Awos. 18

Kilaar Yesiro neni a Moses

(Ŋikis. 1:9-18)

1Kebu Yesiro esacaradoti a Midian ŋolo arae lokamuran a Moses, kiira ŋakiro daadaŋ ŋuna kebu Akuj kitiya aŋuna a ŋituŋa keŋ a Ŋisirael ka aŋuna a Moses ka epite ŋolo keyaunia Ekapolon Ŋisirael alo Ijipit. 2Aŋun, abu Yesiro lokamuran a Moses kilaar neni a Moses erukito ka nakoku keŋ Sipora aberu a Moses ŋina sek kebu Moses kirita. 3Yau iŋes Sipora ka ŋidwe keŋ ŋulusapa ŋiarei. Arae ekiro ke epei Gerisom (alimokini Moses iŋes ekiro ŋol, anerae abu tema, “Abu ayoŋ oruwor egelaanot anakwap a ŋinagela”), 4ido arae ekiro a ŋoloce Elieser (alimokini Moses iŋes ekiro ŋol, anerae abu tema, “Akuj a papa kaŋ iŋes abu ekeŋarak ka okoiu ayoŋ nyakaar Parao a ekileŋ”). 5Bu Yesiro lokamuran a Moses naloŋisat erukito ka ŋidwe a Moses ŋulusapa ŋul ka aberu a Moses. Potu ikes neni alomit Moses diyete emukura ŋolo ka Akuj. 6Kiyakiya Yesiro ituŋanan neni a Moses alimokin iŋes ebe, “Abu ayoŋ Yesiro lokamuran kon neni kon, ikirukunit ka aberu kon ta ŋidwe keŋ ŋulusapa ŋuluarei.” 7Toloma Moses kiŋa tolot akisiryam lokamuran keŋ; toryedik iŋes tonu lokamuran keŋ; kiŋitiŋitas ikes make ebe, “Anu ŋace?” Ani ekaku, toloto tooma Eema. 8Kitatamik nai Moses lokamuran keŋ ŋakiro daadaŋ ŋuna etiya Ekapolon neni a Parao ka neni a Ŋijipitian aŋuna a Ŋisirael. Kitatamik tari ŋatyokisyo ŋuna kepotu Ŋisirael toryamut alorot ka epite ŋolo abunio Ekapolon toiunia ikes anatyokisyo a ŋun. 9Tolelyan Yesiro a ŋakiro a ŋun a daadaŋ a ŋuna kebu Ekapolon kitiya neni a Ŋisirael, aŋuna aiunia Ŋisirael aneni a Ŋijipitian.

10Tema Yesiro, “Kipuroe Ekapolon ŋolo abu itoiu iyes aneni a Ŋijipitian ka aneni a Parao. 11Ayenu tokona ayoŋ atemar epol Ekapolon nooi akilo ŋakujo ŋunace, anerae abu toiu Ŋisirael aneni a Ŋijipitian apaki ŋina atiŋitere Ŋisirael erono nooi.” 12Tolemik nai Yesiro Akuj ainakinet ŋina apeyo ka ŋamuronisya ŋace. Potu nai Aron ka ŋikasikou a Ŋisirael daadaŋ akimuj ka Yesiro ŋamugati, ayai Akuj kaapei ka ikes a nen

Toseu Moses ŋikatubok ŋakiro

(Ŋikis. 1:9-18)

13Akoloŋit ŋina atupakini ŋin, abu Moses kiboikin lokicoloŋ akitub ŋakiro a Ŋisirael; towua Ŋisirael alodiyete keŋ kirimokis iŋes kidiŋ ŋinapei taparacu tari eboŋ. 14Ani iŋolikini lokamuran a Moses etic daadaŋ ŋolo etiyae Moses aŋuna a Ŋisirael, tema, “Anukiro nu ŋuna itiyae iyoŋ aŋuna Ŋisirael nu? Kaanukiro eraakar iyoŋ bon iboi towuas ŋituŋa ŋuluce ikirimokinito iyoŋ kidiŋ ŋinapei taparacu tari eboŋ?” 15Toboŋok Moses lokamuran keŋ tema, “Etiyae ayoŋ nu, anerae eponito jik ŋituŋa neni kaŋ akiŋita ŋuna ecamit Akuj. 16Apaki daadaŋ ŋina eyakatar ikes ebura, eponeneete ikes neni kaŋ otub ayoŋ ŋakiro a ŋulu iburaete, ido olimok ikes ŋikisila ka ŋakiciketa ŋuna ka Akuj.” 17Tema lokamuran a Moses neni a Moses, “Nyejokak ŋakiro ŋuna itiyae iyoŋ. 18Kire jik, ipedori iyoŋ akiteŋedar etic, iyoŋ kaapei ka ŋituŋa lu ŋulu irukitotor iyoŋ, anerae elal etic lo nooi; nyipedori iyoŋ bon akitiya. 19Kiira ŋakiro nu ŋuna tokona akalimokini ayoŋ iyoŋ, ido elipi ayoŋ Akuj torukito ka iyoŋ. Emaikina iyoŋ towoik ŋituŋa iya ŋiburasyo kec neni ka Akuj. 20Kitatam ikes ŋikisila ka ŋakiciketa ŋuna ka Akuj, kimyek ikes toyenut epite ŋolo emaikina ikes kiboiyoto ka ŋuna emaikina ikes kitiyata. 21Nai toseu alokidiŋ kec ŋikilyok ŋulu epedorete akitiya, ŋulu itopoloorito Akuj, ŋikilyok ŋulu ikinyoma ŋulu nyecamito akitiya ŋuna aronok. Toseu ikes toruwor ŋikapolok a ŋituŋa a ŋulu erae ŋalipulipui, ŋamiamiae, ŋatomonikanikani ka ŋitomotomoe. 22Kimyek ŋikapolok ŋul totubo ŋakiro a ŋituŋa ŋapakio daadaŋ, nai emaikina ikes yaut neni kon ŋiburasinei daadaŋ ŋulu atyonikis ikes; emaikina ikes totubo ŋiburasinei ŋulu epataka daadaŋ. Ikiinakini iyoŋ nen akitiya etic ŋolo edit, anerae iŋarakinosi iyoŋ ka ikes etic. 23Ani kitiya iyoŋ ŋakiro ŋun, lopite ŋolo ikicikitor Akuj, ipedori nai akidaŋidaŋ ŋakiro kec, ido elosete ŋituŋa lu daadaŋ lorerya kec isilito.”

24Abu Moses kiira ŋakiro alokamuran keŋ, ido abu kitiya daadaŋ ŋuna alimokini Yesiro iŋes. 25Toseu iŋes ŋikilyok ŋulu epedorete akitiya alo Isirael a daadaŋ, kituruwo ikes ŋikapolokinitok ŋituŋa ŋalipulipui, ŋamiamiae, ŋatomonikanikani ka ŋitomotomoe. 26Apotu ŋikilyok ŋul kitiyata ikwapei ŋikatubok ŋakiro a ŋituŋa ŋapakio daadaŋ. Yaanasi ikes ŋiburasinei ŋulu atyonok neni a Moses, nai ŋulu apatanak daadaŋ apotu ikes totubo. 27Abu nai Moses kimyek lokamuran keŋ torotok aneni keŋ toboŋo Midian nakwap keŋ.

Currently Selected:

Awos. 18: NIB2008

Highlight

Copy