1 Ŋikor. 16

Ŋainakineta neni a ŋikanupak

1Acamit tokona akirwor ŋakiro ŋuna etapito ŋuna a ŋisiliŋa a ŋulu erae tocunakinae kiŋaranakinere ŋituŋa ŋulu ka Akuj ŋulu eyakasi Yudeya. Itemokino iyes kitiyata ŋuna abu ayoŋ olimok ŋatukon ŋuna a Ŋikristo a ŋulu anakwap a Galatia. 2A ŋinakoloŋit a Esabit, itemokino ŋinituŋanan kus toseta nawae ŋisiliŋa ŋidi lotyae ŋolo ke ebari keŋ, kidiatakinos, ikotere ani abuni ayoŋ, nyecuni nabo ŋice. 3Ani adoluni ayoŋ neni kus, ainakini ŋikilyok ŋulu iseunete iyes ŋabaruwae ŋuna elimorito atemar erae ikes ataŋae; kiyakiyarae ikes yaasi ŋainakineta kus Yerusalem. 4Ani erae kejok ayoŋ daŋ alosit, ikirukori ayoŋ ka ikes.

Ŋakiro ŋuna atubunit Paulo akitiya

5Abuni ayoŋ aanyun iyes kadau akitor nakwap a Makedonia, anerae itemokino etor Makedonia. 6Acepaki ikiruki iwon adiouriyen, kori daŋ ikiruki iwon ŋirwa ŋulu ka alilimu; ikotere ikiŋarakis iyes ayoŋ olot kiŋaren analosit kaŋ neni ca alosi ayoŋ daadaŋ. 7Nyacamit akitorun aanyun iyes tokona alotooma apaki na ŋina euruwuana, nai egeno ayoŋ akiya adiopaki ŋina aoyan ka iyes, erae kecamaki Ekapolon. 8Nai eboi ayoŋ a ne alotaun a Epeso akitodol akoloŋit ŋina a Pentekoste. 9Anerae ayakar tokona ayoŋ apaki ŋina ajokan ŋina itemokino ayoŋ etiyaa etic ŋolo apolon ŋolo emaikina etiya, tari kelalak ŋiketepegak a ne. 10Ani kebu Timoteo neni kus, kijautu iŋes ejok, ikotere nyekuryana iŋes irukito ka iyes; anerae itiyae iŋes etic ŋolo ke Ekapolon ikwa ayoŋ. 11Nyejamuwa idiotuŋanan iŋes. Kiŋarakisi iŋes, ikotere torubak elosi a ekisil, ido toboŋu neni kaŋ; anerae edarit ayoŋ iŋes torukut ka ŋikanupak. 12Ŋuna etapito lokaato yok Apolo, abu ayoŋ esimukek iŋes nooi abunore kaapei ka ŋikaitotoi ŋuluce aanyun iyes, nai nyecamunit iŋes nooi abunore inaa ŋirwa lu. Nai ani eryamuni iŋes apaki, ebuni.

Ŋakiro ŋuna esidyok

13Totenito, kicata ananupit, totitiny ka togogoŋ! 14Ŋuna daadaŋ itiyaete iyes, kitiyata anamina. 15Iyenete iyes Stepana ka ŋituŋa ŋulu ke ekal keŋ, erae ikes Ŋikristo ŋulu esyaunete akinup anakwap a ŋina ka Akaia ka ainakinosi akitiya etic aŋuna a ŋituŋa ka Akuj. Ekemaimai ayoŋ iyes ŋikaitotoi, 16topupo ŋikilyok ŋulu ikote ŋul ka ŋulu itiyaete ka ikes.

17Alakara ayoŋ aŋuna ka abunore a Stepana, Potunato ka Akaiko, anerae etemokis ikes daadaŋ ŋuna arae ŋuna kus; 18anerae esiyeŋut etau kaŋ, ikwaŋinapei aponiata kisieŋuniata ŋitai kus. Ejok akerit ŋikilyok ŋulu ikote ŋul.

19Ikimalaete iyes ŋituŋa ŋulu ka akwap a Asia. Ikimalaete iyes nooi Akwila ka Prisila ta ŋikanupak ŋulu iryamunun kai kec akilip alotooma Ekapolon. 20Ikimalaete iyes ŋikaitotoi daadaŋ ŋulu eya ne. Kimalas itunasi make itoodiunito atemar iminin.

21Ayoŋ Paulo egirit ŋimalasyo lu ka akan kaŋ a elope. 22Ani pa kemina ituŋanan Ekapolon, itemokino iŋes kicenoi. Ekapolon kosi, bua! 23Toyai neni kus ajokis ŋina ke Ekapolon Yesu. 24Toyai neni kus daadaŋ amina kaŋ anakimorikina yok ka Yesu Kristo.

Currently Selected:

1 Ŋikor. 16: NIB2008

Highlight

Copy