VHAHEBERU 1
1
Ipfi ḽa Mudzimu nga Murwa wawe
1 Zwiḽa kale Mudzimu o amba na vhomakhulukuku washu lunzhi nga nḓila dzo fhambanaho nga vhaporofita, 2 hone misi ino ya vhufhelo o amba na riṋe nga ane a vha Murwa wawe. O sika zwoṱhe ngae, a konou mu vhea muḽaifa wa zwoṱhe. 3 Hu vhonala lupenyo lwa Mudzimu khae; zwoṱhe zwine Mudzimu a vha zwone o tou zwi kokotolo. O tika tsiko yoṱhe nga ipfi ḽawe ḽa maanḓa. O ri u ṱanzwa vhathu vhutshinyi havho a yo dzula ngei ṱaḓulu thungo ya tshauḽa tsha Ramaanḓaoṱhe vha vhusa vhoṱhe, 4 a hudzwa a fhira vharuṅwa u ḓi nga na dzina ḽo mu fanelaho ḽi tshi fhira madzina avho.
Vhuhulu ha Murwa vhu fhira ha vharuṅwa
5 Ndi ufhio muruṅwa we Mudzimu a vhuya a mu vhudza a ri,
“U Murwa wanga,
ndo u beba ṋamusi”?
a dovha a ri,
“Ndi ḓo vha khotsi awe,
Ene a vha Murwa wanga”?
6 Hone musi Mudzimu a tshi ḓisa uyo Murwa wawe wa tanzhe fhano shangoni o ri,
“Vharuṅwa noṱhe vha Mudzimu mu luvheni.”
7 A tshi amba vharuṅwa u ri,
“Mudzimu u ita vharuṅwa vhawe maḓumbu,
vhaḓinḓa vhawe a vha ita khavhu dza mulilo.”
8 Hone a tshi amba Murwa u ri,
“Khuluṋoni yau Iwe Mudzimu i ḓo ima lini na lini,
u vhusa u sa ṱaluli.
9 Zwi re zwone u a zwi funa,
vhuvhi hone u a vhu vhenga.
Ndi zwe Mudzimu a re Mudzimu wau a u vhumba khosi
ho ṱangana mifhululu,
wa fhira khonani dzau dzoṱhe.”
10 A dovha a ri,
“Iwe Muṋe wa zwoṱhe,
zwiḽa mathomoni wo tea ḽifhasi,
wa vhumba ḽiṱaḓulu nga zwanḓa zwau.
11Zwone zwi ḓo ṱahala unga tshiambaro tsha kale,
Iwe wa ḓi sala.
12U ḓo zwi peta unga nguvho,
wa dovha wa ambara zwiṅwe zwa vho nga ndi zwiambaro.
Hone Iwe a u shanduki;
vhutshilo hau a vhu gumi.”
13 Ndi ufhio muruṅwa we Mudzimu a vhuya a amba nae a ri,
“Dzula hafha thungo ya tshauḽa tshanga
ri vhuse roṱhe,
ndi vhuye ndi ite maswina au vhukando ha milenzhe yau”?
14 Hone vharuṅwa ndi vhonnyi? A si mimuya zwayo naa i shumelaho Mudzimu, a i ruma u yo shumela vhane vha ḓo tshidzwa?
Currently Selected:
VHAHEBERU 1: VEN98
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1998. Used with permission. All rights reserved.