उत्पत्ती 7
7
मुहेल दार्यो पाणी
1तेवी यहोवा बोगवान नुहाह केयो, “तु तारा आखा गेराणाह लेन डोंडह्या माय जा; काहाकाय मी ज्यी टेमीन माणहाम रेन तुवाह उलोस देरमी दिखेल हे। 2आखी जातीन चोखाला जेनवारा माय रेन ते तु सात सात जोड्यु, मतलब नर एने मादा लिज्ये; पुण जा जेनवारे चोखाला नाय मिले, ता माय रेन दुय दुय लिज्ये, मतलब नर एने मादा।#लेव्यवस्था 11 3एने जुगाम उड़नारे चिड़ाम रेन सात सात जोड्यु, मतलब नर एने मादा लिज्ये; काय तान वोस वोचीन आखी देरती पोर तान वोस वोचीन रेय। 4काहाकाय एवी सात दिह्यान पासाण, मी देरती पोर चालीह दिह एने चालीह रात्यु वोर मुहेल दाऱ्यो पाणी पाड़ती रेह; एने जोली वोस्तु मी बाणायेल हे त्यु आख्युह बुई पोर रेन खेतेम केर देह।” 5बोगवानान ज्या उकुमान गेत नुह किऱ्यो।
6जेवी देरती पोर मुहेल दाऱ्यो पाणी पुड़ेल ती टेम माय नुहान वोय एक होव वोरह्यान एती। 7नुह तान बायकु सोराह, एने वोवड्युक लेन डोंडह्या माय गीयो।#मत्ती 24:38-39; लुका 17:27 8देरती पोर वाला आखा चोखाला, एने एठाला दुय बातीन चिड़ा एने जेनवारे। 9एने बुई पोर लोलनाराम रेन बी, दुय दुय, मतलब नर एने मादा, बोगवान नुहाह उकुम आपेल इतो, तिहेच केरीन डोंडह्या माय नुहा फाय गीया। 10उवतो सात दिह्यान पासाण मुहेल दाऱ्यो पाणी देरती पोर पोड़ने बाज गीयो।
11जेवी नुहान वोयीन, सोव होव वोरह्यान दुसरा मोयनान सेतरावे दिह आवो; तेदिहच मोटला उन्डाला देरीयाम रेन आखा जेरे फुटीन निकेलना एने जुगान खिड़क्यु उगड़ी गीयु।#2 पतरस 3:6 12एने चालीह दिह एने चालीह रात्यु मुहोल दाऱ्यो पाणी लागातार देरती पोर पोड़ती रिनो। 13ठिक तेदिस नुह तान सोरा शेम, हाम, येपेत, तान बायकु, एने तीनु वोवड्युक हिऱ्यो, 14एने ता हिऱ्यो एक एक जातीन सोब जेंगली जेनवारे, एने एक एक जातीन सोब पालन्या जेनवारे, एने एक एक जातीन आखा देरती पोर लोलनारे जेन्तु, एने एक एक जातीन सोब उड़नारे चिड़ा, डोंडह्या माय गीया। 15जोला जेनवाराम जीवान वाह एती तान आखी जातीम रेन दुय दुय नुह फाय डोंडह्या माय गीया। 16बोगवाना उगे रेन आपेल उकुमीन गेत तान आखी जातीन जेनवाराम रेन नर एने मादा डोंडह्याम गीया। तेवी बोगवान डोंडह्यान बायणो बोंद केर दिनो।
17एने देरती पोर चालीह दिह वोर मुहोल दाऱ्यो पाणी पोड़ती रिनो; एने पाणी जुलूमच हेंगली गीयो, ता माय डोंडह्यो उपेर उखलाणे बाज गीयो, एने तो देरती पोर रेन उचो उखलाय गीयो। 18पाणी हेंगलती हेंगलतीन देरती पोर जुलूमच हेंगली गीयो, एने डोंडह्यो पाण्या पोर तेरेंगणे बाज गीयो। 19एने पाणी देरती पोर ओलो वोद गीयो, काय आखी देरती पोर जोला मोठ मोठा बोयड़ा एता, ता सोब बुड़ गीया। 20पाणी ते सोब उच उचा बोयड़ाह बी बुड़ावीन पोन्दरा आथ उपेर वोद गीयो। 21एने देरती वाला चिड़ा, पालन्या जेनवारे, एने जेंगली जेनवारे, एने देरती पोर वाला आखा चालनारे जेनवारे, एने जोला जीव देरती पोर जुलूमच बोराय जायेल एता, ता आखा जेनवारे, एने माणहे बी मोर गीया। 22जा जा बुई पोर एता, जोलान नाकपुड्याम जीवणान वाह एती, ता सोब मोर गीया। 23इहकेरीन बोगवान देरती पोर वाला आखा माणहाह एने लोलनारे जीव जेन्तुह एने जुगाम उड़नारे चिड़ा एने जोला बुई पोर एता, ता सोबाह खेतेम केर दिनो, निस्ता नुह एने जोला ता हेऱ्या डोंडह्याम एता, ताच वोच गीया। 24एने पाणी एक होव पाचाह दिह वोर देरतीह डाप रियेल एतो।
Currently Selected:
उत्पत्ती 7: Nii2025
Highlight
Copy
Compare
Share
Want to have your highlights saved across all your devices? Sign up or sign in
The Nahali Bible © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2025
