LUIMBOIMBO 2
2
1Nṋe ndi dzuvha ḽa Sharoni, ndi phendephende
ya magovhani a dzithavha.
Muṱhannga:
2Mufunwa wanga,
ní vhukati ha vhasidzana,
ni nga phendephende vhukati ha mipfa.
Musidzana:
3Mufunwa wanga,
ní vhukati ha vhaṱhannga,
ni nga muapula u vhukati ha miri ya ḓaka.
Ndi tama u dzula murunzini wawo;
mitshelo yawo i a nnḓifhela.
Musidzana: “Ndi lwadzwa nga lufuno!”
4No nnyisa nḓuni ya munyanya,
na ntsireledza nga lufuno lwaṋu.
5Mpheni mpale wa nḓirivhe,
ndi ḽe ndi wane nungo;
nnzivhuluseni nga maapula;
ndi lwadzwa nga lufuno.
6 Ngavhe ndi tshi siamela tshanḓa tshaṋu tsha monde,
tshauḽa tsho nkuvhatedza!
7 Inwi vhasadzi vha Jerusalema,
mpfulufhedziseni!
Anani nga tsephe na tholo dzi na ṱhoni,
ni ri a ni nga rithi lufuno lwanga
kana na lu vusa.
Lu litsheni lu vuwe nga lwoṱhe!
“Vhuriha ho fhela!” Musidzana:
8Ndi khou pfa ipfi ḽa mufunwa wanga;
ngouḽaa, u khou ḓa a tshi dadamala nṱha ha dzithavha;
u buḓekanya zwivhanga a tshi godimela kha nṋe.
9Mufunwa wanga u nga tsephe,
u nga tholwana.
Ngouḽa o ima tsini ha luvhondo;
u ṱodzimela nga fasiṱere;
u tou hali nga kubuli.
10Mufunwa wanga ngoyu,
u khou amba na nṋe.
Muṱhannga:
Mufunwa wanga, takuwani!
Kha ri ṱuwe roṱhe, tshinakaho wanga!
11Vhuriha ho fhela:
a hu tshee na mvula.
12Ngei shangoni maluvha a khou fhufhuma;
tshino ndi tshone tshifhinga tsha u imba;
ngei tsimuni hu pfala luimbo lwa maivha.
13Mahuyu a vho thoma u aṋwa;
muya u nukhelela u ḓifha
nga minḓirivhe i fhufhumaho.
Mufunwa wanga, takuwani! Iḓani-ha!
Kha ri ṱuwe roṱhe,
nyamunaka wanga!
14Ni songo nnzumbama unga ḽiivha ḽi no dzumbama mapakoni a dzinngwa.
Edzonu ri ndi vhone tshifhaṱuwo tshaṋu;
tsho naka hani!
Ndi pfe ipfi ḽaṋu:
ḽi takadza hani!
15Farani dziphunguhwe;
dziphunguhwana dzi tshinya masimu ashu a minḓirivhe a fhufhumisaho.
Musidzana:
16 Mufunwa wanga ndi wanga fhedzi,
na nṋe ndi wawe fhedzi.
U fulisa sambi ḽawe vhukati ha phendephende
17 u swika nga madekwana hu tshi vho rotholela,
mirunzi i tshi vhuya.
Vhuyani unga tsephe,
mufunwa wanga,
u tshi gidima unga tholwana i pharani dza thavha!
Currently Selected:
LUIMBOIMBO 2: VEN98
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1998. Used with permission. All rights reserved.