Bar 1
1
Baruk ka Ŋiyudayan alo Babilon
(2 Ŋirw. 24:8-17; Esir 1:7-11; Yer. 36:4)
1Erae nu ŋakiro ŋuna abu Baruk lokoku a Neria ŋolo arae lokoku a Maseia a ŋolo arae lokoku a Sedekia a ŋolo arae lokoku a Asadia a ŋolo arae lokoku a Ilikia kigir alo Babilon. 2Kigiri Baruk ŋakiro nu ŋirwa ke elap ŋikanikaarei ekaru ŋolo a ŋikan apaki ŋina ekamaryata Ŋibabiloniyae Yerusalem kicunyasi.
3Abu Baruk tosyomak ŋakiro ŋuna igiritae lokitaabo lo neni a Yekonia alokoku a Yeoiakim a erwosit a Yudaya ka neni a ŋituŋa a daadaŋ a ŋulu aponito akiirar ŋakiro ŋuna egiritae lokitaabo lo, 4ta neni a ŋikapolokinitok ŋituŋa, neni a ŋirwosi, neni a ŋikasikou ka neni a ŋituŋa a daadaŋ a ŋulucaryo ka a ŋulu itopolooritae, tosyomak Baruk ŋakiro nu neni a ŋituŋa a daadaŋ a ŋulu eboiyete alo Babilon alodiyete aŋolol Sud.
5Apotu nai ŋituŋa kigworo, kiredanakis akiron ka kilipa alokiŋaren Akuj. 6Apotu ŋituŋa kiriraut ŋisiliŋa ŋulu alalak, kiriraut alotyae a ŋolo apedorit ŋinituŋanan ainakin, 7ido apotu kiyakiyasi ŋisiliŋa ŋul Yerusalem neni a Yeoiakim a esacaradoti a ŋolo Apolon nooi alokoku a Ilikia a ŋolo arae lokoku a Salum ka neni a ŋisacaradotin ta neni a ŋituŋa a daadaŋ a ŋulu ayakasi kaapei ka Yeoiakim Yerusalem. 8Apaki ŋinapei ŋin, ŋirwa ke elap ŋitomon, elap ŋolo a Sipan, abu Baruk tolemu ŋiboro ŋulu esitiyao alo Kai ke Ekapolon, ŋiboro ŋulu keponi tolemarae alo Kai ka Akuj, abu iŋes tolemu ŋiboro ŋul aŋuna ka akinyakar nakwap a Yudaya. Erae ŋiboro ŋul ŋiboro ŋulu etiyaunitae a esilipa ŋulu kebu Sedekia lokoku a Yosia a erwosit a Yudaya kitiyau 9ekaku keriko erwosit Nebukadinesar Babilon alo Yerusalem Yekonia, ŋirwosi, ŋimabus, ŋikapolokinitok a ŋituŋa ka ŋituŋa a akwap a Yudaya.
Abaruwa ŋina egiraritae Yerusalem
10Kigira nai ŋituŋa ŋul abaruwa Yerusalem temasi, “Kijaasi ŋisiliŋa lu ŋulu ikiyakikinit isua iyes, togyelutu a ŋisiliŋa a ŋul ŋainakineta ŋuna epeyo, ŋainakineta aŋuna ka asecit ka ekinyate, kitemokisi daŋ ainakinet ŋina a ŋikinyom, ido inakis ŋainakineta ŋun daadaŋ alokidiama namuroet neni ke Ekapolon Akuj yok, 11tosodi kilipa aŋuna ka akiyar a erwosit Nebukadinesar a ŋolo a Babilon ka aŋuna ka akiyar alokoku keŋ Belisasar, ikotere ikwaanikin ŋirwa a akiyar kec anakwap ka ŋirwa ŋulu anakuj. 12Ikiinakini Ekapolon iwon agogoŋu ka akica ŋina kiteet akwap, eryamunio iwon akiuryaro aneni a erwosit Nebukadinesar a ŋolo a Babilon ka aneni alokoku keŋ Belisasar, ido ikipedori iwon akitiyanakin ikes ŋirwa ŋulu alalak ka oryamutu daŋ alakara aneni kec. 13Kilipa daŋ aŋuna kosi neni a Ekapolon a Akuj yok, anerae ikisec isua aneni ke Ekapolon a Akuj yok, ido akitodol nakoloŋit na eriŋa aŋoit ka anyunyura a Ekapolon eyai neni kosi. 14Emaikina iyes tosyoma ŋakiro nu ŋuna ikiyakikinit isua iyes, tosyoma ikeunito nooi aŋuna ka alimorya ŋasecisya kus alo Kai ka Akuj ŋirwa ŋulu itiyaere ŋasuban ka anapakio aŋuna etubunitoe.”
Alimor ŋasecisya
(Ŋikis. 28:15-68; Yer. 11:3-5)
15Tolimokisi daŋ anabaruwa ŋituŋa ŋulu eboiyete alo Yerusalem ebe, “Iyookinit Ekapolon Akuj yok, nai tokona ikirumito iwon ŋileec, irumito ŋileec ŋituŋa a Yudaya ka ŋituŋa ŋulu iboiyete alo Yerusalem,
16“Kaapei ka ŋirwosi yok, ŋikepukak yok, ŋisacaradotin yok, ŋikadwarak yok ka atapapaa yok, 17anerae ikisec iwon alokiŋaren Ekapolon. 18Ikiwou iwon akiwuap ŋakiro keŋ ka ikiŋer akiirar ŋakiro a Ekapolon Akuj yok, ikiwou iwon akiwuap ŋakiro ŋuna etubunit Ekapolon ŋuna abu iŋes ikiinak iwon. 19Ameun anapaki a ŋina ayaunia Ekapolon atapapaa yok anakwap a Ijipit akitodol nakoloŋit na, ikirubak iwon ikiwounit akiwuap ŋakiro a Ekapolon Akuj yok ka nyemitakinitae iwon akiirar ŋakiro keŋ. 20Aŋun, tari nakoloŋit na, arubakis ŋican ikidolokinito iwon ka apotu neni yok ŋican ŋulu abu Ekapolon tolimu aneni a Moses a eketiyan keŋ apaki ŋina ayaunia atapapaa yok anakwap a Ijipit, ikotere ikiinakinia iŋes iwon akwap ŋina eleleata ŋakile ka ao. 21Aponi iwon nyiirar ŋakiro a Ekapolon a Akuj yok anakiro a daadaŋ a ŋuna ikilimonokinete iwon ŋikadwarak ŋulu eyakuunitae neni yok, 22nai aponi iwon daadaŋ kiwuapae ŋakiro ŋuna ecamito ŋitai yok ŋulu aronok aŋuna itiyanakinere ŋakujo ŋace ka anakitiya ŋuna aronok alokiŋaren Ekapolon Akuj yok.”
Currently Selected:
Bar 1: NIB2008
Highlight
Copy
Compare
Share
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.