Ndandililo 27

Che Isaka akumpa upile che Yakubu

1Che Isaka ŵachekulwipe ni meeso gao galiji ngagakulola. Nipele ŵammilasile che Esau mwanagwe jwakwitiwo, achitiji, “Mwanangu!” Nombejo ŵajitiche, “Ndili apano atati!” 2Che Isaka ŵatite, “Mpilikane, une sambano njekulwipe, ni ngangulimanyilila lyuŵa lya kuwa kwangu. 3Kwayele, njigale yakumenyanila yenu, yaani ukunje ni mipamba, njaule mwitinji nkaamulajile chinyama. 4Mundelechele une chakulya chakunong'a, achila chinguchinonyela kwannope, muumbe kuti ngombole kumpa upile ngunaŵe kuwa.”

5Che Labeka ŵaliji nkupikana katema che Isaka paŵakungulukaga ni che Esau. Kwayele, che Esau paŵajawile kwitinji kukusakula, 6che Labeka ŵansalile che Yakubu mwanagwe kuti, “Naapikene atati ŵenu ali nkwasalila akulu ŵenu che Esau kuti, 7akaaulajile nyama ni kwatelechela chakulya chakunong'a kuti alye ni pakumala kulya akombole kwapa upile paujo pa Ambuje akanaŵe kuwa. 8Sambano mwanangu, Mumbilikanichisye ni kunyitichisya ichinansalile. 9Njaule kuili ilango nkanyigalile tundeembe twambusi tuŵili twakwimbala, kuti naatelechele atati ŵenu chakulya chakunong'a chaakuchinonyela. 10Nipele chimwapelechele atati ŵenu akalye, akombole kumpa upile akanaŵe kuwa.”

11Nambo che Yakubu ŵansalile achikulugwe, “Nkumbuchile kuti che Esau akulu ŵangu akwete malaika gamajinji pa chiilu pakwe nambo une nganingola. 12Panepa atati ŵangu chaakasache kuumbapasya, ngati chamanyilile kuti ngwalambusya, kwayele, chakambe une malweso pamalo pa kuumba upile.” 13Achikulugwe ŵansalile, “Malweso genu gambate une, mmwe ntendekanye ingunsalila yi. Njaule nkanyigalile tumbusi to.”

14Nipele che Yakubu ŵajawile, ŵatujigele tundembe twambusi tuŵili tula ni kwapelechela achikulugwe. Nombe achikulugwe ŵala ŵachiteleche chakulya chakunong'a chakuchinonyela che Isaka atatigwe cha Yakubu. 15Che Labeka ŵajigele yakuwala yambone ya che Esau, mwanagwe jwankulungwa iyaliji mu nyuumba ni kwawasya che Yakubu, mpwakwe. 16Ŵammwasisye sooni mapende ga tundembe twambusi tula, mmakono ni pa lukosi pakwe. 17Nipele ŵampele che Yakubu chakulya chakunong'a chiŵachiteleche chila ni nkate kuti akaapelechele atatigwe.

18Che Yakubu ni ŵapite kuŵaliji atatigwe, ni ŵaaŵilasile, “Atati!” Nombewo ŵajitiche, “Naamu! Ana ŵaani mmwe? Ana mwanangu?” 19Che Yakubu ŵajanjile, “Ndili une che Esau, mwanagwenu jwankulungwa. Ndesile mpela intite pakuusalila. Choonde atati ntaame ni kulya nyama jinajawile kukusakula kuti nkombole kuumba upile.” 20Nambo che Isaka ŵammusisye mwanagwe jo, “Mwanangu, ikomboleche uli kuti njipatile nyama mwakwanguya?” Che Yakubu ŵajanjile, “Ligongo Ambuje Akunnungu ŵenu angamuchisye najipate mwakwanguya.”

21Nipele che Isaka ŵansalile che Yakubu, “Mmandichile apano mwanangu nampapasye kuti manyilile naga kusyene mmwe nli mwanangu che Esau.” 22Che Yakubu ŵajawile chiŵandika ni che Isaka atatigwe, nombewo ŵampapesye ni kuti, “Liloŵe lyenu likupikanika mpela lya che Yakubu nambo makono genu gali mpela che Esau.” 23Nganiŵamanyilila kuti ŵaliji che Yakubu, ligongo makono gakwe galiji ni manyunya gamajinji mpela che Esau nkulugwe. Kwayele, ŵampele upile che Yakubu. 24Nambo ŵammusisye sooni, “Ana isyene mmwejo nli mwanangu che Esau?” Nombejo ŵajanjile, “Elo, ndili une che Esau.” 25Atati ŵao ŵatite, “Mumbelechele nyama jo kuti ndye, nipele chinampe upile mwanangu.” Pelepo che Yakubu ŵapeleche chakulya, nombewo ŵalile. Ŵaapelechele ni divai, ŵang'wele. 26Nipele che Isaka atatigwe, ŵatite, “Mumandichile mwanangu kuti mungumbatile.” 27Kwayele, che Yakubu ŵammandichile atatigwe kuti ŵaakumbatile, ni atatigwe paŵakupikene kununjila kwa yakuwala yakwe, ŵampele upile achitiji,

“Nnole, kununjila kwambone kwa mwanangu,

kuli mpela kununjila kwa ngunda wati Ambuje Akunnungu aupele upile!

28Akunnungu antuluchisye ula kutyochela kwinani,

ampe ngunda waukwete chajila,

ni yakulya ni divai kwa winji.

29Ŵandu ŵa ilambo yose antumichileje mmwe,

ni ŵandu ŵa ngosyo sine antindiŵalileje kwa luchimbichimbi.

Mmwejo mme chilongola jwa achalongo ŵenu,

ŵanache ŵa chilume ŵa achikulu ŵenu antindiŵalileje kwa luchimbichimbi.

Alweseche ŵandu wose ŵakunlwesya mmwe,

Akole upile ŵandu wose uchampe mmwe upile!”

Che Esau akuŵenda upile ku che Isaka

30Che Isaka paŵamasile kwapa upile che Yakubu ni che Yakubu natyoka pe paŵaliji atatigwe, che Esau nkulugwe che Yakubu ŵausile kutyochela kwitinji akula kuŵaliji nkusakula. 31Che Esau nombe ŵateleche chakulya chakunong'a, ŵampelechele atatigwe achitiji, “Atati ŵangu, choonde ntame ni kulya nyama jinajawile kukusakula une mwanagwenu, kuti nkombole kuumba upile!” 32Che Isaka ŵausisye, “Ana mmwejo ŵaani?” Nombe che Esau ŵajanjile, “Ndili une mwanagwenu jwankulungwa che Esau.” 33Pelepo che Isaka ŵatetemele nnope, ni ŵatite, “Ana nduni jwejula juŵapite kukusakula ni kwikanajo nyama none lile nkanaŵe kuuja? Sooni masile kumpa upile jwelejo; elo, nombejo amasile kupegwa upile!”

34Che Esau paŵagapikene maloŵe ga atatigwe, ŵalisile kwannope mwakupetesya ntima. Nipele ŵansalile atatigwe, “Choonde atati ŵangu, mumbe upile none jwakwe!” 35Nambo che Isaka ŵatite, “Mpwenu ŵaiche ni kuunambusya, ŵelewo ni ŵajigele upile wenu.” 36Che Esau ŵatite, “Lyeleli lili ligongo akuŵilanjikwa che Yakubu! Anyenjile une kaŵili. Kaandanda ŵaasumwile ukulungwa wangu wa kupagwa, ni sambano aujigele upile wangu.” Nipele ŵausisye atatigwe, “Ana atati nganimusigachisya upile wauliwose?” 37Che Isaka ŵajanjile, “Masile kwatenda che Yakubu kuŵa chilongola jwenu, ni kwapa achapwenu wose kuŵa ŵakutumichila ŵakwe. Naapele yakulya ni divai. Ana sambano nantendele ichichi mmwejo mwanangu?” 38Che Esau ŵammusisye atatigwe, “Ana atati, nkwete upile umo pe? Choonde atati mumbe upile noneji jwakwe!” Pelepo che Esau ŵatandite kulila kwa liloŵe lyekulungwa. 39Nipele che Isaka, ŵansalile,

“Chintame pamalo pangali chajila,

ni ula ngajinya kutyochela kwinani.

40Timme mundu jwakuputana ngondo,

ni chinchiŵa jwakutumichila jwa mpwenu;

nambo pachinkane kwitichisya malajisyo gakwe

chinchityoka paasi pa ulamusi wa mpwenu jo.”

41Pelepo, che Esau ŵatandite kunchima mpwakwe jo kwaligongo lya upile uwaliji apegwile ni atatigwe. Che Esau ŵaganisisye mu ntima, “Pachigamale matanga ga atati, ni pachinaulaje mpwangu che Yakubu.” 42Nambo che Labeka paŵaumanyi nningwa wa mwanagwe jwankulungwa jo, nipele ŵammilasile che Yakubu, mwanagwe jwannondi, ŵansalile, “Nlilolechesye, che Esau nkulugwenu akuganisya ichajile pakummulaga mmwejo. 43Kwayele, mwanangu, ngapikanile maloŵe gangu. Ntyoche, mmutuchile ku Halani kwa achimwene che Labani. 44Nkatame kweleko kwa moŵa gampepe, mpaka kutumbila kwa nkulugwenu jo pachikumale. 45Lutumbilo lwakwe pachilumale, nombe pachamale kunlechelela, chinanlajisye mundu aiche kukunjigala. Ligongo chi njasiche wose ŵaŵili kwa lyuŵa limo?”

Che Isaka akunjausya che Yakubu ku che Labani

46Che Labeka ŵansalile che Isaka, “Achakongwe ŵa Chihiti ŵa che Esau ŵa, aandesile me jwasongoneka mu utame wangu. Naga che Yakubu chalombele jumo mwa achakongwe ŵa Chihiti ŵa, mmbaya mwe.”

Currently Selected:

Ndandililo 27: YBV

Highlight

Copy