Philippians 2

1Christ blihelniye, na ṫawowauƞṡila ki uƞ waċiƞṫognagniye. Ok̇olakiċiye-wak̇aƞ ki wiċayuwaƞjila ċa uƞṡiyeċilapi na oyate ki ċaƞtowiċayagnake. 2Ċaƞte iyokimayiƞ na tuwe ki iyuha ob okiċiwaṡteya uƞwo. Tuwe ki iyuha ob waƞjila sʹe wiyukcaƞpo. 3Wiċonawizi na iye ahoiċ'iṗapi ki hetaƞhaƞ iḣayab igluzayo, Eṡʹeyaṡ waƞna uƞṡiiċ'iya yauƞ kte, na oyate ki eċa yuwaƞkal wiċaluziƞ kte. 4Tokel awaƞniglake ki he iyeċel oyate ki wiċayakuwa kte 5Na Christ Jesus tokel ṫawaċiƞ ki he iyeċel oholayeḣċiƞ oyale kte, 6Christ Wak̇aƞṫaƞka ṫaouƞċaġe ki iyeċeċa. Eyaṡ iye waiyehaƞyaƞ ṡniya igluha kte ki he iglaḣniġe. 7Eċaƞleṡ taku ki hena iyuha ayuṡtaƞ na eeye wayaka sʹe kuwapi kta ognaya iċ'iċ'u, na uƞkiyepi iyeċel uƞ. 8Christ uƞṡiiċ'iya uƞ. Wak̇aƞṫaƞka ahoṗaya igluha na ċaƞiċipaweġa akaƞl wiċaktepi ki hel iƞṡʹeya tʹe. 9Hehaƞl Wak̇aƞṫaƞka Christ wiċayuonihaƞpi he ihaƞkeyaḣci ki uƞ ṫaċaje ki tuweni samṗeya yuonihaƞpi ṡni hehaƞyaƞ yuonihaƞ. 10Heuƞ Jesus ṫaċaje ki he uƞ tuwe ki iyuha ċaƞkpemak̇agle inajiƞpi kte, maḣpiyata uƞpi, na mak̇a iyoḣlate uƞpi hena k̇o. 11Na Wak̇aƞṫaƞka ṫawowitaƞ uƞ tuwe ki iyuha leċel aokiyapi, "Jesus Christ iṫaƞċaƞ ki he e!" 12Mitakuyepi, niohaƞ wauƞ waƞ hehaƞ ohiƞniyaƞ taku oċiċiyakapi ki hena ahoyaṗapi. Eyaṡ waƞna niṫehaƞ wauƞ eṡa lena woyaksape ki tok̇a lawapi kte. Ċa wowiċala luhapi ki he taƞyaƞ ahokiṗaya wowaṡi eċuƞpo. 13Wak̇aƞṫaƞka niohaƞ uƞ heċel taku ċiƞniƞċiye ki he iyeċel iyayayiƞ kte. 14Taku ki iyuha iyokipiya eċuƞwo, na waakiniċe ṡni yo. 15Heċetu ki wak̇aƞyeja iyeċel wotiyemnaṡni yauƞpi kte, na tiwahe uƞṡikiċilapi ki he iyeċel Wak̇aƞṫaƞka niyuhapi kte. Oyate eya owoṫaƞlapi ṡni na ṡikṡilya uƞpi ċa ohaƞ yauƞ eṡa oiyokpaze el iyojaƞjaƞya nigluha kte. 16Woṫaƞiƞ waṡte ki uƞ wiċoni kte ki he sutaya gluha nayajiƞ kte. Heċel tohaƞl Christ ake gli kihaƞ, iċiyuṡkiƞpi kte. Nakuƞ wowaṡi waƞ teḣiya gluha wauƞ kʹuƞ he iyatakuƞniṡni ki heuƞ. 17Iṫaƞċaƞ wiċayalapi na wowaṡi iyeċiċaƞnuƞpi ki he wak̇aƞyaƞ wauƞyekiyapi ki he iyeċeċa. Na heuƞ niyepi uƞ miṫawe ki wakpapsuƞ kte seċe. Eyaṡ heuƞ ċa heċetu haƞtaṡ miṡʹeya iyomakipi kte. 18He iyeċel niṡʹeya iyoniċipipi na nakuƞ iyokipi mayayapi kte. 19Niye eċiyataƞhaƞ takuƞl waṡte uƞ onaċiḣ'uƞpi waċin. Heuƞ eċaƞni Timothy hiyuwayiƞ kte ki he Iṫaƞċaƞ Jesus iwaċiƞwaye. 20He tuweni waƞhehaƞ ċaƞtonignakapi ċa slolwaye ṡni. 21Huƞḣ iye ecela awaiċ'iċiƞpi na taku Christ Jesus iċiyataƞhaƞ ki hena itok̇api ṡni. 22Eyaṡ Timothy wiċaṡa tokċa ki he slolyayapi. He ċiƞkṡiwaye iyeċel kiċi wowaṡi eċamu, na Woṫaƞiƞ Waṡte ki uƞyaoṫaƞiƞpi. 23Tohaƞl tokel makuwapi kte ki he slolwakiye kihaƞ, Timothy hiyuwayiƞ kta miṫawaċiƞ. 24Miṡʹeya eċaƞni waċiƞyaƞkapi waċiƞ ki le Iṫaƞċaƞ ki iwaċiƞwaye. 25Epaphroditus miṫak̇ola waƞ omakiyiƞ kta ċa hiyuyayapi waƞ he hektakiya kiglewayiƞ kta awaċamiƞ. He iƞṡʹeya Iṫaƞċaƞ ṫawowaṡi ki waƞji na misakibya ṡkiƞċ'iye. 26He waniyaƞkapi ċiƞ. He wayazaƞka keya onayaḣ'uƞpi ki he naḣ'uƞ na inihaƞiċ'iye. 27He lila wayazaƞkiƞ na tʹa tk̇a. Eyaṡ Wak̇aƞṫaƞka uƞṡila, na miṡʹeya uƞṡimala na ċaƞteṡiċapi ki etaƞhaƞ iḣeyab mayuha. 28Heuƞ ċa Epaphroditus hektakiya glewakiya waċiƞ. Iyuṡkiƞya waƞlakapi kte, na miṡʹeya hehaƞyan caƞte imakame kte ṡni. 29Iyuṡkiƞya taƞyaƞkel kuwapo. Iṫaƞċaƞ wowaṡi ikic̄iċuƞpi ki wiċayuonihaƞpi ki he iyeċel. 30Christ ṫawowaṡi ki yuha ṡkiƞċ'iyiƞ na tʹa tk̇a, wiċoni kpaġaƞ na taku eċamayec̄iċuƞ oyakihipi ṡni kʹuƞ hena eċuƞ.

Currently Selected:

Philippians 2: LKTNT20

Highlight

Copy

Compare