Ŋirom. 16

Emalas a Paulo

1Acamit ayoŋ alimokin iyes atemar erae nakaato yok Poibe, ŋina itiyae etic ŋolo ka atukot a Ŋikristo alo Kenikerea, ituŋanan ŋini ajokan. 2Kijautu iŋes alokiro ke Ekapolon, lopite ŋolo itemokino ŋituŋa ŋulu ka Akuj itiyaete ka inakisi iŋes akiŋarakinet daadaŋ ŋina iitani iŋes aneni kus; anerae abu iŋes kiŋarak ŋituŋa ŋulu alalak, ekeŋarak tari ayoŋ. 3Kimalakinae Prisika ka Akwila, ŋulu ikitiyae ka ayoŋ etic ŋolo a Yesu Kristo; 4ajalito ikes akiyar kec aŋuna kaŋ. Alakara ayoŋ nooi neni kec--meere nai ayoŋ bon, elakara tari Ŋikristo daadaŋ ŋulu nyerae Ŋiyudayan. 5Kimalata tari Ŋikristo ŋulu iryamiryameneneete kai kec. Kimalakinae Epaeneto lokone kaŋ ŋolo erae iŋes ageuni akinup ŋakiro a Kristo anakwap a Asia. 6Kimalakinae Maria ŋina itiyae etic aŋuna kus. 7Kimalakinae tari Andoroniko ka Yunia, ŋulu erae Ŋiyudayan ikwa ayoŋ, ŋulu aponi toenae kaapei ka ayoŋ. Erwoko ikes nooi alokiyakia ka apotu toruworos Ŋikristo eriŋa ayoŋ. 8Kimalakinae Ampliato lokone kaŋ ŋolo minat anaraakau ŋipei aneni ke Ekapolon. 9Kimalakinae tari Urubano ŋolo ikitiyae ka ayoŋ etic a Kristo; kimalata tari lokone kaŋ ŋolo minat Sitaku. 10Kimalakinae Apele ŋolo adaun aripun atemar emina kire Kristo. Kimalakinae ŋituŋa ŋulu ke ere ka Arisitobulo. 11Kimalakinae Erodio ŋolo erae Eyudayat ikwa ayoŋ ka ŋituŋa daadaŋ ŋulu ke ekal a Narikiso, ŋulu emorikin ke Ekapolon. 12Kimalakinae Turupena ka Turuposa, ŋuna itiyaete etic ke Ekapolon ka nakone kaŋ Peresi, ŋina itiyae etic ŋolo alalan ŋolo ke Ekapolon. 13Kimalakinae Rupus, Ekristoit ŋolo eyenen alotic ke Ekapolon ka toto keŋ ŋina ekeuryarit ayoŋ ikwa lokoku keŋ. 14Kimalakinae Asunikirito, Pelego, Erime, Patiroba ka Erima ta ŋikaitotoi ŋulu Kristayon daadaŋ ŋulu erukito ka ikes. 15Kimalakinae Pilologo ka Yulia, Nereo ka nakaato keŋ Olumpa, ta ŋituŋa ŋulu ka Akuj daadaŋ ŋulu erukito ka ikes. 16Kimalas itunasi make itoodiunito atemar iminin. Ikimalaete iyes Ŋikristo daadaŋ.

Ŋakiro ŋuna esidyok

17Ŋikaitotoi kaŋ, ekemaimai ayoŋ iyes atemar tocoikis ŋulu etyakatyakaete ŋituŋa, ido kitooliyosi ananupit kec; ŋulu eŋerito ŋakiro ŋuna aponi ikitatami iyes. Tocoito irukete ka ikes! 18Anerae nyerae Kristo itiyanakinete ŋituŋa ŋulu ikote ŋul, nai itiyanakinete etic ŋolo ka akiwarit akimuj. Irworosi ikes ŋakiro ŋuna abobok, kirapirapete ŋituŋa alorwor kec ecamito amodikin ŋituŋa ŋulu epalag! 19Eirasi ŋituŋa daadaŋ epite ŋolo iwuapitotor iyes ŋakiro ŋuna ka Akuj ka alakara ayoŋ nooi ikotere iyes. Acamit ayoŋ iyes toosok, toyenete ibore ŋini ejok ka tomam ŋuna ikikamunito anakiro a ŋuna aronok. 20Ido eapi Akuj ŋina erae alope ekisil, ainakin iyes apedor akipicar Satan a ŋakejen kus.

Toyai neni kus ajokis ŋina ke Ekapolon yok Yesu Kristo.

21Ikimalae iyes Timoteo ŋolo ikitiyae ka ayoŋ, ikimalae tari Lukio, Yason tari Sosipatiro, ŋulu erae Ŋiyudayan ikwa ayoŋ.

22Ayoŋ Teretio ŋolo ekesigiritae abaruwa na, ekemalae iyes alokiro ke Ekapolon.

23Ikimalae Gaio ŋolo eketepeyonit ayoŋ, ŋolo erae kai keŋ iryamiryameneneete Ŋikristo. Ikimalat iyes Erasto ŋolo erae ekeŋadan ŋisiliŋa ŋulu ke etaun alo ka lokaatokosi Kwarito.[ 24Toyai neni kus a daadaŋ ajokis ŋina ke Ekapolon yok Yesu Kristo. Amen.]

Akilip ŋina esidyon ŋina ipuritere Akuj

25Oinakisi akipuro neni ka Akuj! Epedori iŋes akiturubakin iyes inupito alopite a ŋolo a Ŋakiro a ŋuna Ajokak a ŋuna a Yesu Kristo, ŋuna etatami ayoŋ ka alopite a ŋolo ka akitoodikinet a ŋakiro a ŋuna koloŋ emunonitae. 26Nai tokona esileereun ŋakiro ŋun a Nakigireta a ŋikadwarak ka eteyenikin lotuŋa a ŋibukui a daadaŋ lopite ŋolo icikakinitor Akuj ŋina nyesaluni; ikotere tonupa ka kiwuapa daadaŋ ŋakiro ŋuna ka Akuj.

27Toyai apolou ŋina nyedaun alotooma Yesu Kristo neni ka Akuj, a ŋina erae iŋes bon eos nooi! Amen.

Currently Selected:

Ŋirom. 16: NIB2008

Highlight

Copy