituŋanan ŋini eos nooi ŋini epedori akililiŋ.
2Ejok nooi akiŋenyakin ituŋanan edyakari akilo akililiŋia aŋoit kon.
3Ituŋanan ŋini ecamuni atemar adyakarit, iyokiyo iŋes nyisicanio.
4Ituŋanan ŋini ereikinit ŋakiro atemar tocamunae
ikwaan ka ekile ŋolokolup ŋolo ikamuni apese kitiŋak akiryamakin.
5Ililiŋete ŋicetuŋa, ido totamakinae atemar kori eosok,
ido ŋice itoroniaritae aŋuna irworyaketa.
6Ililiŋete ŋicetuŋa, anerae emamukatar ŋunalimuno,
ido ŋice ililiŋete, anerae eyenete ikes apaki ŋinakirworikinet.
7Erubakini ituŋanan ŋini aoson ililiŋi tari ŋina edolyo apaki ŋina itemokino kirworikinia,
nai ibaŋaanot ŋini eturon nyeyeni apaki ŋinakirworikinet.
8Ituŋanan daadaŋ ŋini irworo ekaoyan a ŋinapaki, itoroniyaryo
ka ituŋanan daadaŋ ŋini ilopiyari akirworo aneni a ŋikapolok eremokinoi.
Akijulujul ŋakiro
9Acepaki eyakaunun ŋuna ajokak neni a ituŋanan a ŋini isicanitae
ka epedori akisicanio aŋuna ka aryamun ibore ŋini ajokan akitotwaniar aryamun ibore ŋin.
10Eyai ainakinet ŋina nyikiteryamuni iyoŋ ibore idio
ka ainakinet ŋina ideniunitoe eruwor ŋina etacio iyatakina.
11Eyakaunun atwaniyar ibore aŋuna ka aryamun apolou,
ido eyakasi ŋituŋa ŋice ŋulu aryamut apolou aŋuna ka akitiditeuna kec anakiro a daadaŋ.
12Ipigaete ŋituŋa ŋice ibore ŋini alalan a ibore a ŋini edit,
nai totaca ekaku ibore ŋini alalan adepar.
13Eruwonor ŋikaosok ŋulu eminae anakiro kec a ŋuna ekudyoko,
nai akitojoka a ŋibaŋaanotin alorwor kec, erae akicanican erwor.
14Emam idiobore iryamuni iyoŋ anainakinet a ibaŋaanot,
anerae iwarit iŋes atemar okotacakin ŋini edolit ŋarwa ŋakanikaarei a ainakinet a ŋin.
15Ikiinakini ibaŋaanot ibore ŋini edit, nai ikirworor nooi irworo ecela nooi ecamit kiirasi ŋituŋa daadaŋ,
ikidenikini iŋes iyoŋ ibore nakuwar na,
ani moi taparacu kiitan akinyakakino; nyejok aneni ka Akuj ka aneni a ŋituŋa ituŋanan ŋini ikoni nen.
16Ebala ibaŋaanot, “Emam ayoŋ ŋikonei ka emam ŋini akalimonokini ayoŋ atemar alakara aŋuna a ŋiticisyo kaŋ a ŋulu ajokak,
ekerworotor ayoŋ ŋulu imujete akimuj kaŋ.”
17Ŋiyai elimunete atemar erae iŋes ibaŋaanot ka ŋarwa ŋayai elimokiniata?
Erwor ŋolo nyiyookino.
18Ejok akicurutiyar anenidelet akilo akibutor irworo,
iburuburuun akinyasuno a ŋulu aronok atipei.
19Ikwaan ituŋanan ŋini aryenyaanan ka eemut ŋolo nyemaikina kiyanunae,
ŋolo irworosi ŋituŋa a ŋinapaki ŋulu nyeyenete apolou keŋ.
20Epedorete ŋituŋa akiŋer akitadapet ŋina elimuni ibaŋaanot,
anerae nyelimuni iŋes akitadapet ŋin anapaki a ŋina iyookino.
21Epedori akulyako akiretakin ituŋanan asecesec;
aŋun ani ieŋuni iŋes, eryamuni atemar mam ŋuna iilitor iŋes aŋuna ka asecit.
22Epedori ituŋanan acakar akiyar keŋ aŋuna a ŋileec,
kori epedori acakar aŋuna ka akitopoloorit ŋituŋa.
23Epedori ice acakar akiyar keŋ aŋuna ka akiiyanakin ŋikonei keŋ ibore,
ido toruwor emoit a ŋituŋa koŋin.
Alyokonu
24Erae alyokonu ibore ŋini ka asiilyo aneni a ituŋanan,
eyakaunun a ŋinapaki nakituk a ituŋanan a ŋini emam ibore eyeni akirworo alyokonu.
25Ejok ekokolan akilo ituŋanan ŋini anaiya akirworo alyokonu,
nai ibore ŋini eryamunete ikes daadaŋ iŋes amunaaro.
26Ŋuna iwuapit ekalyokonon,
erae ŋuna eyaete iŋes neni emam ajokis, ido eyakasi ŋileec neni keŋ a ŋinapaki.
Ŋakiro ŋuna irworoe aŋakitadapeta
27Isirworiunun ituŋanan ŋini aoson bon anakiro keŋ a ilope
ka ituŋanan ŋini etami ejok, elakar ŋikapolok aŋuna keŋ.
28Ŋulu itaete, etukete ŋikinyom ŋulu adaut alemun
ka ŋulu elakara ŋikapolok aŋuna kec, emookun anakitiya ŋuna nyiyookino.
29Erae akitojokyo ka ŋainakineta ibore ŋini elemari aosou aneni a ŋikaosok,
ido ikitojoŋoete ikes iyoŋ akirworo ŋuna akire.
30Aosou ŋina nyetakani ikwaan ka ebari ŋolo iwuaitae
erae ikes daadaŋ ŋicaryo.
31Ejokak ŋulu iwuaito abaŋao kec
akilo ŋulu iwuaito aosou kec.
Currently Selected:
Sir 20: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.