Kuŵalanga 2
2
Ukotopasyo wa ngosyo pa igono ya Ŵaisilaeli
1Ambuje Akunnungu ŵapele che Musa ni che Haluni malajisyo ga: 2“Waisilaeli taŵiche igono yao kila mundu tatame pamalo pachili chilosyo chakwe ni bendela ja nnango wakwe. Tataŵe igono yao kulisyungula Lisakasa lya Kusimanilana kwaligongo lya Akunnungu.”
3“Cha kungopochelo lyuŵa kulola kwalikutyochela lyuŵa, chigono cha mipingo ja Yuda taŵiche chigono pamalo pajili bendela jao. Chilongola jwao taŵe che Nashoni mwana jwa che Aminadabu. 4Mpingo wakwe ŵaliji ni achalume elufu sabini na nne na mia sita. 5Ŵachakuye kuŵika chigono pakumala ŵandu ŵa lukosyo lwa Yuda tachiŵa ŵandu ŵa lukosyo lwa Isakali, chilongola jwao achiŵaga che Nesaneli mwana ju che Suali, 6mpingo wakwe mpela iŵatite kuŵalanjikwa waliji ni achalume elufu amsini na nne na mia nne. 7Nipele lukosyo lwa Sabuluni chilongola jwao achiŵaga che Eliabu mwana jwa che Heloni, 8mpingo wakwe mpela iŵatite kuŵalanjikwa waliji ni achalume elufu amsini na saba ni mia nne. 9Ŵandu wose ŵatachiŵa mu chigono cha ŵandu ŵa Yuda malinga ni mipingo jao, ali ŵandu laki moja elufu semanini na sita na mia nne. Ŵanyawo ni ŵatachiŵa ŵakulongolela pa ulendo.”
10“Cha kulujenda aŵala ŵaali pamalo pajili bendela ja mpingo wa Lobeni malinga ni mipingo jao, chilongola jwao tachiŵa che Elisuli mwana jwa che Shedeuli, 11mpingo wakwe mpela iŵatite kuŵalanjikwa waliji ni ŵandu elufu alobaini na sita na mia tano. 12Nipele aŵala ŵatachiŵika chigono mumbali mwa ŵandu ŵa lukosyo lwa Lobeni tachiŵa ŵandu ŵa lukosyo lwa Simeoni, chilongola jwao tachiŵa che Shelumieli mwana jwa che Suli Shadai, 13mpingo wakwe mpela iŵatite kuŵalanjikwa waliji ni ŵandu elufu amsini na tisa na mia tatu. 14Lukosyo lwa Gadi tilukuye, chilongola jwao achiŵaga che Eliasafu mwana jwa che Deueli, 15mpingo wakwe mpela iŵatite kuŵalanjikwa waliji ni ŵandu elufu alubaini na tano na mia sita na amsini. 16Achalume wose ŵatachiŵa mu chigono cha Lobeni malinga ni mipingo jao taŵe ŵandu laki moja na elufu amsini na moja na mia nne na amsini. Ŵeleŵa ni ŵatachiŵa mpingo waaŵili pa ulendo.”
17“Nipele, Lisakasa lya Kusimanilana kwaligongo lya Akunnungu ni chigono cha lukosyo lwa Ŵalawi, chiiŵe pasikati ja igono yose. Ŵanyawo tajende kwa ukotopasyo ulaula mpela muŵaŵisile igono, kila mundu pamalo pakwe nsyene pamalo pajili bendela jakwe.”
18Cha kumaswelelo lyuŵa, aŵala ŵaali pamalo pa bendela ja mpingo wa Efulaimu tachiŵika chigono malinga ni mipingo jao, chilongola jwao tachiŵa che Elishama mwana jwa che Amihudi, 19mpingo wakwe mpela iŵatite kuŵalanjikwa chiuŵe ni ŵandu elufu alubaini na mia tano. 20Namala pe lukosyo lwa Ŵaefulaimu tilukuye lukosyo lwa Manase: Chilongola jwao achiŵaga che Gamalieli mwana jwa che Pedasuli, 21mpingo wakwe mpela iŵatite kuŵalanjikwa chiuŵe ni ŵandu elufu salasini na mbili na mia mbili. 22Lukosyo lwa Benjamini tilukuye. Chilongola jwao ali che Abidani mwana jwa che Gideoni, 23mpingo wakwe mpela iŵatite kuŵalanjikwa chiuŵe ni ŵandu elufu salasini na tano na mia nne. 24Ŵandu wose ŵatachiŵa mu chigono cha Efulaimu malinga ni mipingo jao ni ŵandu laki moja na elufu nane na mia moja. Mpingo wo tiuŵe waatatu kutyoka.
25Cha Kumpoto, tikuŵe ni mipingo ja chigono cha Dani, pamalo pajili bendela jao. Chilongola jwao tachiŵa che Ahieseli mwana jwa che Amishadai, 26mpingo wakwe mpela iŵatite kuŵalanjikwa chiuŵe ni ŵandu elufu sitini na mbili na mia saba. 27Lukosyo lwa Asheli tiluŵiche chigono chao chiŵandi ni chigono cha lukosyo lwa Dani. Chilongola jwao tachiŵa che Pagieli mwana jwa che Okilani, 28mpingo wakwe mpela iŵatite kuŵalanjikwa chiuŵe ni ŵandu 41,500.
29Lukosyo lwa Nafutali tilukuye. Chilongola jwao tachiŵa che Ahila mwana jwa che Enani, 30mpingo wakwe mpela iŵatite kuŵalanjikwa chiuŵe ni ŵandu elufu amsini na tatu na mia nne. 31Ŵandu wose ŵatachiŵa mu chigono cha Dani malinga ni mipingo jao taŵe ŵandu laki moja na elufu amsini na saba na mia sita. Mpingo wo tiuŵe wambesi kutyoka, paasi pa bendela jao.
32Ŵele ni Ŵaisilaeli ŵaŵaŵalanjikwe malinga ni minango jao. Ŵanawose aŵala ŵaali pa chigono pa mipingo jao, ali ŵandu laki sita na elufu tatu na mia tano na amsini. 33Nambo Ŵalawi nganaŵalanjikwa pamo ni Ŵaisilaeli achinjawo mpela Ambuje Akunnungu iŵalajichisye che Musa.
34Kwayele Ŵaisilaeli ŵatesile kila chindu mpela Ambuje Akunnungu iŵatite pakwalajisya che Musa. Yele ni iŵatite pakuŵika igono yao pamalo pasili bendela syao, ni sooni yele ni iŵatite pakutyoka, kila mundu ali pa ntundu wakwe ni ulongo wakwe.
Yao Bible Versiont © The Word for the World Southern Africa and Pioneer Bible Translators, 2018.