Ŵalawi 1
1
Yakuti kujityosya mbopesi jakutinisya
1Ambuje Akunnungu ŵammilasile che Musa ni kukunguluka nao pa Lisakasa lya Kusimanilana, ŵaasalile, 2Ŵaisilaeli kuti, mundu jwajulijose yaanonyelaga kwapelechela Ambuje Akunnungu mbopesi ja chinyama, chaachisagule chinyama cho mu ilango yakwe ya ng'ombe pane ngondolo pane mbusi.
3Iŵaga mbopesi jaakujipeleka mundu jili ng'ombe jakutisya, chajisagule ng'ombe jankambaku jangalemala mu ilango yakwe, chapelechele paujo pa nnango wa Lisakasa lya Kusimanilana kuti mbopesi jo jikundikwe ni Ambuje Akunnungu. 4Ni chaŵiche nkono wakwe pantwe wa chinyama cha mbopesi jakutinisya, nombe mbopesi jo chijikundikwe pamalo pakwe kwaligongo lya kumpanganyichisya mundu jo ujilanyo ni Akunnungu. 5Nipele chasikite ng'ombe jo paujo pa Ambuje Akunnungu. Nombe ŵambopesi ŵa uŵelesi u che Haluni chajigale miasi ni kuchinyulunyusya chilisa chachili pa nnango wa Lisakasa lya Kusimanilana mbande syakwe syosye. 6Mundu jo chachigwagule chinyama cha mbopesi cho ni kuchikatanya iŵaloiŵalo. 7Ni ŵambopesi wo, ŵa uŵelesi u che Haluni chasusanye sasu pa chilisa ni kukolesya mooto. 8Nipele ŵambopesi wo, ŵanache ŵa che Haluni chajigale iŵalo ya chinyama pamo ni ntwe ni mauta ni kuŵika yambone pachanya sasu pa chilisa. 9Nipele matuumbo ni makongolo ga chinyama, mundu jo akusachilwa ajosye ni meesi. Jwambopesi chatinisye mbopesi jose pachanya chilisa. Jelejo jili mbopesi jakutinisya ni mooto jajili jakununjila yambone jajikwanonyela Ambuje Akunnungu.
10Iŵaga mundu chajigale mbopesi jakwe jakutinisya mu ilango yakwe ya ngondolo pane mbusi, nipele chasagule tonde ja mbusi pane ngondolo jangalemala. 11Chachisikitile cha kumpoto kwa chilisa, paujo pa Ambuje Akunnungu ni ŵambopesi wo ŵa uŵelesi u che Haluni chanyulunyusye miasi jakwe mu mbande syosye sya chilisa. 12Nipele mundu jo chachikatanye iŵalo yakwe, nombe jwambopesi chaŵiche yambone iŵalo yo pamo ni ntwe ni mauta pa mooto pachanya chilisa. 13Nambo matuumbo ni makongolo gakwe akusachilwa ajosye ni mesi. Jwambopesi jo chatinisye yose pa chilisa. Jelejo jili mbopesi jakutinisya jajili jakununjila yambone jajikwanonyela Ambuje Akunnungu.
14Iŵaga akwapelechela Ambuje Akunnungu mbopesi jakutinisya ja ijuni, nipele apeleche njuŵa pane likandi lya ngunda kuŵa mbopesi jakwe. 15Jwambopesi chaichenacho chijuni cho pa chilisa, chachipopotole lukosi ni kuchilekanganya ntwe ni chiŵiliŵili ni kuchitinisya pachanya chilisa. Miasi jakwe chijinyulunyusikwe mu mbalati mwa chilisa. 16Chitolokoso chakwe ni usakwa wakwe chatyosye ni kwasila chakungopochelo lyuŵa kwa chilisa, pachitutu. 17Chachikamule mapapiko ni kuchipapachula, nambo ngasachilekanganya iŵalo iŵili. Nipele jwambopesi chachitinisye pa chilisa pachanya sasu. Jelejo jili mbopesi jakutinisya ni mooto jajili jakununjila yambone jajikwanonyela Ambuje Akunnungu.
Currently Selected:
Ŵalawi 1: YBV
Highlight
Share
Copy
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.
