Ŋilep. 15

Ŋiboorei ŋulu eleleunete anakuwan a ituŋanan ŋulu ikitoroniyarere

1Tema Ekapolon neni a Moses ka Aron, 2“Tolimokisi Ŋisirael ebe, ‘Ani keleleu ibore ido anakuwan ke ekile, erae ibore ŋin ŋini itoroniyaritere ekile ŋol. 3Kerubakinit ibore ŋin elele anakuwan kori kejoŋot alele, erae ibore ŋin ŋini itoroniyaritere iŋes. Epite lo iŋes ituruworya ibore ŋin ekile ŋolo itoroniyaritae: 4Ibore daadaŋ ŋini eperyo ekile ŋol, eruwor ŋini itoroniyaritae ka ibore daadaŋ ŋini iboikin iŋes, eruwor ŋini itoroniyaritae. 5Ituŋanan daadaŋ ŋini etapi ibore ŋini eperyo ekile ŋol, emaikina kilota ŋilowi keŋ, kiloŋar, ido erubakini ituŋanan ŋin, erae ŋini itoroniyaritae akitodol eboŋ. 6Ituŋanan daadaŋ ŋini iboikin neni sek eboikino ekile ŋol, emaikina kilota ŋilowi keŋ, kiloŋar, ido erubakini ituŋanan ŋin, erae ŋini itoroniyaritae akitodol eboŋ. 7Ituŋanan daadaŋ ŋini etapi ekile ŋol, ŋolo elele ibore anakuwan, emaikina kilota ŋilowi keŋ, kiloŋar, ido erubakini ituŋanan ŋin, erae ŋini itoroniyaritae akitodol eboŋ. 8Ani kimwaak ekile ŋolo elele ibore anakuwan ituŋanan ŋini nyitoroniyaritae, emaikina ŋini nyitoroniyaritae ŋin kilota ŋilowi keŋ, kiloŋar, ido erubakini erae ŋini itoroniyaritae akitodol eboŋ. 9Ibore daadaŋ ŋini iboikin emyat esigirya, kori aŋole ekile ŋolo elele ibore anakuwan, eruwor ŋini itoroniyaritae. 10Ituŋanan daadaŋ ŋini etapi ŋiboro ŋulu sek eboiyo ekile ŋol, eruwor ŋini itoroniyaritae akitodol eboŋ; ido daadaŋ ŋulu iwokete ŋiboro ŋul, emaikina kilotasi ŋilowi kec, kiloŋaros, ido erubakinete erae ŋulu itoroniyaritae akitodol eboŋ. 11Ituŋanan daadaŋ ŋini kebu ekile ŋolo elele ibore anakuwan totap eriŋa nyilotara ŋakan keŋ, emaikina kilotasi ŋilowi kec, kiloŋaros, ido erubakinete erae ŋulu itoroniyaritae akitodol eboŋ. 12Ani ketap ekile ŋolo elele ibore anakuwan eborosit ŋolo eyeunitae a ecoto, emaikina tobwaŋae eborosit ŋol, ido ani kerae ibore ŋini iceunitae anakitoe etapit iŋes, emaikina kilotarae.

13“‘Ani italeunio ekile ŋolo elele ibore anakuwan ŋol emaikina iŋes kiriya ŋirwa ŋikanikaarei eyai lotal ŋolo ka akitaleuno; emaikina iŋes kilota ŋilowi keŋ, kiloŋar anakipi a ŋuna keriŋa eokunio, toruwor nai ŋolo nyitoroniyaritae. 14Ani epete ŋirwa ŋikanikauni, emaikina iŋes ya ŋakuryo ŋaarei, kori ŋatemeleudi ŋaarei, bu kiŋaren Ekapolon lopuke ke eema a ŋolo ilipere, inak ŋikyeny ŋul neni ke esacaradoti. 15Emaikina nai esacaradoti ya ŋainakineta ŋun, apei erae ainakinet aŋuna ka asecit ka ŋinace erae ŋina epeyo, ido emookuni esacaradoti ekile ŋol alokiŋaren Ekapolon aŋuna a ibore a ŋini alele anakuwan keŋ. 16Ani kepotu ekile ŋaokot ŋuna ka aur, emaikina iŋes kiloŋa akuwan keŋ daadaŋ, ido erubakini iŋes erae ŋolo itoroniyaritae akitodol eboŋ. 17Ibore daadaŋ ŋini kepotu ŋaokot ŋun pena kerae elou, kori ejamu emaikina kilotarae, ido erubakini erae ŋini itoroniyaritae akitodol eboŋ. 18Ani kiryamakin ekile ka aberu, emaikina ikes ŋuluarei ŋul kiloŋaros, ido erubakinete erae ŋulu itoroniyaritae akitodol eboŋ.

19“‘Ani kemin aberu lolap, lopite ŋolo emaikina emineneo, eruwor iŋes ŋina nyeseg akitodol ŋirwa ŋikanikaarei, ido ituŋanan ŋini etapi aberu ŋin, eruwor ŋini itoroniyaritae akitodol eboŋ. 20Ibore daadaŋ ŋini eperyo iŋes apaki ŋina eyakar lolap, eruwor ŋini itoroniyaritae ka ibore daadaŋ ŋini iboikin iŋes apaki ŋina eyakar lolap, eruwor ŋini itoroniyaritae. 21Ituŋanan daadaŋ ŋini etapi ibore ŋini eperyo aberu ŋin, emaikina kilota ŋilowi keŋ, kiloŋar, ido erubakini erae ŋini itoroniyaritae akitodol eboŋ. 22Ituŋanan daadaŋ ŋini etapi ibore ŋini sek eboikino aberu ŋin, emaikina kilota ŋilowi keŋ, kiloŋar, ido erubakini erae ŋini itoroniyaritae akitodol eboŋ. 23Ketapit ituŋanan ibore ŋini aperyo, kori eboikino aberu ŋin, eruwor ituŋanan ŋin ŋini itoroniyaritae akitodol eboŋ. 24Ani kiryamakin ekile ka aberu ŋin, totapakin ŋaokot lokile ŋol, eruwor iŋes ŋolo itoroniyaritae akitodol ŋirwa ŋikanikaarei, ido itoroniyaryo neni daadaŋ eperyo ekile ŋol.

25“‘Ani keleleata ŋaokot anaberu ŋirwa ŋulu alalak, ŋulu nyeyakar iŋes lolap, kori kerubakis eleleete tari kedaun ŋirwa ŋulu eyakar iŋes lolap, erubakini iŋes erae ŋina itoroniyaritae ŋirwa daadaŋ ŋulu eleleata ŋaokot, lopite ŋolo itoroniyaritere iŋes ŋirwa ŋulu eyakar iŋes lolap. 26Neni daadaŋ eperyo aberu ŋin ŋirwa ŋulu eleleata ŋaokot ka ibore daadaŋ ŋini iboikin iŋes, eruwor ŋini itoroniyaritae lopite ŋolopei sek itoroniyaritere iŋes eyai lolap. 27Ituŋanan daadaŋ ŋini etapi ŋiboro ŋul, eruwor ŋini itoroniyaritae; emaikina kilota ŋilowi keŋ, ido erubakini erae ŋini itoroniyaritae akitodol eboŋ. 28Ani italeunio aberu ŋina aleleete ŋaokot ŋin, emaikina iŋes kiriya ŋirwa ŋikanikaarei eyai lotal ŋolo ka akitaleuno, toruwor nai ŋina adaun akitaleun, ŋina nyitoroniyaritae. 29Ani epete ŋirwa ŋikanikauni, emaikina iŋes ya ŋakuryo ŋaarei, kori ŋatemeleudi ŋaarei, ya neni ke esacaradoti lopuke ŋolo ke eema a ŋolo ilipere. 30Emaikina nai esacaradoti ya ŋainakineta ŋun, apei erae ainakinet aŋuna ka asecit ka ŋinace erae ainakinet ŋina epeyo, ido emookuni esacaradoti aberu ŋin alokiŋaren Ekapolon aŋuna a ŋaokot a ŋuna aleleete anakuwan keŋ.

31“‘Alopite a ŋol, iyokiuni iyoŋ Ŋisirael erae ŋulu nyitoroniyaritae ikotere nyetwaka erae ŋulu itoroniyaritae aŋuna ka amunaar eema kaŋ ŋolo eyai kidiŋ kec.’ ”

32Erae ŋul ŋikisila ŋulu a ŋolokile daadaŋ elele ibore anakuwan ka ŋulu daadaŋ eleleete ŋaokot ŋuna ka aur ŋulu itoroniyaritae a ŋakiro a ŋun, 33ŋikisila ŋulu a ŋinaberu daadaŋ a ŋina eyai lolap, ŋikisila ŋulu ke ekile, kori ka aberu a ŋina elele ibore anakuwan ka ŋulu ke ekile a ŋolo iryamakin ka aberu ŋina eriŋa eyai lolap.

Currently Selected:

Ŋilep. 15: NIB2008

Highlight

Copy