Awos. 24
24
Kitogogoŋoi Acamunet
1Tema nai Akuj neni a Moses, “Kitipeutu lomoru neni ke Ekapolon iyoŋ ka Aron, Nadab ka Abiu ta ŋikasikou a Ŋisirael ŋatomonikanikaarei. Emaikina iyes kilipa neni kaŋ ilwaka; 2nai Moses bon emaikina toapu neni ke Ekapolon; nyemaikina ŋuluce toapuut nen. Nyemaikina ŋituŋa kitipeut ka Moses ne.”
3Totiyaun nai Moses alomoru, tolot tolimok ŋituŋa ŋakiro ke Ekapolon daadaŋ ka ŋikisila ke Ekapolon daadaŋ; toboŋokis ŋituŋa daadaŋ kaapei temasi, “Ikitiyae isua ŋakiro daadaŋ ŋuna adau Ekapolon alimun.” 4Kigir nai Moses ŋakiro ke Ekapolon daadaŋ. Tonyou Moses ataparacu ŋinace, todukok Namuroet nakeju ke emoru, tosipok nen ŋamoru ŋatomon ka ŋaarei, ekimar ŋolo a ŋikabilae a Ŋisirael a ŋulutomon ka ŋiarei. 5Ani kedau ŋun, abu kiyakiya ŋisorok a Ŋisirael, toloto ŋul inakis Ekapolon ŋainakineta ŋuna epeyo ka ŋamuronisya ŋuna a ŋimoŋin a ŋulu apolounok ikwapei ŋainakineta ŋuna ka akimorikina ke Ekapolon. 6Tolemu Moses ŋaokot a ŋibaren a ŋul, totyak eriyan, kiwuak atutubet apei nabakulei, tosodi atutubet ŋinace towuasya Namuroet. 7Tolemu nai Ekitaabo ŋolo ka Acamunet tosyomak ŋituŋa. Toboŋokis ŋituŋa temasi, “Ikitiyae isua ŋakiro daadaŋ ŋuna adau Ekapolon alimun; ikiwuapi isua ŋakiro ŋuna ke Ekapolon.” 8Tolemu nai Moses ŋaokot ŋuna aya nabakulei towuasya ŋituŋa tema, “Erae ŋaokot nu ŋuna ka Acamunet a ŋina abunio Ekapolon tocamunotor ka iyes anakiro a nu a daadaŋ.”
Moses ka Akuj alomoru
9Toloto nai Moses ka Aron, Nadab ka Abiu ta ŋikasikou a Ŋisirael ŋatomonikanikaarei kidiama emoru. 10Kiŋolikis a nen Akuj a Ŋisirael. Kwap ŋakejen keŋ, ayai ibore ŋini enaminamakina neni pus ŋini ekwaan ka amoru ŋina enyaritae Sapire. Eleere nen epusiyana ikoni kidiama eliilii. 11Nai abu Akuj nyisican ŋikarikok a Ŋisirael ŋul; apotu ikes kiŋolikis Akuj, apotu daŋ kimuja ka tomata.
12Tema Ekapolon neni a Moses, “Bua neni kaŋ ne kidiama emoru, kidareu a ne; okoinak iyoŋ ŋamoru ŋuna edapal ŋuna eyakasi ŋikisila ka Ŋakiciketa. Egirit ayoŋ ŋikisila ka Ŋakiciketa nen aŋuna ka akitatamya ŋituŋa.” 13Aŋun, apotu Moses ka Yosua ŋolo atupit iŋes anapolou todokasi lomoru ŋolo ka Akuj. 14Tema Moses neni a ŋikasikou, “Kidareunoe isua a ne akitodol ŋina eboŋunere neni kus. Ikidarete iyes Aron ka Ur, ituŋanan daadaŋ ŋini eŋoikin ka ŋinice, emaikina tolot neni kec.”
15Torotok nai Moses a nen todoka lomoru, toburusiya edou emoru. 16Min apolou ŋina ka Akuj toburusiya emoru Sinai. Toburusiya edou emoru ŋirwa ŋikanikapei, ani epete ŋirwa ŋikanikaarei, tonyara alotooma edou Ekapolon Moses. 17Totakanu apolou ka Akuj neni a Ŋisirael ikoni akim ŋina erirae enomi kidiama emoru. 18Toloma nai Moses tooma lodou apaki ŋina adokarya kidiama emoru. Kiboi Moses alomoru ŋapaarasya ŋatomoniomwon ka ŋakuwarisya ŋatomoniomwon.
Currently Selected:
Awos. 24: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
