2 Mamwenye 9
9
Che Yehu akwitililwa mauta aŵe mwenye jwa Isilaeli
1Katema kakoko jwakulondola jwa Akunnungu che Elisha ŵammilasile jumo jwa mumpingo wa ŵakulondola, ŵansalile, “Nliŵiche chile, njigale achi chuupa cha mauta ga setuni, njaule ku Lamoti Gileadi, 2ni mwaikaga kweleko munsose che Yehu mwana jwa che Yehoshafati chisukulu chi che Nimshi. Mummiche pajika ni achinjakwe munjisye mu chumba 3nipele njigale chupa cha mauta ga seituni munjitile pantwe pakwe munsalile, ‘Ambuje Akunnungu akuti: Nanjitilile mauta mme mwenye jwa ku Isilaeli.’ Pelepo mbugule nnango ntyoche chitema.”
4Nipele, jwakulondola jwanchanda jula ŵapite ku Lamototi Gileadi. 5Paŵaiche kweleko ŵaasimene achakulu ŵa ŵangondo ali pankungulu, ŵatite, “Ngwete utenga wenu mmwe jwankulu jwa ŵangondo.”
Che Yehu ŵausisye, “Ana utenga wo wacheni pasikati jetu uwe?” Jwakulondola jula jwajanjile, “Utenga wo uli wenu mmwe mwasyene.” 6Pelepo ŵanawose ŵaŵili ŵajinjile ku chuumba ni kweleko jwakulondola jwanchanda jula ŵanjitilile che Yehu mauta pantwe ni kunsalila, “Ambuje Akunnungu, Akunnungu ŵa ku Isilaeli akuti, ‘Ngunjitilila mauta kuti mme mwenye jwa ŵandu ŵangu Ŵaisilaeli. 7Chimwapute ŵandu ŵa pannango wa che Ahabu ambuje ŵenu kuti naliuchisye chisasi kwa maulago ga ŵakulondola ŵangu ni ga ŵakutumichila ŵangu wose ŵati che Yesebeli ŵaauleje. 8Ŵandu wose ŵa pannango wa che Ahabu taajonasikwe. Sooni tinammulaje kila jwannume jwa paulongo wa che Ahabu aŵeje kapolo pane jwanganaŵa kapolo. 9Tinjatenda ŵandu ŵapannango wa che Ahabu aŵe nti ŵandu ŵapannango wa che Yeloboamu mwana ju che Nebati ni ŵandu ŵapannango wa che Baasha mwana ju che Ahiya. 10Che Yesebeli ngasasikwa, malilo gakwe chigaligwe ni mbwa mu chilambo cha ku Yesileeli.’” Paŵamasile kuŵecheta yeleyo jwakulondola jwanchanda jula ŵaugwile nnango ni kuutuka.
11Che Yehu paŵausile kwa achinjakwe, jumo jwausisye, “Ana kwana lisausyo lililyose? Ana ligongo chichi jwele mundu jwampungwane ju ŵaiche kukwenu?” Che Yehu ŵajanjile, “Mummanyi mundu jo ni indu yakuisalaga.” 12Nombe ŵanyawo ŵatite, “Nkutulambusya! Ntusalile chasasile!” Nipele ŵaasalile, “Ŵatite kuti Ambuje Akunnungu atite, ‘Nanjitilile mauta kuti mme mwenye jwa ku Isilaeli.’”
13Papopo achakulu achinjakwe ŵausile minjilo jao, ŵaunjiche pamo pa ngasi paasa, kuti ajime pachanya pakwe, ŵagombile mapenenga ni kunyanyisya, “Che Yehu ali mwenye!”
Che Yolamu mwenye jwa ku Isilaeli akuulajikwa
14Che Yehu mwana ju che Yehoshafati jwati nombe jwaliji chisukulu chi che Nimshi ŵatesile malindi ga kungalauka mwenye che Yolamu. Kele katema ko mwenye che Yolamu ni ŵandu wose ŵa ku Isilaeli ŵaliji ku Lamoti Gileadi kuulindilila kuti ukajigalikwa ni mwenye che Hasaeli jwa ku Alamu. 15Nambo mwenye che Yolamu ŵausile ku Yesileeli kuti alilwasye maŵanga gaŵaulele ku ngondo katema kaŵaputanaga ni che Hasaeli mwenye jwa ku Alamu. Che Yehu ŵaasalile achakamusi ŵakwe, “Iŵaga nkusakanga kuti une meje mwenye, nkanlechelela mundu jwalijose kutyoka paasa musi kwaula kukusijausya ngani si ku Yesileeli.” 16Pele che Yehu ŵakwesile mutuka jakwe jakukwekwelemwa ni falasi ni kwaula ku Yesileeli. Kweleko che Yolamu mwenye jwa ku Isilaeli ŵaliji chiŵela chigonele pachindanda, ni che Ahasia mwenye jwa ku Yuda ŵaliji aiche kukunnola.
17Jwakulindilila juŵaliji pa sanja ŵatite, “Ngwawona ŵandu ali nkwika ni mutuka!” Che Yolamu mwenye jwa ku Isilaeli ŵajanjile, “Munsagule mundu jumo jwakukwela falasi muntume kuti asimane nao akaausye, ‘Ana nkwika kwa chitendewele?’” 18Nipele jwantenga jula ŵakwesile falasi ni kwaula kukusimana ni che Yehu ni ŵatite, “Mwenye akuusya, ana nkwika kwa chitendewele?” Che Yehu ŵajanjile, “Chitendewele chachi? Mmwe nlunde panyuma pangu munguye!” Jwakulindilila jula ŵapeleche utenga wakuti, “Jwantenga ŵaichilile nambo ngakuuja.” 19Nipele mwenye ŵantumile jwakukwela falasi jwaaŵili, paŵaiche, ŵansalile che Yehu kuti “Mwenye akuusya, ana nkwika kwa chitendewele?” Che Yehu ŵansalile, “Chitendewele chachi? Mmwe nlunde panyuma pangu munguye!” 20Jwakulindilila jula ŵatite, “Jwantenga ŵaichilile nambo nombejo ngakuuja.” Ŵajendelechele kuŵecheta, “Jwakwendeshya mutuka akuutusya nti che Yehu mwana ju che Nimshi pakuŵa akuutusyaga nti jwampungwane.”
21Nipele che Yolamu mwenye jwa ku Isilaeli ŵalajisye achitiji, “Mumichile chile mutuka.” Nombe ŵanya ŵala paŵamasile kuŵika chile mutuka, pelepo che Yolamu mwenye jwa Isilaeli ni che Ahasia mwenye jwa ku Yuda, ŵatyosile kila mundu jwakwesile mutuka jakwe, ŵapite kukusimana ni che Yehu. Ŵansimene ku ngunda u che Naboti jwa ku Yesileeli. 22Che Yolamu mwenye jwa ku Isilaeli paŵammweni che Yehu ŵausisye, “Ana nnyiche kwa chitendewele?” Che Yehu ŵaajanjile, “Ikukomboleka chinauli kukola chitendewele akuno ŵandu ali nkuipopelela inyago, ni usaŵi wa achikulu ŵenu che Yesebeli uli upali?” 23Kwayele che Yolamu mwenye jwa ku Isilaeli ŵagalaŵisye mutuka jakwe ni kutyoka akuno achinsalilaga cha Ahasia mwenye jwa ku Yuda kuti, “Che Ahasia, ŵandu ŵa ali ŵakugalauka.” 24Pele che Yehu ŵauwutile nkuje wakwe wansomile kungongo ni wapelete pa chidali chi che Yolamu ni kuusoma ntima wakwe, papopo ŵagwilile mu mutuka jakwe ni kuwa. 25Nipele che Yehu ŵansalile che Bidikali nkamusi jwakwe, “Njigale chiilu chakwe nkachijasile ku ngunda u che Naboti jwa ku Yesileeli. Pakuŵa nkukumbuchila mmwe ni une patwajendesyaga mutuka syetu panyuma pa che Ahabu atati ŵao, katema Ambuje Akunnungu paŵalondwele yankati jwelejo, paŵatite kuti, 26‘Liiso najiweni miasi ji che Naboti ni miasi ja achiŵanagwe, none ngulumbila kuti chinanlipichisye chisasi mu ngunda wo.’ Kwayele, njigale chiilu chi che Yolamu nkachijasile ku ngunda u che Naboti mpela iŵatite kusala Ambuje Akunnungu.”
Che Ahasia mwenye jwa ku Yuda akuulajikwa
27Che Ahasia mwenye jwa ku Yuda paŵaiweni indu iyakopochele ŵautwiche kwaula ku musi wa ku Beti Hagani, akuno che Yehu achinkuyaga ni ŵangondo ŵakwe achikalipaga kuti, “Mummulaje nombejo!” Ŵangondo ŵansomile mpamba ali mmutuka jakwe, ku litala lyakwaula ku Guli chiŵandi ni musi wa Ibileamu, nambo ŵapelengenye ulendo mpaka ku Megido kuŵajile kuwila. 28Ŵakutumichila ŵakwe ŵagajigele malilo mu mutuka jakwe ni kugajausya ku Yelusalemu, kweleko ŵagasichile mu malembe ga chimwenye mu musi u che Daudi.
29Che Ahasia ŵatandite kutawala ku Yuda pa chaka cha kumi na moja cha kutawala kwa che Yolamu mwana ju che Ahabu.
Che Yesebeli mwenye jwa chikongwe akuulajikwa
30Nipele che Yehu ŵapite ku Yesileeli, che Yesebeli ŵapilikene ngani syo ŵatasile wanja ni kusalalisya umbo syakwe, ŵatemi chiŵandi ni pedilisha lya nyuumba ja chimwenye ali nkulingulila paasa. 31Che Yehu paŵajinjile pa nnango che Yesebeli ŵausisye, “Ana nkwika kwa chitendewele mmwe wanli mpele che Simili! Mmwe umwauleje jwankulu jwenu?” 32Che Yehu ŵalolite penani palidilisha ni kuti, “Ana apali jwali upande wangu, ni ŵani?” Achakulu ŵa masengo ŵa nyuumba ja chimwenye mpela ŵaŵili ŵatatu nyi ŵakopwesye mitwe jao pedilisha kwalingulila che Yehu uŵaliji cha pasi, 33pelepo che Yehu ŵatite “Mumponye jwankongwe jo paasi!” Ŵandu ŵala ŵamponyisye paasi ni paŵalitimbile pasi miasi jakwe jamisichile mwipupa ni jine jamisichile pachanya pa falasi sya che Yehu pasyaliji nkwaliŵataliŵata. 34Nipele che Yehu ŵajinjile mu nyuumba ja chimwenye, ŵalile ni kung'wa. Nipele ŵaasalile, “Njaulangane nkaasiche jwankongwe jwalwesekwe jula pakuŵa ali mwali jwa mwenye.” 35Nambo paŵakopweche kuti akaasiche nganagasimana malilo ikaŵe chikalakasa cha ntwe, magasa ni sajo. 36Nipele ŵausile ni kwasalila che Yehu ngani jo, nombejo ŵatite, “Yeleyi ni iŵaŵechete Ambuje Akunnungu kwa litala lya jwakulondola jwakwe che Elia jwa ku Tishibi paŵatite, ‘Chiilu chi che Yesebeli chichililikwe ni mbwa ku musi wa ku Yesileeli. 37Malilo gakwe chigaŵe mpela samadi mu litaka lya musi wa ku Yesileeli, kwayele ngapagwa jutakombole kumanyilila kuti aju ali che Yesebeli.’”
Currently Selected:
2 Mamwenye 9: YBV
Highlight
Share
Copy
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.
