Ŋakit. 2
2
Ajokis ŋina ka aosou
1Ikaakoku, ani kicamu iyoŋ ŋakiro kaŋ,
ido kikinyom alotau kon ŋakiciketa kaŋ,
2ikiburite akiirar ŋakiro ŋuna ka aosou
ka kimukekinite alotau kon ayenun ŋakiro ŋuna ka aosou,
3ani kire kigwor iyoŋ aŋuna ka aryamun aosou,
ido kirwor ikeunit ŋakiro kon ŋuna icamitor aryamun ayenut ŋakiro
4ka ani kiwar iyoŋ ŋakiro ŋun ikwa iwaritere esilipa,
kiwar ŋakiro ŋun ikwapei ebari ŋolo iwuaitae,
5nen nai iyenunia iyoŋ akitopoloorit Ekapolon
ka nen iryamunia iyoŋ aosou ŋina ka Akuj.
6Ekapolon iŋes ikiinanakini aosou;
Ekapolon elimununui ŋakiro ŋuna ka aosou ka ŋuna ka ayenun.
7Eyakar Ekapolon aosou ŋina iloit daadaŋ aŋuna a ŋulu iyookino.
Erae Ekapolon aupal a ŋulu iboiyete emam ŋuna itoroniyaritere.
8Iyokit Ekapolon alorotin kec ŋulu iyookino,
elemarit ibore ŋini aronon alorotin a ŋikanupak keŋ.
9Ani kiirasi iyes ŋakiro kaŋ, iyenunete ŋuna iyookino ka ŋuna ajokak,
ido itiyaete ŋuna daadaŋ itiyaete ŋituŋa ŋulu ajokak.
10Iruwor iyoŋ ŋini ios,
ikiinakini aosou iyoŋ alakara.
11Ikiuni iyoŋ ayenut ŋuna ajokak ŋuna emaikina kitiya
ikiyokiuni iyoŋ ayenut ŋuna ajokak ŋuna emaikina kitiya.
12Ikiuni iyoŋ ayenut, ikotere nyiwuap ŋuna itiyaete ŋulu aronok
ikiuni iyoŋ ayenut, ikotere nyirwor ŋuna irworosi ŋulu a ŋileec,
13ŋulu eŋerito akiwuap ŋuna itiyaete ŋulu iyookino,
ŋulu ebobokinit akitiya ŋuna nyiyookino.
14Elelyanete ŋituŋa ŋul apaki ŋina itiyaata aronis,
elakara ikes nooi apaki ŋina itiyaata aleeco kec ŋina aronon,
15erae ikes ŋulu nyiyookino ŋuna itiyaete
ka erae ikes ŋulu nyiwuapito ŋuna ejokak.
16Ikiuni iyoŋ aosou tari anaberu a ŋina italit amalao,
a ŋina itobobot ŋakiro keŋ aŋuna ka alomya,
17a ŋina aesiki ekile keŋ ŋolo abu iŋes toryamu eriŋa esorokana,
a ŋina emuryakis ŋakiro ŋuna abunio iŋes tocamunotor ka ekile ŋol.
18Ŋuna itiyae aberu ŋin, erae ŋuna ikiyayete natwanare;
erae ŋuna iwuapit iŋes ŋuna ikirikorete nakibois ŋina a ŋikatwak.
19Ŋituŋa daadaŋ ŋulu eloseneneete naberu ŋin, nyeboŋuneneete a nen
nyiloconokinete daŋ nabo ŋipitesyo ŋulu ka akiyar kec.
20Aŋun, kiwuap ŋuna itiyaete ŋituŋa ŋulu ajokak,
torubak iwuapit ŋuna iwuapito ŋituŋa ŋulu iyookino,
21anerae iboiyete ŋituŋa ŋulu iyookino anakwap ekaoyan,
idoŋete nakwap ekaoyan ŋituŋa ŋulu emam ŋuna itoronitere.
22Nai elemaryo anakwap ŋulu aronok,
itoŋopiyaryo anakwap ŋulu nyeyakatar anupit neni ka Akuj.
Ngakarimojong Interconfessional Bible © Bible Society of Uganda, 2008.