LIVITIKO 24
24
U londola dzimbone
(Ek. 27:20-21)
1 Muṋe washu o vhudza Mushe 2uri a laye Vhaisraele nga u rali a ri:
“Ḓisani mapfura a muolivi avhuḓivhuḓi o kunaho a mbone dzi re denndeni uri luvhone lu dzule lu tshi duga. 3Aroni nga a dzi funge madekwana maṅwe na maṅwe, dzi dzule dzi tshi khou duga ḽi vhuye ḽi tshe, henefho denndeni ya u ṱangana na Mudzimu nnḓa ha lupila, phanḓa ha Muṋe washu. Ndayo hei i tevhedzwe nga mirafho na mirafho. 4Aroni a londole mbone dzi re kha tshivheambone tsha musuku u songo vangiwaho, a vhone uri dzi dzule dzi tshi duga phanḓa ha Muṋe washu.
Vhurotho vhune ha ṋekedzwa Muṋe washu
5 “Dzhiani vhukhopfu ha goroi ni bage mikonde ya 12 ya vhurotho, muṅwe na muṅwe u bagiwe nga khilogiramu mbili. 6Ni ṱhophe iyo mikonde i ite thulwi mbili, miṱanu na muthihi masia oṱhe, nṱha ha ḓafula ḽo fhomiwaho musuku u songo vangiwaho, ḽine ḽa vha phanḓa ha Muṋe washu. 7Ni vhee zwioro zwi songo vangiwaho kha muduba muṅwe na muṅwe, tsha vha tshiga tsha nduvho ya zwiḽiwa i ṋekedzwaho Muṋe washu yo imelaho vhurotho. 8Ḓuvha ḽiṅwe na ḽiṅwe ḽa Sabatha vhurotho vhu fanela u vhewa phanḓa ha Muṋe washu. Hoyo ndi mushumo wa Vhaisraele wa misi yoṱhe. 9 Vhurotho ndi ha Aroni na vhaḓuhulu vhawe, nga vha vhu ḽele fhethu hukhethwa, ngauri ndi mukovhe wavho mukhethwakhethwa wa nduvho ya zwiḽiwa i ṋekedzwaho Muṋe washu.”
Munyefuli a tshi kanḓwa nga matombo
10-11 Ho vha hu na muṅwe munna, khotsi awe o vha e Muegipita, mme awe o vha e Muisraele ane a pfi Shelomithi, ṅwananyana wa Dibiri wa tsinde ḽa Dani. Henefho mishashani uyo munna a vutshelana na Muisraele. Hezwo vho vhutshelana a amba dzina ḽa Muṋe washu sa samba. Zwenezwo vha mu isa ha Mushe, 12 vha ita uri a lindiwe, vha lindela Muṋe washu a tshi vha vhudza uri vha ite mini ngae.
13Muṋe washu a vhudza Mushe a ri, 14“Uyo munna mu bviseleni nnḓa ha mishasha. Muṅwe na muṅwe we a mu pfa a tshi sema nga dzina ḽanga a vhee zwanḓa zwawe kha ṱhoho ya uyo munna hu vhe u ṱanzilela uri u na mulandu, zwenezwo vhathu vhoṱhe nga vha mu kanḓe nga matombo a vhuye a fe. 15 Zwino-ha vhudza Vhaisraele uri ane a teketela nga dzina ḽa Mudzimu u na mulandu, 16nga a vhulawe. Muisraele kana mutsinda ane a dzula kha ḽa Israele, a teketela nga dzina ḽa Yahavee, vhathu vhoṱhe nga vha mu kanḓe nga matombo a vhuye a fe.
17 “Muthu ane a vhulaha muṅwe nga a vhulawe, 18ane a vhulaha tshifuwo tsha muṅwe nga a tshi lifhe. Mulayo ndi wa uri vhutshilo vhu lifhiwa nga vhutshilo.
19 “Arali muthu a huvhadza muṅwe, zwoṱhe zwe a ita, na ene a itwe zwenezwo. 20Arali a vunḓa muṅwe shambo, na ene nga a vunḓwe shambo, a nongola muṅwe ḽiṱo, na ene nga a nongolwe ḽiṱo, a kula muṅwe ḽiṋo na ene nga a kulwe ḽiṋo. Zwine a huvhadza muṅwe na ene nga a huvhadzwe nga u ralo. 21Muthu ane a vhulaha tshifuwo nga a tshi lifhe, hone ane a vhulaha muthu nga a vhulawe. 22Mulayo hoyu u kwama noṱhe, Vhaisraele na vhatsinda vhane vha dzula na inwi, ngauri Nṋe ndi Yahavee Mudzimu waṋu.”
23Musi Mushe o fhedza u vhudza Vhaisraele hezwo, vha dzhia uyo munna vha mu bvisela nnḓa ha mishasha, vha mu kanḓa nga matombo a vhuye a fe. Ngauralo Vhaisraele vho ita zwe Muṋe washu a laya Mushe.
© Bible Society of South Africa 1998. Used with permission. All rights reserved.