AMUSI 1
1
1 Haya ndi maipfi a Amusi, muṅwe wa vhafuwi vha nngu vha Thekua. O amba zwe Muṋe washu a mu dzumbululela zwó livha Israele musi hu tshee ho sala miṅwaha mivhili hu tshi ḓo ḓa mudzinginyo muhulu wa shango, musi Uzia e khosi ya Juda, Jerobiamu ṅwana wa Juasi e khosi ya Israele.
Maanḓa a Mudzimu a u rwa vhatshinyi
(Am. 5:8; 9:5-6)
2 Muṋe washu u vhomba e Tsioni,
ipfi ḽawe ḽi bvuma e Jerusalema,
pfulo ya vhalisa ya oma,
ḓaka ḽa muṱumba wa Kharamele ḽa puta.
Mulandu wa Israele u fhira wa tshakha dzoṱhe
Aramu
3 Muṋe washu u ri,
“Vha Damasko vho tshinya vha dovha:
vho itela vhathu vha Giliadi tshiṱuhu tshihulu,
zwa nga vho vha lima miṱana nga malembe a tsimbi;
zwenezwo a thi nga litshi u vha lifhedza;
4 pfamo ya khosi Hazaele ndi ḓo i funga nga mulilo
wa fhisa vhushavhelo ha khosi Beni Hadada.
5 Ndi ḓo vunḓekanya tswinga dza Damasko,
nda lozwa khosi ya Govha ḽa Vhuvhi na o faraho luḓo lwa vhuhosi
Muḓini wa u ḓiphiṋa.
Vhathu vha Aramu vha ḓo hwalwa vha iswa vhuthubwani ngei Kiri
hune vha bva hone.”
U ralo Muṋe washu.
Filista
6 Muṋe washu u ri,
“Vha Gaza vho tshinya vha dovha:
vho thuba miḓi vha si sie na muthu,
vha vha rengisela Vhaedomo vha vha dziphuli;
zwenezwo a thi nga litshi u vha lifhedza;
7mitsheṱo ya Gaza ndi ḓo i funga nga mulilo
wa fhisa madzhavhelo avho,
8nda lozwa khosi ya Ashidodo
na o faraho luḓo lwa vhuhosi Ashkeloni.
Ndi ḓo angaladza tshanḓa tshanga
nda rwa vhathu vha muḓi wa Ekroni nda lozwa Vhafilista
hu si sale na muthihi.”
U ralo Muṋe wa zwoṱhe Muṋe washu.
Tiro
9 Muṋe washu u ri,
“Vha Tiro vho tshinya vha dovha;
vho thuba miḓi vha si sie na muthu,
vha vha rengisela Vhaedomo sa dziphuli,
vha si tsha londa mulanga wa vhukonani
we vha vhofha;
zwenezwo a thi nga litshi u vha lifhedza;
10mitsheṱo ya Tiro ndi ḓo i funga nga mulilo
wa fhisa madzhavhelo avho.”
Edomo
11 Muṋe washu u ri,
“Vhaedomo vho tshinya vha dovha;
vho pandamedza Vhaisraele vharathu vhavho nga pfumo
vha si vhuye vha vha khathutshela;
vho vha ponda vho sinyuwa vha dovha,
mbiti dzavho dza si vhuya dza dzika;
zwenezwo a thi nga litshi u vha lifhedza;
12muḓi wa Themani ndi ḓo u funga nga mulilo
wa fhisa na madzhavhelo a Bosora.”
Amoni
13 Muṋe washu u ri,
“Vhaamoni vho tshinya vha dovha;
vho fhandula vhasadzi vha Giliadi vho vhifhaho muvhilini
vha tshi ṱoḓa u engedzedza shango ḽavho;
zwenezwo a thi nga litshi u vha lifhedza;
14mitsheṱo ya Raba ndi ḓo i funga nga mulilo
wa fhisa vhushavhelo havho;
musi wonoyo hu ḓo pfala mukosi wa nndwa,
nndwa ya thutha miḓi unga tshiḓumbumukwe;
15khosi yavho i ḓo hwalwa ya iswa vhuthubwani,
ene khathihi na magota awe.”
U ralo Muṋe washu.
Currently Selected:
AMUSI 1: VEN98
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1998. Used with permission. All rights reserved.