Ŋirom. 1

Emalas

1Ayoŋ Paulo, eketiyan a Yesu Kristo, egirit abaruwa na. Akanyarau Akuj ayoŋ aruwor ekiyakia ka akaseu aruwor ekalimonokinan Ŋakiro keŋ ŋuna Ajokak.

2Kebu koloŋ sek Akuj kiik Ŋakiro keŋ ŋuna Ajokak neni a ŋituŋa ikwapei egiritotor ŋikadwarak Nakigireta. 3Erae ŋakiro ŋun ŋuna a Lokoku ka Akuj a ŋolo erae Yesu Kristo Ekapolon yok. Alokuwane, erae iŋes eletonit ŋolo a Daudi. 4Alopite a ŋolo ka akujuwuanut keŋ, erae iŋes ŋolo aseu Akuj aruwor Lokoku keŋ, aŋuna eteyarunere iŋes alokatwak anapedor a ŋina ka Akuj. 5Akainaki Akuj ayoŋ arereŋu aneni a Yesu Kristo; arereŋu ŋina ruworet ekiyakia, ikotere etunupya ka esiwuapya ŋituŋa a ŋakwapin a daadaŋ ŋakiro keŋ, ido kitopolooroe ekiro a Kristo. 6Iyes daŋ ŋulu iyakasi Roma, iraakasi ŋipei ka ŋulu anyara Akuj aruwor ŋulu a Yesu Kristo.

7Aŋun, ekegirakinit ayoŋ iyes daadaŋ alo Roma, iyes ŋulu ikimina ka ikinyar Akuj aruwor ŋulu keŋ.

Toyai neni kus ajokis ka ekisil aneni ka Akuj Papa yok ka aneni ke Ekapolon Yesu Kristo.

Kiitan Paulo alosit Roma

8Ŋuna iŋarenete, alakara ayoŋ neni ka Akuj kaŋ alotooma Yesu Kristo, aŋuna kus a daadaŋ, anerae irworosi ŋituŋa a ŋakwapin a daadaŋ ŋuna ka anupit kus. 9Eyeni Akuj atemar ŋuna erworo ayoŋ erae ŋuna a kire--Akuj ŋina etiyanakini ayoŋ a ekaatau a daadaŋ analimonokin Ŋakiro ŋuna Ajokak ŋuna a Lokoku keŋ. Eyeni Akuj atemar akatamunit ayoŋ iyes, 10apaki daadaŋ ŋina elipya ayoŋ. Elipit ayoŋ Akuj, erae kerae acamit keŋ, okoinak ayoŋ tokona apaki ŋina ajokan ŋina bunet neni kus. 11Anerae ekeburit ayoŋ aanyun iyes, ikotere omora ŋainakineta ŋuna ke Etau a ŋolo Asegan, ŋuna akainaki Akuj ayoŋ, ikitogogoŋ iyes. 12Iŋes atemar esimukekinos iwon kaapei ananupit yok; ekesimukek ayoŋ iyes ananupit kus ka ikisimukekis iyes ayoŋ ananupit kaŋ. 13Acamit ayoŋ iyes ŋikaitotoi toyenut atemar eitanit ayoŋ ŋapakio ŋuna alalak abunore aanyun iyes, (nai akitodol tokona ekeretakinitae). Acamit kaŋ iŋes akitunup ŋituŋa alokidiŋ kus daŋ Ŋakiro a Yesu Kristo, ikwaŋina etunupya ŋuluce ŋulu nyerae Ŋiyudayan. 14Anerae ayakar ayoŋ etic ŋolo kitiyakina neni a ŋituŋa a daadaŋ a ŋulu eyakatar ayenut ka neni a ŋulu nyeyakatar ayenut, neni a ŋulu esyomito ka neni a ŋulu nyesyomito. 15Aŋun, ekeburit ayoŋ alimonokin Ŋakiro ŋuna Ajokak neni kus daŋ, a ŋulu iyakasi Roma.

Eyakatar Ŋakiro Ŋuna Ajokak apedor

16Anerae nyekerumito ayoŋ ŋileec aŋuna a Ŋakiro a ŋuna Ajokak: erae ikes apedor ŋina ka Akuj ŋina eiunia ituŋanan daadaŋ, ŋini eyakar anupit, Ŋiyudayan mono, ido nai ŋulu nyerae Ŋiyudayan. 17Anerae isileereunito Ŋakiro ŋuna Ajokak epite ŋolo ituruworya Akuj ŋituŋa ŋulu iyookino alokiŋaren keŋ: erae alotooma anupit, ameun anakisyakinet tari nasalunet, ikwapei igiritere atemar, “Iŋes ŋini iyookino a ŋuna enupitor neni ka Akuj, eyari.”

Ŋikasecak ŋituŋa daadaŋ

18Itoodiunitae anyunyura ŋina ka Akuj anakuj nasecit ka naronis daadaŋ ŋina a ŋituŋa. Iretakinito ŋipitesyo kec ŋulu aronok ikes ayenun ŋuna a kire; 19ikwapei ileereoto aneni kec ŋuna itemokino eyenere Akuj, anerae Akuj alope abu kisileerek ikes ŋakiro ŋun. 20Emam ituŋanan epedori akiŋolikin Akuj. Nai ŋinapei koloŋ asubunia Akuj akwap, epedorete ŋituŋa ayenun apedor keŋ ŋina nyedaun ka akujuwuanut keŋ aloboro a ŋulu esubunit iŋes. Aŋun, emam epite ŋolo erimakinere ikes. 21Eyenete ikes Akuj, nai nyitopoloorito ikes iŋes ikwa Akuj, kori nyitalakarito. Nai aruworosi ŋatameta kec ŋakoŋinae ka elelebikin akiryonut nakyes kec ŋuna ebaŋaaka. 22Ebasi ikes ikiosok, nai erae ŋibaŋaanotin. 23Akilo ikes akilip neni ka Akuj a ŋina eyari jik anapolou keŋ, ilipete ikes neni a ŋitorubei a ŋulu itiyaunitae ikwaan ka ŋituŋa ŋulu etwakete, kori ŋikyeny kori ŋityaŋ kori ŋiboorei ŋulu alyatok.

24Aŋun, emyek Akuj ikes itiyaete ŋuna aronok ŋuna iitanito ŋitai kec ka itiyaete ŋuna a ŋileec neni kec make. 25Anerae ilokonyete ikes Ŋakiro ka Akuj ŋuna a kire ka alyokonu; ilipete ka itiyanakinete ŋisubuna ŋulu ka Akuj akilo akitiyanakin Akasuban alope, ŋina itemokino kipuroe ŋikaru ka ŋikaru! Amen.

26Aŋakiro a ŋun, emyek Akuj ikes itiyaete ŋuna ke ekibure kec a ŋolo a ŋileec, anerae ajoŋoto ŋaberu arukit ka ŋikilyok, alomakis arukit make ikwa ekile ka aberu. 27Ŋikilyok daŋ, aesikis ŋaberu, ido iburakinit arukit make ikwa aberu ka ekile. Itiyaete ŋikilyok ŋuna a ŋileec ka ŋikilyok pei; aŋun, isicani Akuj ŋawat kec ka akisicanet a ŋina itemokino naronis ŋina etiyata ikes.

28Aŋuna aŋeryoto ŋituŋa anatameta kec ayenun Akuj, emyek Akuj ikes iwuapito ŋatameta ŋuna ecamito akitiya ŋuna aronok, ikotere itiyaete ŋuna sek pa etemokino ikes kitiyata. 29Ileleba neni kec ŋakiro ŋuna nyiyookino--aronis, akiŋobel ka ediŋet; ileleba arakao, akiar, ebura, amodiyo, ŋinyas ka asyoma. 30Itoroniarito ŋuluce alorworisya kec make, eŋerito Akuj, itoŋoyeneneete ŋuluce, isupaka, ituroko, etamete ŋarwa ŋuna alalak akitiya aronis, nyekerito ikes ŋikecekauruunak. 31Emam ŋakiro emisito ŋitai kec, nyiricito ŋakiro ŋuna iiyanakinete, emam ikes aminanar, emam akitim. 32Eyenete ikes atemar ebala ekisil ŋolo ka Akuj ebe, ŋulu itiyaeneneete ŋakiro ŋun, itemokino totwaka. Tari kikote nen, nyerubakinito ikes itiyaete ŋun bon, nai itojokito daŋ ŋulu itiyaete ŋuna itiyaete ikes.

Currently Selected:

Ŋirom. 1: NIB2008

Highlight

Copy