2 Ŋikor. 7

1Ŋikaakonei ŋuluminan, ikiinakinitae iwon ŋakiikineta nu daadaŋ. Aŋun, etesegutu ŋawat yok aloboro a daadaŋ a ŋulu nyitesegete akuwan ka etau, ido oruworos jik ŋulu ikisegak nooi alotooma akerit Akuj.

Alelyan ŋina a Paulo

2Toŋakinae isua ŋitai kus. Emam ŋuna aronok ŋuna etiyae isua neni a idiotuŋanan, nyemunauna isua idiotuŋanan ka emam ituŋanan ŋini amodikin isua. 3Nyalimunit ayoŋ nu aŋuna ka atubokinia iyes; anerae ikwapei sek alimunitor ayoŋ ekiŋaren atemar ikiminae isua iyes nooi, iŋes nai ikitamunitor isua iyes jwi jwi alotai kosi, kikiyari kori kikitwaka. 4Ekekinyomit ayoŋ iyes nooi, eketuror ayoŋ iyes nooi; ileleba neni kaŋ atitinyu nooi ka alocan yok a daadaŋ, ilapara aneni kaŋ alelyan.

5Tari ŋina adolunere isua Makedonia, nyieŋuna isua. Ayakasi ŋatyokisyo ŋiwaetin daadaŋ, ikirikaunito isua ŋiburasyo alowaetin a daadaŋ ka ayai ekabule lotai kosi. 6Nai, abu Akuj ŋina emaimaan ŋulu esiliyorito ikitogogoŋ isua apaki ŋina adolunio Tito. 7Meere adolun keŋ bon abu ikitalaka isua, nai arae tari epite ŋolo kiponiata iyes kisimukekis iŋes. Abu iŋes itolimok isua epite ŋolo iitanitotor iyes nooi aanyun ayoŋ, epite ŋolo ikibulitor iyes, epite ŋolo ilelakinitotor iyes akiŋarakin ayoŋ; aŋun, eatakin tokona tari alakara kaŋ.

8Kikisiyaloloŋit iyes abaruwa kaŋ, nyeyaloloŋi ayoŋ aŋuna abunio egiria. Abu ayoŋ eyaloloŋ ekiŋaren apaki ŋina aanyunia atemar ipotu iyes kiyaloloŋo aŋuna ka abaruwa a ŋin. 9Nai tokona, alakara ayoŋ, meere aŋuna abunio ekesiyaloloŋ iyes, nai aŋuna abunio akiyaloloŋ kus ikiinak iyes akiki. Abu Akuj kitojok akiyaloloŋ kus, aŋun nyitiya isua ŋadi ŋuna aronok neni kus. 10Anerae akiyaloloŋ ŋina erae acamit ŋina ka Akuj, iŋes ikiinakini iwon akibelekin neni ka Akuj, yau nai aiuno. Emam ituŋanan iyaloloŋi a ŋakiro a ŋun! Nai akiyaloloŋ ŋina ka akwap a na, eyauni atwanare. 11Toanyuwasi ŋuna abu Akuj kitiya aŋuna ka akiyaloloŋ kus! Abu akiyaloloŋ ŋin ikiinak iyes alelakinit akitiya ka akitoodiun atemar emam ŋuna ikikamunito iyes! Ipotu iyes toŋoa aŋuna apotu totakanut, ipotu tokuryaketa aŋuna epedorete akitiyakin nabo. Apotu ŋakiro ŋun ikiinakis iyes akiitan aanyun ayoŋ, ekimuye ŋolo kigaŋet ayoŋ ka akisican ŋolo aratan. 12Aŋun, ani nai kegirit ayoŋ neni kus, nyerae aŋuna a ŋini abu kitiya aronis kori aŋuna a ŋini aponi kitiyakinae aronis neni keŋ, nai arae akisileerekinio iyes alokiŋaren Akuj epite ŋolo epoloo nooi ekimuye kus aŋuna kosi. 13Ŋakiro ŋun nai ikisimukekinito isua.

Akilo akimukekinit ŋin bon, ikilelyani isua nooi aŋuna ka alelyan a Tito a ŋolo kipotu iyes daadaŋ kisiyeŋut ŋatameta keŋ! 14Eturo ayoŋ aŋuna kus alokiŋaren keŋ ka nyekerumito ayoŋ ŋileec a ŋun. Nai ikwapei ikirworor isua ŋuna a kire jwi jwi neni kus, erae akituro ŋina ikitoodiunit isua aŋuna kus alokiŋaren Tito ŋina iyookino. 15Aŋun, iyata amina keŋ aŋuna kus ŋapakio daadaŋ ŋuna etamunia iŋes epite ŋolo itenitotor iyes daadaŋ akipup ŋakitatameta keŋ ka epite ŋolo ijauniata iyes iŋes ikuryanito. 16Alelyani ayoŋ nooi, anerae ekekinyomit ayoŋ iyes nooi!

Currently Selected:

2 Ŋikor. 7: NIB2008

Highlight

Copy