Ŋirom. 6

Ikitwakit iwon alokiŋaren asecit ka ikiyari ikotere Akuj

1Ikitemari nai tokona iwon ai? Ikitemari orubakisi ikisecenene ikotere ajokis ŋina ka Akuj iyatakin a? 2Mam jik! Nyepedori asecit akitap iwon, anerae ikipotu iwon otwaka alokiŋaren asecit, ikikokini nai iwon ikirubakini ikisecenene ai? 3Nyiyenete mono iyes atemar iwon daadaŋ ŋulu aponi ikibatisae akimorikin ka Yesu Kristo, aponi ikibatisae akimorikin ka atwanare keŋ a? 4Aŋuna nai ka akibatisao yok, iwon ikipotu omora atwanare keŋ ka aponi itonuki ka iŋes; ikotere nai iwon daŋ ikiyari anakiyar a ŋina kitete, ikwaŋinapei eteyarunere Kristo alokatwak aŋuna ka apolou a ŋina ka Akuj a Papa. 5Ani kikimorikina sek iwon ka iŋes anatwanare keŋ alopite a ŋolo atwania iŋes, ikwaŋinapei, ikimorikin iwon ka iŋes anayarun keŋ alopite a ŋolo eteyarunere iŋes. 6Ikiyeni iwon atemar epite ŋolo sek ikiyakar iwon, aponi toarae kaapei ka Kristo alomusalaba, ikotere inyasunio epite ŋolo ka asecit alotooma yok ka nyikirubak iwon ikirae ŋipi ŋulu ka asecit. 7Anerae ani etwani ituŋanan, adaun iŋes alacakin anasecit. 8Nai ani kikitwakit sek iwon kaapei ka Kristo, ikinupit daŋ atemar ikiponi akiyar kaapei ka iŋes. 9Anerae ikiyeni iwon atemar aponi kiteyarunae Kristo alokatwak ka nyetwani nabo; nyipukae atwanare iŋes nabo jik. 10Abu iŋes totwan alokiŋaren asecit; nyitemokino iŋes totwan nabo, nai eyari iŋes tokona aŋuna ka Akuj. 11Aŋun, iyes daŋ, itemokino totamakis atemar itwakito iyes ŋilopeyek alokiŋaren asecit ka iyarete aŋuna ka Akuj anakimorikina ka Yesu Kristo. 12Nyitemokino nai asecit ipukae ŋawat kus, ikotere nyiwuapyata iyes ekibure ŋolo a ŋawat kus. 13Nyijalakis ediokineri kus neni ka asecit, ikotere nyisitiyae ikwa ibore ŋini ejiyere alowae a ŋolo ka aronis. Nai inakisi ŋakusiwat neni ka Akuj ikwa ŋuna eteyarun alokatwak nakiyar ŋina kitete. Tojalakisi ŋinerin kus daadaŋ neni ka Akuj, ikotere kisitiya ikwa ŋiboro ŋulu ejiyere alowae a ŋolo ka akiyookino. 14Nyikipukat asecit iyes, anerae nyikipukato iyes Ŋikisila, nai ikipukat ajokis ŋina ka Akuj.

Ŋipi ŋulu ka akiyookino ŋulu itiyaete aŋuna ka Akuj

15Nyo nai? Itemokino iwon oseca, anerae meere Ŋikisila ikipukato iwon, nai ikipukat ajokis ŋina ka Akuj a? Mam jik! 16Iyenete iyes kire atemar, ŋina ijalatar iyes tocamut aruwor ŋipi ŋulu a ituŋanan a ice, iruworosi ŋipi ŋulu a ituŋanan a ŋini iwuapito iyes--kerae ŋipi ŋulu ka asecit a ŋina ikirikori natwanare kori ŋipi ŋulu ka akiwuapit ŋakiro ŋuna ka Akuj, ŋuna eyaunete akiyookino alokiŋaren Akuj. 17Nai olakaros neni ka Akuj! Anerae apaki ace, ipotu iyes toruworos ŋipi ŋulu ka asecit; nai ekaku ipotu kiwuapa a ŋitai kus a daadaŋ ŋuna a kire, ŋuna eya nakitatam ŋina ipotu iyes toryamut. 18Aponi itolacakin iyes anasecit, ido idaut aruwor ŋipi ŋulu ka akiyookino, ŋulu itiyaete aŋuna ka Akuj. 19(Erworo ayoŋ alopite a ŋolo irworotor ŋituŋa ikotere epataniar iyes ayenun ŋakiro kaŋ, anerae ipalag iyes anatameta.) Koloŋ sek ipotu iyes tojala ŋawat kus toruworos ŋipi ŋulu a ŋuna nyesegak ka ŋuna aronok aŋuna ka akitiya ŋuna nyiyookino alokiŋaren Akuj. Ikwaŋinapei, itemokino tokona iyes tojala ŋawat kus toruworos ŋipi ŋulu ka akiyookino, kitiyata ŋuna ka akiyookino alokiŋaren Akuj.

20Apaki ŋina iponiata iyes toruworotor ŋipi ŋulu ka asecit, ilacakina iyes anakiyookino. 21Nyo nai ipotu iyes toryamut apaki ŋina itiyaata iyes ŋakiro ŋun ŋuna tokona ikirumitotor iyes ŋileec? Atwanare iŋes abu bu anakiro a ŋun! 22Nai tokona aŋuna ikilacakinere iyes anasecit ka iruworotor ŋipi ŋulu itiyaete aŋuna ka Akuj, iryamunete tokona iyes akiyar ŋina italakarit Akuj ka iryamunete moi akiyar ŋina nyedaun. 23Anerae eropit ŋolo ka asecit iŋes atwanare; nai ainakinet ŋina a ikoŋin ŋina ka Akuj iŋes akiyar ŋina nyedaun alotooma Yesu Kristo Ekapolon yok.

Currently Selected:

Ŋirom. 6: NIB2008

Highlight

Copy